ଭୋପାଳ: ମଧ୍ୟ ପ୍ରଦେଶ ଭୋପାଳର ଏକ ହଷ୍ଟେଲରୁ 26 ଜଣ ଛାତ୍ରୀ ନିଖୋଜ ହୋଇଯାଇଥିବା ଅଭିଯୋଗ ହୋଇଛି । ଏହି ହଷ୍ଟେଲଟି ବିନା ସରକାରୀ ଅନୁମତିରେ ସଞ୍ଚାଳିତ ହେଉଥିଲା । ଏହି ଛାତ୍ରୀମାନଙ୍କୁ ଧର୍ମାନ୍ତରୀଣ କରିବା ଉଦ୍ଦେଶ୍ୟରେ କେଉଁଆଡେ ଅନ୍ତର୍ଧ୍ୟାନ କରାଯାଇଥିବା ମଧ୍ୟ ଅଭିଯୋଗ ହୋଇଛି । ନିଜେ ପୂର୍ବତନ ମୁଖ୍ଯମନ୍ତ୍ରୀ ଶିବରାଜ ସିଂ ଚୌହାନ ଘଟଣା ନେଇ ଚିନ୍ତା ପ୍ରକଟ କରିବା ସହ ସରକାରଙ୍କୁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ନିବେଦନ କରିଥିବା ଜଣାପଡିଛି । ଏନେଇ ଶିବରାଜ ନିଜ ‘ଏକ୍ସ’ ହ୍ୟାଣ୍ଡେଲରେ ମଧ୍ୟ ଟ୍ବିଟ କରିଛନ୍ତି ।
ମିଳିଥିବା ସୂଚନା ଅନୁସାରେ, ରାଜଧାନୀ ଭୋପାଳରୁ ପ୍ରାୟ 20 କି.ମି ଦୂରରେ ଏହି ହଷ୍ଟେଲଟି କିଛି ବର୍ଷ ହେବ ସଞ୍ଚାଳିତ ହୋଇ ଆସୁଥିଲା । ଏକ ଏନଜିଓ ଅଧୀନରେ ଏହା କାର୍ଯ୍ୟକ୍ଷମ ଥିଲା । ଶିଶୁ ସୁରକ୍ଷା କମିଶନର ଏକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଜାତୀୟ ଶିଶୁ ସୁରକ୍ଷା କମିଶନର ପ୍ରାଥମିକ ତଦନ୍ତ ପରେ ମିଳିଥିବା ରିପୋର୍ଟରେ ଏହା ଜଣାପଡିଛି ଯେ, ସେଣ୍ଟରରେ ସମୁଦାୟ 68 ଜଣ ପିଲାଙ୍କ ପଞ୍ଜୀକରଣ କରାଯାଇଛି । ମାତ୍ର ଏବେ ସେଠାରେ 41 ଜଣ ବାଳିକା ସେଠାରେ ଥିବା ଜଣାପଡିଛି । ସେମାନେ ମଧ୍ୟପ୍ରଦେଶ, ଝାଡଖଣ୍ଡ ଓ ଗୁଜୁରାଟର ହୋଇଥିବା ଜଣାପଡିଛି । ମାତ୍ର ଅନ୍ୟମାନଙ୍କ ସମ୍ପର୍କରେ ସେଣ୍ଟର କର୍ତ୍ତୃପକ୍ଷ କୌଣସି ସ୍ପଷ୍ଟ ସୂଚନା ଦେଇପାରୁନାହାନ୍ତି । ଶିଶୁ ସୁରକ୍ଷା ଆୟୋଗ (NCPCR)ର ମୁଖ୍ୟ ପ୍ରିୟଙ୍କ କାନୁନଗୋ ମଧ୍ୟ ପ୍ରଦେଶ ମୁଖ୍ୟ ଶାସନ ସଚିବଙ୍କୁ ଏକ ଚିଠି ଲେଖି ତୁରନ୍ତ କାର୍ଯ୍ୟାନୁଷ୍ଠାନ ଓ ଶିଶୁଙ୍କ ସମ୍ପର୍କରେ ସପ୍ତାହକ ମଧ୍ୟରେ ସ୍ପଷ୍ଟ କରିବାକୁ ନିର୍ଦ୍ଦେଶ ଦେଇଛନ୍ତି ।
ଏହା ମଧ୍ୟ ପଢନ୍ତୁ :- ଦିନ ଆସିବ ୨୦୦-୩୦୦ ବର୍ଷ ବଞ୍ଚିବ ମନୁଷ୍ୟ: ଇସ୍ରୋ ମୁଖ୍ୟ
ତେବେ ଘଟଣା ସମ୍ପର୍କରେ ଜଣାପଡିବା ପରେ ସ୍ଥାନୀୟ ଥାନାରେ ଏକ ମାମଲା ରୁଜୁ ହୋଇ ତଦନ୍ତ ଆରମ୍ଭ ହୋଇଛି । ସ୍ଥାନୀୟ ଏସଡିପିଓ ମଞ୍ଜୁ ତିଓ୍ବାରୀ କହିଛନ୍ତି, ଘଟଣା ସମ୍ପର୍କରେ ଜଣାପଡିବା ପରେ ଜୁଭିନାଇଲ ଆକ୍ଟ ଅନୁସାରେ ମାମଲା ରୁଜୁ ହୋଇଛି । ତଦନ୍ତର ଫଳାଫଳ ଆଧାରରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ତେବେ ଘଟଣା ସମ୍ପର୍କରେ ସ୍ଥାନୀୟ ଲୋକେ ବିସ୍ଫୋରକ ବୟାନ ଦେଇଛନ୍ତି । ଏଠାରେ ଏହି ହଷ୍ଟେଲ ବା ଚିଲ୍ଡରେନ ସେଣ୍ଟର ଗତ 5 ବର୍ଷରୁ ଅଧିକ ହେବ ଚାଲୁଥିଲା । ଭିତରକୁ କୌଣସି ବ୍ୟକ୍ତିଙ୍କୁ ଛଡା ଯାଉନଥିଲା । ଏଥିରେ ମଧ୍ୟ ପ୍ରଦେଶ ବ୍ୟତୀତ ଅନ୍ୟ ରାଜ୍ୟରୁ ମଧ୍ୟ କିଛି ଛାତ୍ରୀଥିଲେ । କେବଳ କିଛି ଗାଡିରେ ପିଲାଙ୍କୁ ବଜାର ଅନ୍ୟ ସ୍ଥାନକୁ ନିଆଯାଉଥିଲା । ସେମାନେ ଏସମ୍ପର୍କରେ ଅଧିକ କିଛି ମଧ୍ୟ ଜାଣିପାରୁଥିଲେ । ସ୍ଥାନୀୟ ଲୋକେ ମଧ୍ୟ ଧର୍ମାନ୍ତରୀଣକୁ ସନ୍ଦେହ କରୁଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
