ହାଇଦ୍ରାବାଦ: ଇଟାଭାଟିରେ କାମ କରି ଦୁଇ ପଇସା ରୋଜଗାର କରି ଗୁଜୁରାଣ ମେଣ୍ଟାଇବାକୁ ଆସିଥିଲେ । ହେଲେ କିଏ ଜାଣିଥିଲା ଯେ ନର ରାକ୍ଷସ କବଳରେ ପଡିଯିବେ । ଓଡିଶାରୁ ଦାଦନ ଖଟିବାକୁ ସହକର୍ମୀଙ୍କ ସହ ଘରୁ ଗୋଡ କାଢିଥିଲେ 30 ବର୍ଷୀୟ ମହିଳା । ଚାରି ସହକର୍ମୀ ହିଁ ମହିଳାଙ୍କୁ ଦୁର୍ଷ୍କମ କରିଥିବା ଅଭିଯୋଗ ପରେ ସେମାନଙ୍କୁ 20ବର୍ଷ କାରାଦଣ୍ଡରେ ଦଣ୍ଡିତ କରାଯାଇଛି ।
ଓକିଲଙ୍କ କହିବାନୁସାରେ, ଚାରିଜଣ ଅଭିଯୁକ୍ତ ଏବଂ ମହିଳା ଓଡ଼ିଶାରୁ ଆସି ମହେଶ୍ୱରାମରେ ଥିବା ଏକ ଇଟାଭାଟିରେ ଶ୍ରମିକ ଭାବେ କାମ କରୁଥିଲେ । ଅଗଷ୍ଟ 16 ତାରିଖ ରାତିରେ ଯେତେବେଳେ ମହିଳା ଜଣକ ଏକ ଉତ୍ସବରେ ଯୋଗଦେବାକୁ ଯାଇଥିଲେ । ସେଠାରେ ଚାରିଜଣ ଯୁବକ ତାଙ୍କୁ ଅନୁସରଣ କରି ଏକ ଅଲଗା ସ୍ଥାନକୁ ନେଇଯାଇ ଦୁର୍ଷ୍କମ କରିଥିଲେ । ସେଠାରୁ ଚାରି ଅଭିଯୁକ୍ତ ପଳାଇଯାଇଥିଲେ ।
ଏ ଘଟଣା ନେଇ ମହିଳା ଜଣକ ସେମାନଙ୍କ ବିରୋଧରେ ମହେଶ୍ୱରାମ ପୋଲିସ ନିକଟରେ ଅଭିଯୋଗ କରିଥିଲେ। ଅଭିଯୋଗ କ୍ରମେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା । ରାଚକୋଣ୍ଡା ପୋଲିସ କମିଶନର ମହେଶ ଏମ ଭାଗବତ ନଭେମ୍ବର 2019 ରେ ଏହି ଚାରି ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରି କୋର୍ଟ ଚାଲାଣ କରିଥିଲେ ।
ତେବେ ସୋମବାର ଗଣଦୁର୍ଷ୍କମ ନେଇ ଆଇପିସି ଧାରା 376 ଡିରେ ଚାରି ଦୁର୍ଷ୍କମକାରୀଙ୍କୁ 20 ବର୍ଷ କାରାଦଣ୍ଡରେ ଦଣ୍ଡିତ କରିବା ସହ 20 ହଜାର ଟଙ୍କା ଜୋରିମାନା ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
