ଭଦ୍ରକ: ଗତ ମେ ମାସ 14 ତାରିଖରେ ଭଦ୍ରକ ଗ୍ରାମାଞ୍ଚଳ ଅଧିନସ୍ଥ ବାଣୀତିଆ ପଞ୍ଚାୟତର ସରପଞ୍ଚ ଦାମୋଦର ମହଲାଙ୍କୁ ଜିଆରଏସ ଭାଗିରଥି ପ୍ରଧାନ ମରଣାନ୍ତକ ଆକ୍ରମଣ କରିଥିବା ନେଇ ଗ୍ରାମାଞ୍ଚଳ ଥାନାରେ ଅଭିଯୋଗ ହୋଇଥିଲା । କିନ୍ତୁ ଗ୍ରାମାଞ୍ଚଳ ପୋଲିସ କୌଣସି କାର୍ଯ୍ୟାନୁଷ୍ଠାନ ନ ନେଇଥିଲେ । ଆଜି(ବୁଧବାର) ନ୍ୟାୟ ଦାବିରେ SPଙ୍କ କାର୍ଯ୍ଯାଳୟ ସମ୍ମୁଖରେ ଶତାଧିକ ମହିଳା ଓ ପୁରୁଷ ପ୍ରତିବାଦ କରିଛନ୍ତି ।
ଭଦ୍ରକ ବ୍ଲକ ଅଧିନ ବାଣିତିଆ ପଞ୍ଚାୟତର ଏକ କାଢାନାଳ କାର୍ଯ୍ୟ ନିମ୍ନ ମାନର ହେଉଥିବା ନେଇ ବିବାଦ ଆରମ୍ଭ ହୋଇଥିଲା । ତେବେ ଏହି ଘଟଣାକୁ ନେଇ ଆପୋଷ ବୁଝାମଣା ପାଇଁ ସରପଞ୍ଚ ଦାମୋଦର ମହଲାଙ୍କୁ ଥାନାକୁ ଆସୁଥିବା ବେଳେ ପଞ୍ଚାୟତ GRS ଭାଗିରଥି ମରଣାନ୍ତକ ଆକ୍ରମଣ କରିଥିଲେ । ଏହାପରେ ଘଟଣାର ତଦନ୍ତ ଆରମ୍ଭ କରିଥିଲା ଗ୍ରାମାଞ୍ଚଳ ପୋଲିସ ।
ଗ୍ରାମବାସୀମାନେ ଏହି ଘଟଣାର ଶୀଘ୍ର ତଦନ୍ତ କରି ଦୋଷୀଙ୍କୁ ଦଣ୍ଡ ଦେବାକୁ ଦାବି କରିଥିଲେ । ତେବେ ଅଦ୍ୟାବଧି କୌଣସି କାର୍ଯ୍ୟାନୁଷ୍ଠାନ ନିଆଯାଇନଥିବାରୁ ନ୍ଯାୟ ଦାବିରେ ଶତାଧିକ ଗ୍ରାମବାସୀ SPଙ୍କ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ କରିବା ସହ ଜିଆରଏସଙ୍କ ଗିରଫ ଦାବି କରିଛନ୍ତି । ସେପଟେ ଏନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
