ଲକ୍ଷ୍ନୌ: ବହୁଚର୍ଚ୍ଚିତ ପ୍ରଶାସନିକ ଅଧିକାରୀ ଜ୍ୟୋତି ମୌର୍ଯ୍ୟ ଓ ସ୍ବାମୀ ଆଲୋକ ମୌର୍ଯ୍ୟଙ୍କ ମଧ୍ୟର ଜାରି ରହିଥିବା ବିବାଦ ମାମଲାରେ ଏକ ରୋଚକମୋଡ ଦେଖିବାକୁ ମିଳିଛି । ଜ୍ୟୋତିଙ୍କ ବିରୋଧରେ ଏକାଧିକ ଅଭିଯୋଗ ଆଣିଥିବା ସ୍ବାମୀ ଆଲୋକ ମୌର୍ଯ୍ୟ ସମସ୍ତ ଅଭିଯୋଗ ପ୍ରତ୍ୟାହାର କରିନେଇଛନ୍ତି । ତେବେ ଏପରି ୟୁଟର୍ଣ୍ଣ ସମ୍ପର୍କରେ ସ୍ବାମୀ ଆଲୋକ କୌଣସି ନିର୍ଦ୍ଦିଷ୍ଟ କାରଣ ମଧ୍ୟ ଦର୍ଶାଇନାହାନ୍ତି । ଯାହା ପୁଣି ବିଭିନ୍ନ ଚର୍ଚ୍ଚାକୁ ଜନ୍ମ ଦେଇଛି ।
ଏକ ନାଟକୀୟ ଘଟଣାକ୍ରମରେ ଆଜି ସକାଳେ ସ୍ବାମୀ ଆଲୋକ ହଠାତ ଅତିରିକ୍ତ କମିଶନରଙ୍କ କାର୍ଯ୍ୟାଳୟରେ ପହଞ୍ଚିଥିଲେ । ପତ୍ନୀ ଜ୍ଯୋତିଙ୍କ ନାମରେ କରିଥିବା ସମସ୍ତ ଅଭିଯୋଗ ପ୍ରତ୍ୟାହାର କରିବା ପାଇଁ ଦରଖାସ୍ତ ଦେଇଥିଲେ । ତେବେ ଏହି ଘଟଣା ଜଣାପଡିବା ପରେ ଗଣମାଧ୍ୟମ ପ୍ରତିନିଧି କମିଶନରଙ୍କ କାର୍ଯ୍ୟାଳୟରେ ଭିଡ ଜମାଇଥିଲେ । ଗଣମାଧ୍ୟମ ପ୍ରତିନିଧିଙ୍କ ଏ ସମ୍ପର୍କିତ ପ୍ରଶ୍ନରେ କୌଣସି ସିଧା ଉତ୍ତର ରଖିନଥିଲେ ଆଲୋକ । କେବଳ ସେ, ବହୁଥର ଚିନ୍ତା କରିବା ପରେ ଅଭିଯୋଗ ପ୍ରତ୍ୟାହର କରିବା ପାଇଁ ନିଷ୍ପତ୍ତି ନେଇଥିବା କହିଥିଲେ । ତେବେ ଆଲୋକଙ୍କ ଏପରି ହଠାତ ନିଷ୍ପତ୍ତିରେ ଅନେକ ଚର୍ଚ୍ଚା ସୃଷ୍ଟି ହୋଇଛି । କିଛି ଭିତିରି ବୁଝାମଣା ନା ଚାପରେ ଆଲୋକ ମାମଲା ପ୍ରତ୍ୟାହାର କଲେ ତାହା ଏପର୍ଯ୍ଯନ୍ତ ଚର୍ଚ୍ଚା ରହିଛି ।
ତେବେ ପ୍ରଥମେ ସ୍ବାମୀ ଆଲୋକଙ୍କ ଅଭିଯୋଗ ଆସିବା ପରେ ଜ୍ୟୋତି ମଧ୍ୟ ପାଲଟା ଅଭିଯୋଗ କରିଥିଲେ । ଉଭୟ ପକ୍ଷରୁ ପରସ୍ପର ଉପରେ ଏକାଧିକ ସଙ୍ଗୀନ ଅଭିଯୋଗ କରାଯାଇଥିଲା । ଆଲୋକ ଜ୍ୟୋତିଙ୍କୁ ଦୁର୍ନୀତିରେ ସମ୍ପୃକ୍ତ ଥିବା ଓ ଅନ୍ୟ ଜଣେ ଅଧିକାରୀଙ୍କ ସହ ଅନୈତିକ ସମ୍ପର୍କ ରଖିଥିବା ଅଭିଯୋଗ କରିଥିଲେ । ଜ୍ୟୋତି ମଧ୍ୟ ଧୁମଙ୍ଗଞ୍ଜ ପୋଲିସ ଷ୍ଟେସନରେ ସ୍ବାମୀ ଆଲୋକଙ୍କ ବିରୋଧରେ ଯୌତୁକ ନିର୍ଯାତନା ମାମଲା ଦାୟର କରିଥିଲେ ।
ତେବେ ଜ୍ଯୋତି ଉତ୍ତର ପ୍ରଦେଶ ପ୍ରଶାସନର ଜଣେ ପ୍ରଶାନିକ ଅଧିକାରୀ ହୋଇଥିବା ବେଳେ ସ୍ବାମୀ ଅଲୋକ ପିରମଳ ବିଭାଗରେ ଜଣେ ଚତୁର୍ଥ ଶ୍ରେଣୀ କର୍ମଚାରୀ ଭାବେ କାର୍ଯ୍ୟରତ ଅଛନ୍ତି । ଆଲୋକଙ୍କ ଅଭିଯୋଗ ଅନୁସାରେ ସେ ବହୁ ପରିଶ୍ରମ କରି ଜ୍ୟୋତିଙ୍କୁ ପ୍ରଶାସନିକ ସେବା ପରୀକ୍ଷା ପ୍ରସ୍ତୁତିରେ ସମସ୍ତ ସହଯୋଗ କରିଥିଲେ । ହେଲେ ଏଥିରେ ସଫଳ ହେବା ଜ୍ୟୋତିଙ୍କୁ ଏସଡିଏମ ଭାବେ ନିଯୁକ୍ତି ମିଳିଥିଲା । ଏହା ପରେ ତାଙ୍କର ଆଚରଣ ଓ ବ୍ୟବହାର ବଦଳିଯାଇଥିଲା । ସେ ସ୍ବାମୀଙ୍କୁ ଅଣଦେଖା କରିବା ଆରମ୍ଭ କରିଥିଲେ । ଅନ୍ୟ ଜଣେ ପ୍ରଶାସନିକ ଅଧିକାରୀଙ୍କ ସହ ସମ୍ପର୍କ ରଖିଥିଲେ ।
ପାଲଟା ଜ୍ୟୋତି ମଧ୍ୟ ଧୁମଙ୍ଗଞ୍ଜ ପୋଲିସ ଷ୍ଟେସନରେ ସ୍ବାମୀ ଆଲୋକ ଓ ତାଙ୍କ ପରିବାର ବିରୋଧରେ ଯୌତୁକ ନିର୍ଯାତନା ଅଭିଯୋଗ ଆଣି ମାମଲା ଦାୟର କରିଥିଲେ । ତେବେ ଘଟଣାଟି ପ୍ରଘଟ ହେବା ପରେ ସାମାଜିକ ଗଣମାଧ୍ୟମରୁ ଆରମ୍ଭ କରି ସମଗ୍ର ଦେଶରେ ବେଶ ଚର୍ଚ୍ଚା ସୃଷ୍ଟି କରିଥିଲା । ବିବାହ ପରେ ପ୍ରଶାସନିକ ଓ ଅନ୍ୟ ସରକାରୀ ନିଯୁକ୍ତି ପାଇଁ କୋଚିଂ ନେଉଥିବା କିଛି ମହିଳାଙ୍କୁ ସେମାନଙ୍କ ସ୍ବାମୀ ଫେରାଇ ନେଇଥିବା ମଧ୍ୟ ଅଭିଯୋଗ ହୋଇଥିଲା ।
ବ୍ୟରୋ ରିପୋର୍ଟ, ଇଟିଭି ଭାରତ
