ଭୁବନେଶ୍ବର: ଆସନ୍ତା 13 ତାରିଖରେ ଓଡ଼ିଶାରେ ପ୍ରଥମ ପର୍ଯ୍ୟାୟ ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ସେଥିପାଇଁ ଦକ୍ଷିଣ ଓଡ଼ିଶାର 28ଟି ବିଧାନସଭା ଏବଂ 4ଟି ସଂସଦୀୟ କ୍ଷେତ୍ରରେ ଜମୁଛି ପ୍ରଚାର । ଫୁଲ୍ ଜୋସରେ ଲାଗି ପଡିଛନ୍ତି କର୍ମୀ ଓ ନେତା । କିଏ କରିବ ବାଜିମାତ ଆଉ କିଏ ହେବ ରେସରୁ ଆଉଟ୍ ତାକୁ ନେଇ ମଧ୍ୟ ପ୍ରଚାର ଜୋରଦାର ଚାଲିଛି । ଆଦିବାସୀଙ୍କ ଗଡ଼ କୁହାଯାଉଥିବା କୋରାପୁଟ, ନବରଙ୍ଗପୁର, କଳାହାଣ୍ଡି ଏବଂ ଉପକୂଳ ଓଡିଶାର ସର୍ବବୃହତ ଲୋକସଭା ମଣ୍ଡଳୀ ଗଞ୍ଜାମରେ ପ୍ରାର୍ଥୀ ମାନଙ୍କର ଭାଗ୍ୟ ପରୀକ୍ଷା ହେବ । ତାକୁ ନେଇ ଆରମ୍ଭ ହୋଇଛି ଅଙ୍କ କଷା ।
ପ୍ରଥମ ପର୍ଯ୍ୟାୟରେ କଳାହାଣ୍ଡି, କୋରାପୁଟ, ନବରଙ୍ଗପୁର ଏବଂ ଗଞ୍ଜାମ ସଂସଦୀୟ କ୍ଷେତ୍ରର 28ଟି ବିଧାନସଭା କ୍ଷେତ୍ର ପାଇଁ ହେବ ନିର୍ବାଚନ । 2019ରେ କଂଗ୍ରେସର ଗଡ଼ କୁହାଯାଉଥିବା ଅଭିଭକ୍ତ କୋରାପୁଟ ଜିଲ୍ଲାରେ ଜୟପୁରରୁ ଏବେ କଂଗ୍ରେସର ଜଣେ ମାତ୍ର ବିଧାୟକ । ଦକ୍ଷିଣ ଓଡ଼ିଶାରେ ବିଜେଡି ସବୁଠୁ ଅଧିକ ଆସନ ପାଇ ଆଗରେ ରହିଛି । ଗତକାଲି ବିଜେଡି ନେତା ଭିକେ ପାଣ୍ଡିଆନ ଦକ୍ଷିଣ ଓଡ଼ିଶାରେ ବିଜେଡି ସହ କଂଗ୍ରେସର ଫାଇଟ୍ ହେବ କହିବା ପରେ, କଂଗ୍ରେସ କହିଛି ଯେ, ଦକ୍ଷିଣ ଓଡ଼ିଶାରେ ବିଜେଡି ବିଜେପି ନୁହେଁ ବରଂ କଂଗ୍ରେସକୁ ଲୋକେ ଜୟଯୁକ୍ତ କରାଇବେ ।
କଂଗ୍ରେସ ମିଡିଆ ସେଲ୍ ଅଧ୍ୟକ୍ଷ ବିଶ୍ୱ ରଞ୍ଜନ ମହାନ୍ତି କହିଛନ୍ତି," କୋରାପୁଟ ,ନବରଙ୍ଗପୁର ,କଳାହାଣ୍ଡି ଏବଂ ଗଞ୍ଜାମରେ କଂଗ୍ରେସ ଜିତିବ । ଆଦିବାସୀମାନଙ୍କ ସମସ୍ୟା ପାଇଁ କଂଗ୍ରେସ ଲଢ଼ିଛି । ରାହୁଲ ଗାନ୍ଧୀ ଆଦିବାସୀଙ୍କ ଅଧିକାର ପାଇଁ ଛିଡା ହୋଇଛନ୍ତି । ସେଥିପାଇଁ ଆଦିବାସୀଙ୍କ ଭୋଟ କଂଗ୍ରେସକୁ ଆସିବ । କଂଗ୍ରେସର ପ୍ରଚାର ତୃଣମୂଳ ସ୍ତରରୁ ଆରମ୍ଭ ହୋଇଛି । ଆଦିବାସୀଙ୍କ ପାଇଁ କଂଗ୍ରେସ ସବୁବେଳେ ଛିଡା ହୋଇଛି । ଏଥର କଂଗ୍ରେସକୁ ଜନସାଧାରଣ ଭୋଟ ଦେବେ ।"
2019 ନିର୍ବାଚନରେ କୋରାପୁଟରୁ କଂଗ୍ରେସ ସାଂସଦ ପ୍ରାର୍ଥୀ ଖୁବ୍ କମ ଭୋଟ ବ୍ୟବଧାନରେ ଜିତିଥିଲେ, ସେହିପରି ଦକ୍ଷିଣ ଓଡିଶାରେ ବିଜେଡି ଗଞ୍ଜାମ ଏବଂ ନବରଙ୍ଗପୁରରେ ଜିତିଥିବା ବେଳେ କଳାହାଣ୍ଡିରେ ବିଜେପିର ବସନ୍ତ ପଣ୍ଡା ଜିତିଥିଲେ । ଚଳିତ ନିର୍ବାଚନରେ କୋରାପୁଟରେ ବିଜେଡି ସହିତ କଂଗ୍ରେସର କଡା ଟକ୍କର ହେଉଥିବା ବେଳେ ଗଞ୍ଜାମରେ ବିଜେପିର ପ୍ରଦୀପ ପାଣିଗ୍ରାହୀଙ୍କ ସହ ବିଜେଡିର ଭୃଗୁ ବକ୍ସିପାତ୍ରଙ୍କ ବିଗ ଫାଇଟ୍ ହେଉଛି । ସେହିପରି କଳାହାଣ୍ଡିରେ ବିଜେଡ଼ି ସହ ବିଜେପିର କଡା ମୁକାବିଲା ହେଉଛି । ସେପଟେ ନବରଙ୍ଗପୁରରେ କଂଗ୍ରେସର ଭୁଜବଳ ମାଝୀଙ୍କ ସହ ବିଜେଡିର ପ୍ରଦୀପ ମାଝୀଙ୍କ ଭିତରେ ଲଢେଇ ହେଉଛି ।
ନିର୍ବାଚନ ଯେତିକି ପାଖେଇ ଆସୁଛି ପ୍ରାର୍ଥୀ ମାନଙ୍କ ଭିତରେ ସେତିକି ଉତ୍ସାହ ବୃଦ୍ଧି ପାଉଛି । 13 ତାରିଖରେ ପ୍ରଥମ ପର୍ଯ୍ୟାୟ ନିର୍ବାଚନ ରହିଛି । ଭୋଟର ଏହି ମହାକୁମ୍ଭରେ କିଏ ବାଜିମାତ କରୁଛି ଏବଂ କେଉଁ ଦଳ ସବୁଠୁ ଅଧିକ ସିଟ୍ ପାଉଛି ନିର୍ବାଚନ ପରେ ହିଁ ସ୍ପଷ୍ଟ ହେବ ।
ଇଟିଭି ଭାରତ,ଭୁବନେଶ୍ବର
