ନୂଆଦିଲ୍ଲୀ: ଖୋଲିଲା ଜୋମାଟୋ IPO । ଫୁଡ ଅର୍ଡର ପ୍ଲାଟଫର୍ମ ଜୋମାଟୋର ଇନିସିଆଲ ପବ୍ଲିକ ଅଫର ଆଜିଠାରୁ ଖୋଲିଛି । ତେବେ ଖୁଚୁରା ନିବେଶକଙ୍କ ଠାରୁ ଏହାକୁ ଭଲ ପ୍ରତିକ୍ରିୟା ମିଳୁଛି । ଆଜି ସକାଳ 10ଟାରୁ ଜୋମାଟୋ IPO ଖୋଲା ହୋଇଥିବାବେଳେ ମାତ୍ର ଘଣ୍ଟାକ ମଧ୍ୟରେ ଏଥିରେ ଖୁଚୁରା ନିବେଶକଙ୍କ ଅଂଶ 100 ପ୍ରତିଶତ ରହିଛି । ସେହିପରି ପ୍ରାଥମିକ ପର୍ଯ୍ୟାୟରେ 36 ପ୍ରତିଶତରୁ ଅଧିକ ସେୟାର ସବସ୍କ୍ରାଇବ କରାଯାଇଛି । ଖୁଚୁରା ବ୍ୟକ୍ତିଗତ ନିବେଶକଙ୍କ ପାଇଁ ସଂରକ୍ଷିତ 12.95 କୋଟି ସେୟାର ସହିତ 24.76ର କୋଟି ସେୟାର ସାଢେ 1 ଟା ସୁଦ୍ଧା ବିଡ୍ ହୋଇଛି ।
ନିବେଶକ ଜୋମାଟୋ IPOରେ ଆଜିଠୁ ଅର୍ଥାତ୍ 14 ଜୁଲାଇ ଠାରୁ 16 ଜୁଲାଇ ପର୍ଯ୍ୟନ୍ତ ନିବେଶ କରିପାରିବେ । ଆଇପିଓରେ ଖୁଚୁରା ନିବେଶକଙ୍କ ପାଇଁ 10 ପ୍ରତିଶତ ସ୍ଥାନ ସଂରକ୍ଷିତ ରହିଛି । ଏହାର ପ୍ରାଇସ ବ୍ରାଣ୍ଡ 72-76 ଟଙ୍କା ଏବଂ ଲଟ ସାଇଜ 195 ସେୟାର ବିଶିଷ୍ଟ ଅଟେ । ଅର୍ଥାତ୍ ନିବେଶକ 195 ସେୟାର ପାଇଁ ନିବେଶ କରିପାରିବେ । ନିବେଶକଙ୍କୁ IPOର ଅପର ବ୍ରାଣ୍ଡର ଅନୁଯାୟୀ ଗୋଟିଏ ଲଟ ପିଛା ସର୍ବନିମ୍ନ 14,820 ଟଙ୍କା ନିବେଶ କରିବାକୁ ହେବ ।
କମ୍ପାନୀ ଇନିସିଆଲ ପବ୍ଲିକ ଅଫର(IPO) ମାଧ୍ୟମରେ 9 ହଜାର 375 କୋଟି ଟଙ୍କା ହାସଲ କରିବାକୁ ଯୋଜନା କରିଛି । ଏହା ଅଧୀନରେ 9 ହଜାର କୋଟି ଟଙ୍କାର ନୂଆ ସେୟାର ପ୍ରଦାନ କରାଯିବ । ସେହିପରି 375 କୋଟି ଟଙ୍କାର ସେୟାର ଅଫର ଫର ସେଲ(OFS) ଜରିଆରେ ବିକ୍ରୟ କରାଯିବ ।
ତେବେ ଆପଣ ଜୋମାଟୋ ଆଇପିଓରେ paytm money ମାଧ୍ୟମରେ ମଧ୍ୟ ନିବେଶ କରିପାରିବେ । paytm ନିଜ ପ୍ଲାଟଫର୍ମରେ ଏକ ନୂଆ ଫିଚର ଲଞ୍ଚ କରିଛି, ଯାହା ମାଧ୍ୟମରେ ବ୍ୟବହାରକାରୀ 24 ଘଣ୍ଟା ଏହି IPOରେ ନିବେଶ କରିପାରିବେ ।
@PTI
