ନିଆଳି: ଆଜି ହେଉଛି ମହା ବିଷୁବ ସଂକ୍ରାନ୍ତି ବା ପଣା ସଂକ୍ରାନ୍ତି । ଆମ ଓଡ଼ିଶାରେ ବାର ମାସରେ ତେର ପରବ ପାଳନ କରାଯାଏ । ଓଡିଆ ଘରେ ପ୍ରତ୍ୟେକ ପର୍ବର ମହତ୍ତ୍ବ ରହିଛି । ଯାହାକୁ ଅତି ଆନନ୍ଦ ଏବଂ ଉଲ୍ଲାସର ସହିତ ପାଳନ ମଧ୍ୟ କରାଯାଏ । ସେଥିମଧ୍ୟରେ ଏକ ପୁରାତନ ପର୍ବ ହେଉଛି ଝାମୁଯାତ୍ରା । କୁହାଯାଏ ବିଭିନ୍ନ ପର୍ବ ମଧ୍ୟରୁ ଝାମୁଯାତ୍ରା ନୀତି ନିୟମ ଭିନ୍ନ । ଏହି ପର୍ବର ମୁଖ୍ୟ ଆକର୍ଷଣ ହେଉଛି ମାସ ଶେଷରେ ନିଆଁରେ ଚାଲିବା ପରମ୍ପରା । ତେବେ ଆସନ୍ତୁ ଜାଣିବା କଣ ରହିଛି ଏହି ପର୍ବର ମହତ୍ତ୍ବ ଏବଂ କିପରି ନିଆଳିରେ ଏହା ପାଳନ କରାଯାଇଛି ।
ମା' କାଳିସୀଙ୍କ ଏହି ପବିତ୍ର ଯାତ୍ରାକୁ ମାନସିକ ଧାରୀମାନେ ନିଷ୍ଠା ଓ ଏକାଗ୍ରତା ସହ ପାଳନ କରିଥାନ୍ତି । ଏହି ଯାତ୍ରା ବର୍ଷର ଚୈତ୍ରମାସରେ ପାଳନ କରାଯାଇ ବିଷୁବ ସଂକ୍ରାନ୍ତି ବା ପଣା ସଂକ୍ରାନ୍ତି ଦିନ ଶେଷ ହୋଇଥାଏ । ମାସକ ସାରା କାଳିସୀ ଏବଂ ପାଟୁଆମାନେ ପରିବାରଙ୍କଠାରୁ ଅଲଗା ରହିବା ସହିତ କେବଳ ଶୁଦ୍ଧ ନିରାମିଷ ଓ ପଣାପାଣି ଆହାରରେ ରହିବାକୁ ପଡ଼ିଥାଏ । ଆଉ ପଣା ସଂକ୍ରାନ୍ତି ଦିନ ବିଭିନ୍ନ ଶକ୍ତିପୀଠ ଓ ମା'ଙ୍କ ପୀଠରେ ଅନୁଷ୍ଠିତ ହୋଇଥାଏ ଏହି ଝାମୁଯାତ୍ରା । ମୁଣ୍ଡରେ ସିନ୍ଦୂର, ହାତରେ ବେତ, ଦେହରେ କଳା ଓ ହଳଦିଆ ଲୁଗା ପିନ୍ଧି ପୋଖରୀ ସ୍ନାନ ପରେ ମା'ଙ୍କ ଆଜ୍ଞା ପାଇ ରଡ ନିଆଁରେ କାଳିସୀ ନିଜକୁ ସର୍ମପିତ କରିଥାଏ । ଅଙ୍ଗାର, କତା, କାଠ ଏବଂ ଝୁଣାର ରଡ ନିଆଁରେ କାଳିସୀ ନିଆଁରେ ପଶିଲା ପରେ, ମାନସିକ ଧାରୀ ପାଟୁଆମାନେ ନିଆଁରେ ପଶିଥାନ୍ତି ।
ଏହା ମଧ୍ୟ ପଢ଼ନ୍ତୁ.... ମେରୁ ପର୍ବ: କଣ୍ଟାରେ ଗଡ଼ିଲେ ନିଆଁରେ ଚାଲିଲେ ଉପାସକ - Danda Yatra
ଅନେକ ଭକ୍ତ ଓ ଶ୍ରଦ୍ଧାଳୁମାନେ ମାନସିକ ପ୍ରାପ୍ତି ଉଦ୍ଦେଶ୍ୟରେ ନିଜକୁ ମାସକ ସାରା ଶାନ୍ତ ଓ ସ୍ବଭାବ ରଖିବା ସହିତ ମାସ ଶେଷରେ ନିଆଁରେ ଚାଲିଥାନ୍ତି । କଟକ ଜିଲ୍ଲା ନିଆଳି, କଣ୍ଟାପଡ଼ା, ବାରଙ୍ଗ, କଟକ ସଦର ଏବଂ ଖୋର୍ଦ୍ଧା ଜିଲ୍ଲାର ବାଲିଅନ୍ତା ଓ ବାଲିପାଟଣା ଆଦି ଅଞ୍ଚଳରେ ଆଜି ପାଳିତ ହୋଇଯାଇଛି ଏହି ଝାମୁଯାତ୍ରା । ତେବେ କାକଟପୁର ମା' ମଙ୍ଗଳାଙ୍କଠାରୁ ଆରମ୍ଭ କରି ଗାଁ ଗଣ୍ଡାରେ ପୂଜା ପାଉଥିବା ମା'ଙ୍କ ପୀଠରେ ଝାମୁଯାତ୍ରାର ସ୍ୱତନ୍ତ୍ରତା ରହିଛି । ମା' ମଙ୍ଗଳାଙ୍କ ପୀଠରେ ପାଞ୍ଚ ମଙ୍ଗଳବାର ଦିନ ଝାମୁଯାତ୍ରା ଅନୁଷ୍ଠିତ ହେବାର ପରମ୍ପରା ରହିଥିବା ବେଳେ ଅନ୍ୟ ଶକ୍ତି ପୀଠ ଏବଂ ତନ୍ତ୍ର ପୀଠରେ ପଣା ସଂକ୍ରାନ୍ତି ଦିନ ଝାମୁଯାତ୍ରା ଅନୁଷ୍ଠିତ ହୋଇଥାଏ । ଅନ୍ୟପଟେ ଆଜି ପଣା ସଂକ୍ରାନ୍ତି ଯାହା ପ୍ରତ୍ୟେକ ଓଡ଼ିଆଙ୍କ ପାଇଁ ଏକ ବଡ ପର୍ବ । ଏହିଦିନ ଠାରୁ ଓଡ଼ିଆଙ୍କ ନୂତନ ବର୍ଷ ଆରମ୍ଭ ହୋଇଥାଏ ।
ଇଟିଭି ଭାରତ, ନିଆଳି
