ଭୁବନେଶ୍ବର: ଓଡିଶା ପହଞ୍ଚିଛନ୍ତି ଓଡିଶା କଂଗ୍ରେସ ପ୍ରଭାରୀ ଅଜୟ କୁମାର । ଓଡିଶାରେ ପାଦ ଦେଉ ଦେଉ ପୁଣି ଶାସକ ଦଳକୁ ଘେରିଛନ୍ତି । ଅଜୟ କୁମାର କହିଛନ୍ତି ଯେ କଂଗ୍ରେସ ରାଜ୍ୟରେ ଅନୈତିକ ଭାବେ ଏକାଠି ରହୁଥିବା ବିଜେଡି ଓ ବିଜେପିକୁ ନିକଟରେ ବିବାହ କରେଇଛି । ରାଜ୍ୟସଭା ସିଟ ପାଇଁ ବିଜେପିର ପ୍ରାର୍ଥୀ ତଥା କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବଙ୍କୁ ବିଜେଡିର ଖୋଲା ସମର୍ଥନ ପରେ ଉଭୟଙ୍କ ଭିତିରିଆ ସମ୍ପର୍କ ଉପରେ ମୋହର ଲାଗି ସାରିଛି । ସେହିପରି ବିଜେଡି ଏକ ରିଜିଓନାଲ ପାର୍ଟି ହୋଇ ସୁଦ୍ଧା ସର୍ବାଧିକ ଅର୍ଥ ଚାନ୍ଦା ଆକାରରେ ପାଇଛି । ଏସବୁ ଇଲେକ୍ଟ୍ରାଲ ବଣ୍ଡ ଜରିଆରେ ଆସିଛି । ଏକ ଆଞ୍ଚଳିକ ଦଳ ଭାବେ ବିଜେଡି ସର୍ବାଧିକ 380 କୋଟି ଟଙ୍କାର ଇଲେକ୍ଟ୍ରାଲ ବଣ୍ଡ ନେଇଛି ।
ଏହା ମଧ୍ୟ ପଢନ୍ତୁ... କେନ୍ଦ୍ରମନ୍ତ୍ରୀ ରାଜନାଥଙ୍କ ଆହ୍ବାନ, 'ଓଡ଼ିଶାରେ ଦରକାର ଡବଲ ଇଞ୍ଜିନ ସରକାର'
ଏଥିରେ ଖଣି ମାଫିଆ, ତାମିଲନାଡୁର କମ୍ପାନୀର ଟଙ୍କା ସାମିଲ ଅଛି । ତେବେ ଆସନ୍ତା ମାର୍ଚ୍ଚ ମାସ ୫ ତାରିଖରେ ଏ ସବୁର ଗୁମର ଫିଟିବ । ଇଲେକ୍ଟ୍ରାଲ ବଣ୍ଡ ଖୋଲିଲା ପରେ ଖୋଲିବ ରାଜ୍ୟ ସରକାରଙ୍କ ଅସଲ ମୁଖା ପଦାକୁ ଆସିବ । ବିଜେଡି କିଭଳି ଭାବେ ଓଡିଶାକୁ ବିକ୍ରି କରି ଖାଇଛନ୍ତି ତାହା ଜଣାପଡିବ । ଆଉ ଏହାର ଜବାବ ସ୍ବୟଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୫ଟି ଅଧ୍ୟକ୍ଷ ଭିକେ ପାଣ୍ଡିଆନଙ୍କୁ ଦେବାକୁ ପଡିବ । ଏହା ଓଡିଶାର ଜନସାଧାରଣଙ୍କ ପାଇଁ ଏକ ବଡ ପ୍ରଶ୍ନ । ଦୀର୍ଘ 23 ବର୍ଷ ଧରି ଓଡିଶାକୁ ନବୀନ ପଟ୍ଟନାୟକ ଓ ପାଣ୍ଡିଆନ ସହ ଆଇପିଏସ ଆଇଏଏସ ମିଶି ଗରିବ କରିଛନ୍ତି । ଆସନ୍ତା ୨୬ ତାରିଖରେ କଂଗ୍ରେସ ପକ୍ଷରୁ ସେକ୍ରେଟାରିଏଟ ଘେରାଉ କରାଯିବ । ନିକଟରେ ମହିଳା କଂଗ୍ରେସ ପକ୍ଷରୁ ନବୀନ ନିବାସ ଘେରାଓ କରାଯାଇଥିଲା ।
ଓଡିଶାକୁ ଦେଶର ଗରିବତମ ପ୍ରଦେଶ କରି ରଖିଛି ବିଜେଡି । ନା ରାଜ୍ୟରେ ସ୍ବାସ୍ଥ୍ୟ ସେବାରେ ବିକାଶ ହୋଇଛି ନା ଶିକ୍ଷା କ୍ଷେତ୍ରରେ ସ୍କୁଲ କଲେଜର ବିକାଶ ହୋଇଛି । ୧ ଟଙ୍କିଆ ଚାଉଳ ଦେଉ ଓଡିଶାର ନିରୀହ ସରଳ ଲୋକଙ୍କୁ ଭକୁଆ ବନାଉଛି ବିଜେଡି । ଓଡିଆ ଯୁବକ ଦାଦନ ଖଟିବାକୁ ଯାଉଥିବା ବେଳେ ବାହାର ରାଜ୍ୟର ଲୋକ ବିଭିନ୍ନ ଠିକା ନେଉଛନ୍ତି । ବର୍ତ୍ତମାନ ବିଜେଡ଼ି ବିଜେପି ବାହାଘର ପରେ ସନ୍ତାନ ବି ଜନ୍ମ ହୋଇ ସାରିଛି । ସେ ହେଲେ ଅଶ୍ବିନୀ ବୈଷ୍ଣବ ବୋଲି ଅଜୟ କୁମାର କହିଛନ୍ତି ।
ଇଟିଭି ଭାରତ, ଭୁବନେଶ୍ବର
