ଭୁବନେଶ୍ବର: ରାଜ୍ୟରେ ପ୍ରଥମ ପର୍ଯ୍ୟାୟ ମତଦାନ ଲାଗି ଆଜି ସରିଛି ପ୍ରଚାର । ମେ 13 ତାରିଖ ତଥା ଦିନକ ପରେ ସୋମବାର ପଡ଼ିବ ଭୋଟ । ନିଜ ନେତା ବାଛିବେ ରାଜ୍ୟବାସୀ । ଭୋଟରଙ୍କ ଆଗରେ ରହିଛି ରାଜ୍ୟର 3 ପ୍ରମୁଖ ଦଳ ବିଜେପିର 'ମୋଦି ଗ୍ୟାରେଣ୍ଟି', ବିଜେଡିର 'ନଂ-1 ଓଡ଼ିଶା' ଫର୍ମୁଲା ଓ କଂଗ୍ରେସ ନେତା ରାହୁଲ ଗାନ୍ଧୀଙ୍କ '5 ଗ୍ୟାରେଣ୍ଟି' ଭଳି ପ୍ରତିଶୃତି । ଏହି ମୁଦ୍ଦା ନେଇ ଭୋଟରଙ୍କ ପାଖରେ ପହଞ୍ଚିବାକୁ ଗତ ମାସେ ଧରି ନିର୍ବାଚନୀ ମୈଦାନରେ କସରତ କରିଥିଲେ ନେତାଏ । ଏବେ ସରିଛି ପ୍ରଚାର, ଆସିଛି ପରୀକ୍ଷାର ଘଡ଼ି ।
ସୋମବାର ଦେଶରେ 2024 ଲୋକସଭା ନିର୍ବାଚନର ଚତୁର୍ଥ ପର୍ଯ୍ୟାୟ ମତଦାନ ଅନୁଷ୍ଠିତ ହେବାକୁ ଥିବା ବେଳେ ରାଜ୍ୟରେ ରହିଛି ପ୍ରଥମ ପର୍ଯ୍ୟାୟ ମତଦାନ । ପ୍ରଥମ ପର୍ଯ୍ୟାୟରେ କଳାହାଣ୍ଡି, ନବରଙ୍ଗପୁର, ବ୍ରହ୍ମପୁର ଓ କୋରାପୁଟ 4ଟି ସଂସଦୀୟ ନିର୍ବାଚନ କ୍ଷେତ୍ର ଓ ଏହାର ଅଧୀନରେ ଥିବା 28ଟି ବିଧାନସଭା ନିର୍ବାଚନ ମଣ୍ଡଳୀ ଲାଗି ଭୋଟ ଦେବେ ଭୋଟର । ପ୍ରଥମ ପର୍ଯ୍ୟାୟରେ ମୋଟ ୬୨,୮୭,୨୨୨ ଜଣ ମତଦାତା ମତାଧିକାର ସାବ୍ୟସ୍ତ କରିବାକୁ ଯାଉଛନ୍ତି । ନିର୍ବାଚନକୁ ସ୍ବଚ୍ଛ, ଅବାଧ ଓ ଶୃଙ୍ଖଳିତ ଭାବେ ଶେଷ କରିବା ଲାଗି ସମସ୍ତ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି ବୋଲି ଆଜି ସୂଚନା ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳ ।
| ପ୍ରଥମ ପର୍ଯ୍ୟାୟରେ ମତଦାନକୁ ଯାଇଥିବା 4 ସଂସଦୀୟ କ୍ଷେତ୍ର |
| ଲୋକସଭା ଆସନ | ସଂସଦୀୟ କ୍ଷେତ୍ରରେ ଆସୁଥିବା ବିଧାନସଭା ଆସନ |
| କଳାହାଣ୍ଡି | ନୂଆପଡ଼ା, ଖଡ଼ିଆଳ, ଲାଞ୍ଜିଗଡ଼, ଜୁନାଗଡ଼, ଧର୍ମଗଡ଼, ଭବାନୀପାଟଣା, ନର୍ଲା |
| ନବରଙ୍ଗପୁର | ଉମରକୋଟ, ଝରିଗାଁ, ନବରଙ୍ଗପୁର, ଡାବୁଗାଁ, କୋଟପାଡ଼, ମାଲକାନଗିରି, ଚିତ୍ରକୋଣ୍ଡା |
| ବ୍ରହ୍ମପୁର | ଛତ୍ରପୁର, ଗୋପାଳପୁର, ବ୍ରହ୍ମପୁର, ଦିଗପହଣ୍ଡି, ଚିକିଟି, ମୋହନା, ପାରଳାଖେମୁଣ୍ଡି |
| କୋରାପୁଟ | ଗୁଣପୁର, ବିଷମକଟକ, ରାୟଗଡ଼ା, ଲକ୍ଷ୍ମୀପୁର, ଜୟପୁର, କୋରାପୁଟ, ପଟ୍ଟାଙ୍ଗୀ |
4 ଲୋକସଭା ଆସନରେ 37 ପ୍ରାର୍ଥୀ:- କଳାହାଣ୍ଡି, ନବରଙ୍ଗପୁର, ବ୍ରହ୍ମପୁର ଓ କୋରାପୁଟ ପାଇଁ ମୋଟ ୩୭ ଜଣ ପ୍ରାର୍ଥୀ ମୈଦାନରେ ଅଛନ୍ତି । କଳାହାଣ୍ଡି ସଂସଦୀୟ କ୍ଷେତ୍ର ପାଇଁ ୧୧ ଜଣ ପ୍ରାର୍ଥୀ ରହିଛନ୍ତି । ସେମାନଙ୍କ ମଧ୍ୟରୁ ପୁରୁଷ ପ୍ରାର୍ଥୀ ୯ ଓ ମହିଳା ପ୍ରାର୍ଥୀ ୨ ଜଣ । ନବରଙ୍ଗପୁର ସଂସଦୀୟ କ୍ଷେତ୍ର ପାଇଁ ୪ ଜଣ ପ୍ରାର୍ଥୀ ରହିଛନ୍ତି । ସମସ୍ତ ପୁରୁଷ ପ୍ରାର୍ଥୀ ଥିବା ବେଳେ କେହି ମହିଳା ପ୍ରାର୍ଥୀ ନାହାନ୍ତି । ବ୍ରହ୍ମପୁର ସଂସଦୀୟ କ୍ଷେତ୍ର ପାଇଁ ୧୧ ଜଣ ପ୍ରାର୍ଥୀ ରହିଛନ୍ତି । ସେମାନଙ୍କ ମଧ୍ୟରୁ ପୁରୁଷ ପ୍ରାର୍ଥୀ ୧୦ ଓ ମହିଳା ପ୍ରାର୍ଥୀ । ସେହିପରି କୋରାପୁଟ ସଂସଦୀୟ କ୍ଷେତ୍ର ପାଇଁ ୧୧ ଜଣ ପ୍ରାର୍ଥୀ ଚୂଡାନ୍ତ ହୋଇଛନ୍ତି । ପୁରୁଷ ପ୍ରାର୍ଥୀ ୭ ଜଣ ଥିବାବେଳେ ମହିଳା ପ୍ରାର୍ଥୀ୪ ପ୍ରତିଦ୍ବନ୍ଦ୍ବିତା କରିବେ । ଉପରୋକ୍ତ ୪ ସଂସଦୀୟ କ୍ଷେତ୍ର ପାଇଁ ପ୍ରତିଦ୍ବନ୍ଦ୍ବିତାରେ ଅବତୀର୍ଣ୍ଣ ହୋଇଥିବା ମୋଟ ୩୭ ଜଣ ପ୍ରାର୍ଥୀଙ୍କ ମଧ୍ୟରୁ ୩୦ ଜଣ ପୁରୁଷ ପ୍ରାର୍ଥୀ ହୋଇଥିବାବେଳେ ୭ ଜଣ ମହିଳା ପ୍ରାର୍ଥୀ ଅଟନ୍ତି ।
ସବୁଠୁ ବଡ଼ ନିର୍ବାଚନ ମଣ୍ଡଳୀ:- ପରିସୀମା ଭାବରେ ରାଜ୍ୟରେ ପ୍ରଥମ ପର୍ଯ୍ୟାୟ ଓ ଦେଶରେ ଚତୁର୍ଥ ପର୍ଯ୍ୟାୟ ମତଦାନକୁ ଯାଉଥିବା ଓଡ଼ିଶାର 4 ସଂସଦୀୟ କ୍ଷେତ୍ର ମଧ୍ୟରେ ବ୍ରହ୍ମପୁର ସବୁଠାରୁ ସାନ ଓ କୋରାପୁଟ ସବୁଠାରୁ ବଡ଼ ସଂସଦୀୟ କ୍ଷେତ୍ର । ସେହିପରି ବିଧାନସଭା କ୍ଷେତ୍ରମାନଙ୍କ ମଧ୍ୟରେ ବ୍ରହ୍ମପୁର ସବୁଠାରୁ ସାନ ଓ ମାନକାନଗିରି ସବୁଠାରୁ ବଡ଼ କ୍ଷେତ୍ର ।
ଏହା ବି ପଢନ୍ତୁ- ସୋମବାର ପଡିବ ଭୋଟ: 280 ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ 62.87 ଲକ୍ଷ ଭୋଟର
ସୂଚନା ଥାଉ କି ଭାରତୀୟ ନିର୍ବାଚନ ଆୟୋଗଙ୍କ ନିୟମ ଅନୁସାରେ ମତଦାନର 48 ଘଣ୍ଟା ପୂର୍ବରୁ ପ୍ରଚାର କାର୍ଯ୍ୟ ଶେଷ କରାଯାଏ । ସୋମବାର ଭୋଟିଂ ଥିବାରୁ ଆଜି ରାଜ୍ୟ ଓ ଦେଶରେ ସରିଛି ପ୍ରଚାର । ତେବେ ଓଡ଼ିଶା କଥା କହିଲେ, ଆଜି ପ୍ରଧାନମନ୍ତ୍ରୀ ମୋଦି ମାରାଥନ ପ୍ରଚାର କରିଥିଲେ । ଶୁକ୍ରବାର ସନ୍ଧ୍ୟାରେ ଭୁବନେଶ୍ବରରେ ମେଗା ରୋଡ ସୋ' କରିବା ପରେ ଆଜି ପ୍ରଥମେ ଫୁଲବାଣୀ, ବଲାଙ୍ଗୀର ଓ ଶେଷରେ ବରଗଡ଼ରେ ଜନସଭାରେ ସିଧାସଳଖ ବିଜେଡି ସରକାର ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଟାର୍ଗେଟ କରିଥିଲେ । ସେପଟେ ଆଜି ସୁନ୍ଦରଗଡ଼ ଜିଲ୍ଲା ରଘୁନାଥପାଲ୍ଲୀ ନିର୍ବାଚନ ମଣ୍ଡଳୀରେ ଭିକେ ପାଣ୍ଡିଆନଙ୍କ ଜୋରଦାର ପ୍ରଚାର ଦେଖିବାକୁ ମିଳିଥିଲା । ଏହି ରାଲିରେ ସେ କେନ୍ଦ୍ରମନ୍ତ୍ରୀ ତଥା ସମ୍ବଲପୁର ବିଜେପି ସାଂସଦ ପ୍ରାର୍ଥୀ ଧର୍ମେନ୍ଦ୍ର ପ୍ରଧାନଙ୍କୁ ସିଧାସଳଖ ଟାର୍ଟେଗ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
