ଆଖୁ ଚାଷୀ ଅଭାବି ବିକ୍ରିର ସମ୍ମୁଖୀନ, ମିଳୁନି ଉଚିତ ମୂଲ୍ୟ - Sugarcane farmers facing problem

Sugarcane farmers facing problem: ବୌଦ୍ଧ: ପ୍ରଚଣ୍ଡ ଗ୍ରୀଷ୍ମ ପ୍ରବାହ ସମୟରେ ଆଖୁ ରସର ରହିଛି ବେଶ ଚାହିଦା । ହେଲେ ଏହି ଆଖୁ ଚାଷୀଙ୍କ ଦୁଃଖ ସତେ ଯେମିତି ଭୁଲିଯାଇଛନ୍ତି ସରକାର । ବୌଦ୍ଧ ଜିଲ୍ଲାରେ ଆଖୁର ଚାହିଦା ଥିଲେ ମଧ୍ୟ ଆଖୁଚାଷୀ ଅଭାବି ବିକ୍ରିର ସମ୍ମୁଖୀନ ହେଉଥିବା ଅଭିଯୋଗ ହୋଇଛି । ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ରାଧାନଗର ପଞ୍ଚାୟତ ଅନ୍ତର୍ଗତ ପିପଲକଟା ଗ୍ରାମର ଚାଷୀ ନବୀନ ଭୋକ୍ତା ନିଜ ଦୁଇ ପୁଅଙ୍କ ସହାୟତାରେ ବର୍ଷ ତମାମ ସମନ୍ଵିତ ଚାଷ କାର୍ଯ୍ୟ କରି ପରିବାର ପ୍ରତିପୋଷଣ କରିଥାନ୍ତି । ନବୀନ ନିଜର ସ୍ବଳ୍ପ ଜମିରେ ପନିପରିବା ଚାଷ ସହିତ ମାଛଚାଷ ଓ ଖରାଦିନେ ଆଖୁ ଚାଷ କରିଥାନ୍ତି । ଆଖୁ ଚାଷ ପାଇଁ ବାପ ପୁଅ ତିନି ଜଣ ମିଶି ଦିନରାତି ଏକ କରି ପୋଖରୀରୁ ପାଣି ସେଚନ କରିଥାନ୍ତି । ଉତ୍ପାଦିତ ଆଖୁକୁ ଏହି ଚାଷୀ ନିକଟସ୍ଥ ବଜାର ହାଟରେ ନଚେତ ଆଖୁରସ ବିକ୍ରେତାଙ୍କ ନିକଟରେ ବିକ୍ରି କରିଦିଅନ୍ତି । ଆଖୁ ଗୋଟା ପ୍ରତି ମାତ୍ର ପାଞ୍ଚରୁ ଦଶ ଟଙ୍କା ମଧ୍ୟରେ ବିକ୍ରି କରି ଏମାନେ ଅଭାବି ବିକ୍ରିର ସମ୍ମୁଖୀନ ହେଉଥିବା ଅଭିଯୋଗ ହୋଇଛି । ଏହି ଅଞ୍ଚଳରେ ନବୀନ ଜଣେ ମାତ୍ର ଆଖୁ ଚାଷୀ ହୋଇଥିବା ବେଳେ ତାଙ୍କୁ କୌଣସି ପ୍ରକାରର ସରକାରୀ ସହାୟତା ମିଳିନାହିଁ ।ଏନେଇ ସ୍ଥାନୀୟ ଯୁବ ଚାଷୀ ମଧ୍ୟ ନବୀନଙ୍କୁ ସରକାରୀ ସହାୟତା ଯୋଗାଇ ଦେବାକୁ ଦାବି କରିଛନ୍ତି।

ଇଟିଭି ଭାରତ, ବୌଦ୍ଧ