ଭୁବନେଶ୍ବର: ରାଜଧାନୀରେ କମୁନି ସଂକ୍ରମଣ, ଏଠାରେ ଅଧିକ କ୍ଲଷ୍ଟର ସଂକ୍ରମଣ ରହୁଥିବା ନେଇ କହିଛନ୍ତି ସ୍ବାସ୍ଥ୍ୟ ବିଶେଷଜ୍ଞ । ଭୁବନେଶ୍ବରରେ ସଂକ୍ରମଣ ବଢୁଥିବା ନେଇ ସେ କହିଛନ୍ତି ଯେ ସହରରେ କ୍ଲଷ୍ଟର ସଂକ୍ରମଣ ଅଧିକ ରହୁଥିବା ବେଳେ ଏହାର R ଭାଲ୍ୟୁ 1. 24 ଉପରେ ରହୁଛି । ଏହାଛଡା ଦୈନିକ ଭାବରେ ଗ୍ରାମାଞ୍ଚଳ, ସହର ଏବଂ ରାଜ୍ୟ ବାହାରୁ ସହର ମଧ୍ୟକୁ ଅନେକ ଲୋକ ଆସୁଛନ୍ତି ।
ତେବେ କିଛି ଲୋକ ନିଯୁକ୍ତି ପାଇଁ ଆସୁଥିବା ବେଳେ ଆଉ କିଛି ଲୋକ ବେପାର, ବାଣିଜ୍ୟ ପାଇଁ ଆସୁଛନ୍ତି ଏବଂ ଆଉ କିଛି ଚିକିତ୍ସା ହେବା ଲାଗି ରାଜଧାନୀକୁ ଆସୁଛନ୍ତି । ଏଣୁ ସଂକ୍ରମଣ ଅଧିକ ରହୁଛି । କ୍ଲଷ୍ଟର ସଂକ୍ରମଣ ଯୋଗୁଁ ପରିବାରରେ ଜଣେ ସଂକ୍ରମଣ ହେଲେ ପୁରା ପରିବାର ଆକ୍ରାନ୍ତ ହେଉଛନ୍ତି ।
ତେଣୁ ଭୁବନେଶ୍ବରରେ ଯେଉଁ ଘରୁ ଜଣେ ସଂକ୍ରମିତ ଚିହ୍ନଟ ହେଉଛନ୍ତି ସେ ଘରକୁ ସମ୍ପୂର୍ଣ୍ଣ ଭାବରେ କ୍ଵାରେଣ୍ଟାଇନରେ ରଖାଯିବା ନିତାନ୍ତ ଆବଶ୍ୟକ । ନଚେତ୍ ମାଇକ୍ରୋ କଣ୍ଟେନମେଣ୍ଟ ଜୋନକୁ କଡ଼ାକଡ଼ି ଭାବରେ ପାଳନ ହେଲେ ସଂକ୍ରମଣ କମ୍ ରହିବ ।
ଏଥିସହ ରାଜ୍ୟରେ ଖୁବ ଶୀଘ୍ର ସଂକ୍ରମଣ ତଳମୁହାଁ ହେବ ବୋଲି କହିଛନ୍ତି ସ୍ବାସ୍ଥ୍ୟ ବିଶେଷଜ୍ଞ ନିରୋଜ ମିଶ୍ର । ଏବେ ସୁଦ୍ଧା ରାଜଧାନୀରେ ମୋଟ ସଂକ୍ରମିତଙ୍କ ସଂଖ୍ୟା 101797 । ସେଥିମଧ୍ୟରୁ ସୁସ୍ଥ ହେଲେଣି ୯୮୦୭୪ ଏବଂ ମୃତ୍ୟୁ ସଂଖ୍ୟା 896ରେ ପହଞ୍ଚିଥିବା ବେଳେ 2806ଟି ଆକ୍ଟିଭ କେସ ରହିଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
