ବୌଦ୍ଧ: ଅନ୍ୟ ଜାତିରେ ବିବାହ କରିଥିବାରୁ ଯୁବତୀଙ୍କ ପିତାଙ୍କୁ ମୃତ୍ୟୁ ପରେ ମିଳିଲାନି ଚାରି କାନ୍ଧ । ନିଜ ଜାତି ଲୋକ ମୃତଦେହ ଛୁଇଁବାକୁ ମନା କରିବାରୁ ମୃତଦେହକୁ ଏକ ଟ୍ରଲିରେ ବୋହି ନେଇ ଦାହ କରାଯାଇଛି । ଏଭଳି ଅଭାବନୀୟ ଘଟଣା କୌଣସି ଉପାନ୍ତ ଅଞ୍ଚଳରେ ନୁହେଁ, ଖାସ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଥିବା ଆଦିବାସୀ ବସ୍ତିରେ ଘଟିଛି ।
ସାମାଜିକ କୁସଂସ୍କାରର ଆଉ ଏକ ନଗ୍ନ ଚିତ୍ର ଆମ ବ୍ୟବସ୍ଥା ଉପରକୁ ପୁଣିଥରେ ଅଙ୍ଗୁଳି ଉଠାଇଛି । ଜୀବିତ ଅବସ୍ଥାରେ ଏଭଳି ଅନେକ ଘଟଣା ଘଟୁଥିବାବେଳେ ମୃତ୍ୟୁ ପରେ ମଧ୍ୟ ସାମାଜିକ ବିଧି ବ୍ୟବସ୍ଥା ଯୋଗୁଁ କିଭଳି ଗୋଟିଏ ପରିବାର ଉପରେ ଚଡ଼କ ପଡ଼ୁଛି, ତାର ଏକ ଉଦାହରଣ ଖାସ ବୌଦ୍ଧ ଜିଲ୍ଲାର ସଦରମହକୁମା ଠାରେ ଦେଖିବାକୁ ମିଳିଛି । ବୌଦ୍ଧ ଜିଲ୍ଲା ସଦର ତଥା ଜିଲ୍ଲାପାଳଙ୍କ କାର୍ଯ୍ୟାଳୟ ନିକଟରେ ରହିଛି ଆଦିବାସୀ ବସ୍ତି ବାପୁଜୀ ନଗର । ଏଠାରେ ବସବାସ କରୁଥିବା ନୀଳାମ୍ବର ମେହେରଙ୍କର ଗତ ରାତିରେ ମୃତ୍ୟୁ ହୋଇଥିଲା । ନୀଳାମ୍ବରଙ୍କ ମୃତ୍ୟୁ ଖବର ପାଇ ତାଙ୍କ ଝିଅ ସୁନି ପିତାଙ୍କ ଅନ୍ତିମ ସଂସ୍କାର ପାଇଁ ନିଜ ଜାତି ଲୋକଙ୍କ ସହାୟତା ଲୋଡ଼ିଥିଲେ । କିନ୍ତୁ ସୁନି ଅନ୍ୟ ଜାତିରେ ବିବାହ କରିଥିବାରୁ ସୁନିଙ୍କୁ ପ୍ରଥମେ ଜାତିକୁ ଫେରି ନିୟମ ପ୍ରକାରେ ଭୋଜି ଦେବାକୁ ଦାବି କରାଯାଇଥିବା ସୁନି ଅଭିଯୋଗ କରିଛନ୍ତି ।
ତେବେ ଅତ୍ୟନ୍ତ ଗରିବ ହୋଇଥିବାରୁ ସୁନି ତଥାପି ଅଳ୍ପ ଅର୍ଥର ବ୍ୟବସ୍ଥା ପାଇଁ ଆକୁଳ ନିବେଦନ ଜାତି ଲୋକଙ୍କ ଆଗରେ କରିଥିଲେ ମଧ୍ୟ କେହି ତାଙ୍କ ଦୁଃଖ ଶୁଣିନଥିଲେ । ଏପରିକି ଶେଷରେ ସୁନି ବୌଦ୍ଧ ଥାନାରେ ଏ ସମ୍ପର୍କରେ ଅଭିଯୋଗ କରିଥିଲେ । ଏହାପରେ ମଧ୍ୟ କୌଣସି ସୁଫଳ ନମିଳିବାରୁ ଶେଷରେ ପରିବାରର ଦୁଇଜଣଙ୍କ ସହାୟତାରେ ଏକ ଟ୍ରଲିରେ ଶବକୁ ବୋହି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖ ରାସ୍ତା ଦେଇ ମହାନଦୀ ପଠାରେ ଦାହ କରିଥିଲେ । ତେବେ ଅନ୍ୟ ଜାତିରେ ବିବାହ କାରଣରୁ ଜଣେ ମୃତକଙ୍କୁ ଚାରି କାନ୍ଧ ନମିଳିବା ଘଟଣା, ତାହା ପୁଣି ସହରାଞ୍ଚଳ ମଧ୍ୟରେ ନିଶ୍ଚିତ ଆମ ସାମାଜିକ କୁସଂସ୍କାର ତଥା ବ୍ୟବସ୍ଥା ଉପରକୁ ଅଙ୍ଗୁଳି ଉଠାଇଛି ।
ଇଟିଭି ଭାରତ, ବୌଦ୍ଧ
