ରାୟଗଡ଼ା: ବିକାଶ ନାହିଁ ତ ଭୋଟ ନାହିଁ । ଏଭଳି କିଛି ମୁଦ୍ଦାକୁ ନେଇ ଭୋଟ ବର୍ଜ୍ଜନ କରିଛନ୍ତି ରାୟଗଡ଼ା ଜିଲ୍ଲାର କୁର୍ଲି ପଞ୍ଚାୟତବାସୀ । କୁର୍ଲି ପଞ୍ଚାୟତର କାନ୍ଧ ଚମ୍ପିଆ ଗ୍ରାମବାସୀ ବାରମ୍ବାର ମୌଳିତ ସୁବିଧାରୁ ବଞ୍ଚିତ ହେଉଥିବା ନେଇ ଅଭିଯୋଗ କରିଥିଲେ ମଧ୍ୟ ପ୍ରଶାସନ କର୍ଣ୍ଣପାତ କରୁନଥିବା ଅଭିଯୋଗ କରିଛନ୍ତି । ତେବେ ଅଞ୍ଚଳର ବିକାଶ ହେବେ ପରେ ହିଁ ଭୋଟ ଦେବେ ବୋଲି ଲୋକେ କହିଛନ୍ତି ।
ରାୟଗଡ଼ା ବିଷମକଟକ ବିଧାନସଭା ନିର୍ବାଚନ କ୍ଷେତ୍ରର କଲନରା ବ୍ଲକ ଅନ୍ତର୍ଗତ କୁର୍ଲି ପଞ୍ଚାୟତରୁ 482 ଭୋଟରଙ୍କ ପାଇଁ ଉଦ୍ଧିଷ୍ଟ ଥିବା ବୁଥ ନମ୍ବର 293ରେ ଏପର୍ଯ୍ୟନ୍ତ ଗୋଟିଏ ବି ଭୋଟ ଦିଆ ଯାଇନାହିଁ । ସକାଳୁ ଗ୍ରାମବାସୀ ମାନେ ନିଜ ଅଞ୍ଚଳର ସମସ୍ୟାକୁ ନେଇ ଭୋଟ ବର୍ଜନ କରିବାର ନିଷ୍ପତ୍ତି ନେବା ସହ ଭୋଟକେନ୍ଦ୍ର ସାମ୍ନାରେ ଶାନ୍ତି ପୂର୍ଣ୍ଣ ଭାବରେ ବିକ୍ଷୋଭ ପ୍ରଦର୍ଶନ ଜାରି ରଖିଛନ୍ତି । ଏହି ପ୍ରତିବାଦରେ ଧୂମୁକାପଡ଼ୁ, କର୍ଣ୍ଣିପାଡୁ ଚମ୍ପିଆର ମୋଟ 482 ଭୋଟର ଭାଗ ସାମିଲ ଥିଲେ । ନିଜ ଗ୍ରାମକୁ ସଡ଼କ, ସ୍ୱାସ୍ଥ୍ୟ ଏବଂ ପାନୀୟ ଜଳ ଭଳି ମୌଳିକ ସୁବିଧା ପହଞ୍ଚି ନ ପାରିବାରୁ ପ୍ରତିବାଦରେ ଆଜି ଏହି ବିକ୍ଷୋଭ ପ୍ରଦର୍ଶନ କରିବା କଥା ଗ୍ରାମବାସୀ କହିଛନ୍ତି l
ଏଠାରେ ସୂଚନା ଯୋଗ୍ୟ କି, ଧୂମୁକାପଡ଼ୁ, କର୍ଣ୍ଣି ପାଡୁ ଏବଂ କାନ୍ଧ ଚମ୍ପିଆ ଗାଁକୁ ସବୁଦିନିଆ ରାସ୍ତା ଖଣ୍ଡିଏ ନାହିଁ । ଫଳରେ ସ୍ୱାସ୍ଥ୍ୟ ସେବା ଏଠି ସାତ ସପନ । କେବଳ ସେତିକି ନୁହଁ ତିନୋଟି ଗାଁରେ ରହିଛି ମାତ୍ର 4ଟି ନଳକୂପ ହେଲେ ଦୀର୍ଘ ଦିନ ଧରି ଅଚଳ ହୋଇ ପଡି ରହିବା ଫଳରେ ଲୋକେ ନିକଟସ୍ଥ ଝରଣା ଉପରେ ନିର୍ଭର କରନ୍ତି । ଏନେଇ ସ୍ଥାନୀୟ ସରପଞ୍ଚ ଠାରୁ ଆରମ୍ଭ କରି ଜିଲ୍ଲାପାଳଙ୍କୁ ଗୁହାରି କଲେ ମଧ୍ୟ କେହି କର୍ଣ୍ଣପାତ କରୁନଥିବା ଗ୍ରାମବାସୀ ଅଭିଯୋଗ କରିଛନ୍ତି ।
ତେବେ ଏନେଇ ଆମେ କୋଲନରା ବିଡିଓ ସହିତ ଯୋଗାଯୋଗ କରିଥିଲୁ କିନ୍ତୁ ନିର୍ବାଚନର ଦ୍ଵାହିଦେଇ କ୍ୟାମେରା ସାମ୍ନାରେ କିଛି କହିବାକୁ ମନା କରିଦେଇଥିଲେ । ତେବେ ଦେଖିବାକୁ ବାକି ରହିଲା ଏହି ଅଞ୍ଚଳର ଲୋକମାନେ କେବେ ମୌଳିକ ସୁବିଧାର ସୁଯୋଗ ପାଉଛନ୍ତି ।
ଇଟିଭି ଭାରତ, ରାୟଗଡ଼ା
