ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନଙ୍କୁ ଦେବାଶିଷଙ୍କ କଡା ସମାଲୋଚନାରେ ଜବାବ ଦେଲା ବିଜେଡି । ''ଟିକଟ ଖଣ୍ଡିଏ ପାଇବା ପାଇଁ ବ୍ୟାକୁଳ ଅଛନ୍ତି ବିଜେଡିରୁ ବିଜେପି ଯାଇଥିବା ଦେବାଶିଷ ନାୟକ । ଟିକଟ ପାଇଁ ବିକଳ ଅବସ୍ଥାରେ ସ୍କ୍ରିପ୍ଟ ପଢୁଛନ୍ତି । ଯଦି ବିଜେପିରୁ ଟିକଟ ନପାଇଲେ ତାହେଲେ ସେ ଧର୍ମେନ୍ଦ୍ରଙ୍କୁ ଗାଳି ଦେବାକୁ ପଛାଇବେ ନାହିଁ । ସବୁବେଳେ ନିଜ ସ୍ବାର୍ଥକୁ ଜଗୁଥିବା ଦେବାଶିଷ ନାୟକଙ୍କ ସାର୍ଟିଫିକେଟର ଆବଶ୍ୟକତା ନାହିଁ'' ବୋଲି କହିଛନ୍ତି ବିଜେଡି ମୁଖପାତ୍ର ତୁମ୍ବନାଥ ପଣ୍ଡା । ଶାସନ ଭାର ସଠିକ ଭାବେ ସମ୍ଭାଳି ପାରୁନଥିବା ନବୀନ ବାବୁ ମୁଖ୍ୟମନ୍ତ୍ରୀ ପଦରୁ ଅବସର ନେଇଯାଆନ୍ତୁ କହି ବିଜେଡିକୁ ଟାର୍ଗେଟ କରିଥିଲେ ନିକଟରେ ବିଜେପି ସାମିଲ ହୋଇଥିବା ଦେବାଶିଷ ନାୟକ । ଏହାପରେ ଦେବାଶିଷଙ୍କୁ କାଉଣ୍ଟର କରିଛି ବିଜେଡି ।
ବିଜେଡି ମୁଖପାତ୍ର ତୁମ୍ବନାଥ ପଣ୍ଡା କହିଛନ୍ତି ଯେ, ବିଜେପିରୁ ଟିକଟ ଖଣ୍ଡିଏ ପାଇବା ପାଇଁ ଦେବାଶିଷ ନାୟକ ବଡ ବିକଳ ଅବସ୍ଥାରେ ଅଛନ୍ତି । ଯାହା ଲେଖିକି ଦିଆଗଲା, ସେତିକି ଆସି ଗଣମାଧ୍ୟମ ସାମ୍ନାରେ ପଢ଼ିଦେଇ ଚାଲିଗଲେ । ଯଦି କାଲି ଦେବାଶିଷଙ୍କୁ ଓଡ଼ିଶା ବିଜେପି ଟିକଟ ନ ଦିଏ ତେବେ ତାଙ୍କୁ ସ୍କ୍ରିପ୍ଟ ଲେଖି ଦେଇଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଗାଳି ଦେବାକୁ ମଧ୍ୟ ସେ ପଛାଇବେ ନାହିଁ । ସେ ଆହୁରି ମଧ୍ୟ କହିଛନ୍ତି ଯେ, ଦେବାଶିଷ ନାୟକ ନିଜ ରାଜନୈତିକ କ୍ୟାରିୟରରେ କେବେ ମଧ୍ୟ ସାଧାରଣ ଲୋକଙ୍କ ପାଇଁ କାର୍ଯ୍ୟ କରିନାହାନ୍ତି । ନିଜ ସ୍ୱାର୍ଥକୁ ସବୁବେଳେ ପ୍ରାଧାନ୍ୟ ଦେଉଥିବା ଦେବାଶିଷଙ୍କର ସାର୍ଟିଫିକେଟର କୌଣସି ଆବଶ୍ୟକତା ନାହିଁ । ସାଢେ ୪ କୋଟି ଓଡ଼ିଶାବାସୀ ଜାଣିଛନ୍ତି କିଏ କ'ଣ ।
ସୂଚନା ଅନୁସାରେ, ଗତକାଲି (ବୁଧବାର) ଅପରାହ୍ନରେ ବିଜେପି ରାଜ୍ୟ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ଦେବାଶିଷ ନାୟକ କହିଥିଲେ ଯେ, ଶାସନ ଭାର ସଠିକ ଭାବେ ସମ୍ଭାଳି ପାରୁନଥିବା ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ପଦରୁ ଅବସର ଗ୍ରହଣ କରନ୍ତୁ । ମୁଖ୍ୟମନ୍ତ୍ରୀ ଏବଂ ବିଜେଡ଼ିକୁ ଭୋଟ ଦେବା ପାଇଁ ଭି.କେ ପାଣ୍ଡିଆନ ଅପିଲ କରି ନିଜର ଯେଉଁ ଅସହାୟତା ପ୍ରକାଶ କରିଛନ୍ତି ତାହା ସୂଚାଉଛି ଯେ, ମୁଖ୍ୟମନ୍ତ୍ରୀଙ୍କ ଲୋକପ୍ରିୟତା ହ୍ରାସ ପାଇଛି । ବର୍ତ୍ତମାନ ବିଜେଡି ନେତା, ମନ୍ତ୍ରୀ, ସାଂସଦ, ବିଧାୟକ, ନିର୍ବାଚିତ ଜନପ୍ରତିନିଧିମାନଙ୍କର କୌଣସି କତୃତ୍ୱ ନାହିଁ । ସମସ୍ତଙ୍କ ସମ୍ମାନ ଓ ସ୍ୱାଭିମାନକୁ କାଢ଼ି ନେଇ ନାଳ ନର୍ଦ୍ଦମାରେ ପକାଇ ଦେଇଛି ବିଜେଡି ।
ଇଟିଭି ଭାରତ, ଭୁବନେଶ୍ବର
