ନୂଆଦିଲ୍ଲୀ: ଇଣ୍ଡିଆ ମେଣ୍ଟ ବୈଠକରେ ଚା' ସହ ସିଙ୍ଗଡା ଦିଆନଯିବାରୁ କଂଗ୍ରେସକୁ କଟାକ୍ଷ କରିଛନ୍ତି ଜେଡିୟୁ ନେତା । ସିଙ୍ଗଡା କିଣିବାକୁ ବି ଦଳ ପାଖରେ ପଇସା ନାହିଁ । ଆଗରୁ ମେଣ୍ଟର ବୈଠକ ହେଲେ ଚା' ଓ ସିଙ୍ଗଡା ଦିଆଯାଉଥିଲା । ହେଲେ ମଙ୍ଗଳବାର ଅନୁଷ୍ଠିତ ବୈଠକ କେବଳ ଚା' ବିସ୍କୁଟରେ ସୀମିତା ଥିଲା । ତେଣୁ ସିଙ୍ଗଡା ପାଇଁ କଂଗ୍ରେସ ପାଖରେ ପଇସା ନାହିଁ ବୋଲି କହି କଂଗ୍ରେସକୁ ତାଚ୍ଛଲ୍ୟ କରିଛନ୍ତି ଜେଡିୟୁ ସାଂସଦ ସୁନୀଲ କୁମାର ପିଣ୍ଟୁ ।
ଜେଡିୟୁ ସାଂସଦ କହିଛନ୍ତି, "ଦିଲ୍ଲୀରେ ମେଣ୍ଟର ଚତୁର୍ଥ ବୈଠକରେ ବିଭିନ୍ନ ରାଜନୈତିକ ଦଳର ବଡ଼ ବଡ଼ ନେତା ଯୋଗ ଦେଇଥିଲେ । ଆଗାମୀ ସାଧାରଣ ନିର୍ବାଚନ ପାଇଁ ଏଥିରେ ଆସନ ବୁଝାମଣା ସଂକ୍ରାନ୍ତରେ ଆଲୋଚନା ହେବାର ଥିଲା । ମାତ୍ର ସେଭଳି କିଛି ଆଲୋଚନା ହୋଇନଥିଲା । ଏଥର ମେଣ୍ଟର ବୈଠକ କେବଳ ଚା' ଓ ବିସ୍କୁଟରେ ସୀମିତ ଥିଲା । ସିଙ୍ଗଡା କିଣିବା ପାଇଁ ବି କଂଗ୍ରେସ ପାଖରେ ପଇସା ନାହିଁ । କାରଣ ନିକଟରେ କଂଗ୍ରେସ କହିଥିଲା ଯେ, ତା' ପାଖରେ ପାଣ୍ଠିର ଅଭାବ ଅଛି । ତେଣୁ ଦଳ ୧୩୮, ୧୩୮୦ ଓ ୧୩,୮୦୦ ଟଙ୍କା ଆକାରରେ ଡୋନେସନ (ଦାନ) ଆଦାୟ କରିବାକୁ କହିଥିଲା । ହେଲେ ସେହି ଡୋନେସନ ଏଯାଏଁ ମିଳିନଥିବାରୁ ମଙ୍ଗଳବାର ବୈଠକ ବିନା ସିଙ୍ଗଡାରେ କେବଳ ଚା' ବିସ୍କୁଟ ସାରିବାକୁ ପଡ଼ିଲା । ଯେଉଁ ପ୍ରସଙ୍ଗରେ ଆଲୋଚନା ପାଇଁ ବୈଠକ ଡକାଯାଇଥିଲା, ତା' ଉପରେ ବି କିଛି ଆଲୋଚନା ହୋଇନଥିଲା ।"
ଜେଡିୟୁ ସାଂସଦଙ୍କ ଏଭଳି ବୟାନରେ ବିଜେପି ନେତା ଅମିତ ମାଲଭିୟ ପ୍ରତିକ୍ରିୟା ଦେଇ କହିଛନ୍ତି ଯେ, ଇଣ୍ଡିଆ ମେଣ୍ଟ ବୈଠକରେ ସିଙ୍ଗଡ଼ା ଦିଆନଯିବାରୁ ନୀତିଶ କୁମାରଙ୍କ ସାଂସଦମାନେ ଅସନ୍ତୁଷ୍ଟ ହୋଇଛନ୍ତି । ବୈଠକରେ କୌଣସି ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇନଥିବା ଅଭିଯୋଗ କରୁଛନ୍ତି । ତେବେ ଯେପର୍ଯ୍ୟନ୍ତ ବିରୋଧୀ ମେଣ୍ଟ ନୀତିଶ କୁମାରକୁ ପ୍ରଧାନମନ୍ତ୍ରୀ ପ୍ରାର୍ଥୀ କରିନି, ସେପର୍ଯ୍ୟନ୍ତ ଏହିଭଳି ଅଭିଯୋଗ ଶୁଣିବାକୁ ମିଳିବ ।
ଏହା ମଧ୍ୟ ପଢନ୍ତୁ: କଂଗ୍ରେସ ନେତାଙ୍କ ଦିଲ୍ଲୀ ଗସ୍ତ: କାଲି ହାଇକମାଣ୍ଡଙ୍କ ସହ ୨୪ ନିର୍ବାଚନ ପାଇଁ ରଣନୀତି ନିର୍ଣ୍ଣୟ
