ହାଇଦ୍ରାବାଦ: ଭାରତୀୟ ରୋଷେଇ ଶାଳରେ ଲବଙ୍ଗ ଏକ ମୁଖ୍ୟ ମସଲା ଜାତୀୟ ପଦାର୍ଥ ହୋଇଥାଏ । ଏହି ଲବଙ୍ଗଗୁଡ଼ିକ କେବଳ ତରକାରୀକୁ ଭଲ ସ୍ୱାଦ ଏବଂ ସୁଗନ୍ଧ ଦେଇନଥାଏ, ବରଂ ଆମକୁ ଆବଶ୍ୟକ କରୁଥିବା ଅନେକ ପୋଷକ ତତ୍ତ୍ବ ମଧ୍ୟ ଯୋଗାଇଥାଏ ଏବଂ ଆମକୁ ସୁସ୍ଥ ରଖିବାରେ ସାହାଯ୍ୟ କରିଥାଏ । ତଥାପି ଆମେ ଏହାକୁ ଖାଇବାକୁ ପସନ୍ଦ କରିନଥାଉ । ଯଦି ଆପଣ ପ୍ରତିଦିନ ଲବଙ୍ଗ ଖାଆନ୍ତି ତେବେ କ'ଣ ହୋଇଥାଏ ଜାଣନ୍ତି କି?
ଲବଙ୍ଗ ଖାଇବାର ଫାଇଦା
- କର୍କଟ ରୋଗର ଆଶଙ୍କା ହ୍ରାସ କରେ: ବିଶେଷଜ୍ଞମାନେ କହିଛନ୍ତି ଯେ ଆପଣଙ୍କ ଦୈନନ୍ଦିନ ଖାଦ୍ୟରେ ଲବଙ୍ଗ ମିଶାଇ ଖାଇବା ଦରକାର । କାରଣ ଏଥିରେ ଥିବା ଫ୍ଲାଭୋନାଏଡ ଏବଂ ଆଇସୋଫ୍ଲୋଭୋନ ପରି ଆଣ୍ଟିଅକ୍ସିଡାଣ୍ଟ ଫ୍ରି ରେଡିକାଲ ହ୍ରାସ କରିବାରେ ସାହାଯ୍ୟ କରିଥାଏ । ଫଳରେ ସେମାନେ ସେଲ୍ୟୁଲାର କ୍ଷୟକୁ ରୋକିଥାନ୍ତି ଏବଂ ହୃଦରୋଗ, କର୍କଟ ଏବଂ ଯକୃତ ସମସ୍ୟା ଭଳି ବିପଦଜ୍ଜନକ ରୋଗର ଆଶଙ୍କା ହ୍ରାସ ହୋଇଥାଏ ।
- ହାଡ ସ୍ୱାସ୍ଥ୍ୟକୁ ସୁସ୍ଥ ରଖେ: ଲବଙ୍ଗରେ ପ୍ରଚୁର ପରିମାଣରେ ଥିବା ମାଙ୍ଗାନିଜ୍ ଏବଂ ଫ୍ଲାଭୋନାଏଡ୍ ହାଡକୁ ମଜଭୁତ ବଜାୟ ରଖିବାରେ ସାହାଯ୍ୟ କରେ । ଏହି ଯୌଗିକଗୁଡ଼ିକ ହାଡର ଟିସୁ ମରାମତି କରିବାରେ ସାହାଯ୍ୟ କରେ ବୋଲି ମଧ୍ୟ କୁହାଯାଏ । ଫଳରେ ବିଭିନ୍ନ ହାଡ ସମସ୍ୟାରୁ ମୁକ୍ତି ମିଳିବା ସହ ଏହା ସୁସ୍ଥ ରହିଥାଏ ।
- ରୋଗ ପ୍ରତିରୋଧକ ଶକ୍ତି ବଢାଇଥାଏ: ବିଶେଷଜ୍ଞମାନେ କହିଛନ୍ତି ଯେ, ପ୍ରତିଦିନ ଲବଙ୍ଗ ଖାଇବା ଦ୍ୱାରା ରୋଗ ପ୍ରତିରୋଧକ ଶକ୍ତି ବଢିଥାଏ । 'ଖାଦ୍ୟ ଏବଂ ଡ୍ରଗ୍ ଆନାଲିସିସ୍ ଜର୍ନାଲ୍'ରେ ପ୍ରକାଶିତ ଏକ ଅଧ୍ୟୟନରେ, ଲବଙ୍ଗରେ ଥିବା ଉପାଦାନଗୁଡ଼ିକ ଆପଣଙ୍କ ରୋଗ ପ୍ରତିରୋଧକ ଶକ୍ତି ବଢାଇବାରେ ସାହାଯ୍ୟ କରିଥାଏ ବୋଲି ଜଣାପଡିଥିଲା । ଏଥିସହ ଏହାର ଆଣ୍ଟି-ଭାଇରାଲ୍ ଗୁଣ ରକ୍ତରେ ଥିବା ବିଷାକ୍ତ ପଦାର୍ଥକୁ ହ୍ରାସ କରିବାରେ ସାହାଯ୍ୟ କରିଥାଏ ବୋଲି ମଧ୍ୟ କୁହାଯାଏ ।
- ହଜମ ପ୍ରକ୍ରିୟାରେ ସୁଧାର ଆଣେ: ପେଟ ଜନିତ ସମସ୍ୟାରୁ ମୁକ୍ତି ପାଇବା ପାଇଁ ଲବଙ୍ଗକୁ ଏକ ଭଲ ଘରୋଇ ଉପଚାର ଭାବରେ ବ୍ୟବହାର କରାଯାଇପାରିବ ବୋଲି ବିଶେଷଜ୍ଞମାନେ କହିଛନ୍ତି । ଏଥିରେ ଥିବା ପୋଷକ ତତ୍ତ୍ୱ ହଜମ ଏବଂ ଅନ୍ତଃନଳୀ ସ୍ୱାସ୍ଥ୍ୟରେ ଉନ୍ନତି ଆଣେ । ଏହା ହଜମକାରୀ ଏନଜାଇମର ଉତ୍ପାଦନକୁ ମଧ୍ୟ ବଢାଇଥାଏ । ଯାହାଫଳରେ ପେଟ ଫୁଲିବା, ଗ୍ୟାସ୍ ଏବଂ ଅପଚ ଭଳି ବିଭିନ୍ନ ହଜମ ପ୍ରକ୍ରିୟା ହ୍ରାସ ହୋଇଥାଏ ।
- ଦାନ୍ତ ସ୍ୱାସ୍ଥ୍ୟ ପାଇଁ ଭଲ: ଲବଙ୍ଗଗୁଡ଼ିକ ଆଣ୍ଟି-ପ୍ଲେକ୍ ଏବଂ ଆଣ୍ଟି-ମାଇକ୍ରୋବିୟଲ୍ ଗୁଣରେ ଭରପୂର ଅଟେ । ବିଶେଷଜ୍ଞଙ୍କ ଅନୁଯାୟୀ ଦାନ୍ତକୁ ସୁସ୍ଥ ରଖିବାରେ ଏମାନେ ବହୁତ ସାହାଯ୍ୟ କରନ୍ତି । ସେମାନେ କେବଳ ପାଟିରେ ଥିବା ଅଣୁଜୀବକୁ ରୋକିବାରେ ସାହାଯ୍ୟ କରନ୍ତି ନାହିଁ, ବରଂ ସଂକ୍ରମଣ, ଯନ୍ତ୍ରଣା ମଧ୍ୟ ଦୂର କରନ୍ତି । ଲବଙ୍ଗ ତେଲ ମଧ୍ୟ ପାଟିରେ ଥିବା ପିରିୟଡୋଣ୍ଟାଲ ପାଥୋଜେନ ପରି ଜୀବାଣୁଙ୍କଠାରୁ ରକ୍ଷା କରିଥାଏ ।
- ସଂକ୍ରମଣରୁ ମୁକ୍ତି: ଲବଙ୍ଗକୁ ନିୟମିତ ଖାଇବା ଦ୍ୱାରା ଫ୍ଲୁ, ଥଣ୍ଡା, ସାଇନସ୍ ସମସ୍ୟା ଏବଂ ଭାଇରାଲ୍ ସଂକ୍ରମଣ ଭଳି ରୋଗ ହେବାର ଆଶଙ୍କା କମିଯାଏ ବୋଲି ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି ।
- ମଧୁମେହ ଓ ବୃକକ ଜନିତ ରୋଗୀଙ୍କ ପାଇଂ ଲାଭଦାୟକ: ଏହାର ବ୍ୟବହାର ମଧୁମେହ ରୋଗୀଙ୍କ ପାଇଁ ଲାଭଦାୟକ ହୋଇଥାଏ କାରଣ ଲବଙ୍ଗରେ ଏପରି ଯୌଗିକ ମଧ୍ୟ ରହିଥାଏ ଯାହା ରକ୍ତରେ ଶର୍କରା ସ୍ତରକୁ ନିୟନ୍ତ୍ରଣ କରିବାରେ ସାହାଯ୍ୟ କରିଥାଏ । ଏହା କିଡନୀ ଜନିତ ରୋଗରୁ ରକ୍ଷା କରିବାରେ ମଧ୍ୟ ସାହାଯ୍ୟ କରିଥାଏ ଏବଂ ପରିସ୍ରା ସଂକ୍ରମଣରୁ ମୁକ୍ତି ଦେଇଥାଏ ।
- ମୁଣ୍ଡ ବିନ୍ଧା:- ଏହା ମୁଣ୍ଡବିନ୍ଧା, ମାଇଗ୍ରେନ ପାଇଁ ମଧ୍ୟ ଲାଭଦାୟକ । ଏହାକୁ ଚୋବାଇଲେ ଏହାର ବାସ୍ନା ସଙ୍ଗେ ସଙ୍ଗେ ମୁଣ୍ଡ ବିନ୍ଧାକୁ କମାଇଥାଏ ।
- ପୁରୁଷଙ୍କ ଯୌନ ସମସ୍ୟା:- ଆୟୁର୍ବେଦରେ ଲବଙ୍ଗ ଅନେକ ଔଷଧରେ ବ୍ୟବହୃତ ହୁଏ ଯାହା ପୁରୁଷମାନଙ୍କୁ ଯୌନ ସ୍ବାସ୍ଥ୍ୟ ସମସ୍ୟାରେ ସାହାଯ୍ୟ କରିଥାଏ । ବନାରସ ହିନ୍ଦୁ ବିଶ୍ବ ବିଦ୍ୟାଳୟର ଏକ ଅଧ୍ୟୟନରୁ ଜଣାପଡିଛି ଯେ ନିୟମିତ ଭାବରେ ଲବଙ୍ଗର ବ୍ୟବହାର ଟେଷ୍ଟୋଷ୍ଟେରନ୍ ଉତ୍ପାଦନକୁ ବଢାଇଥାଏ । ଅନ୍ୟପକ୍ଷରେ, ଅତ୍ୟଧିକ ବ୍ୟବହାର ଏହାର ଉତ୍ପାଦନକୁ ମଧ୍ୟ ହ୍ରାସ କରିପାରେ ।
ଦିନକୁ କେତେ ଲବଙ୍ଗ ଖାଇବେ?
ସୂଚନା ଥାଉ କି, ପ୍ରତିଦିନ ଲବଙ୍ଗ ଖାଇବାର ଅନେକ ସ୍ୱାସ୍ଥ୍ୟ ଉପକାର ଅଛି କିନ୍ତୁ ଏହାକୁ ଅଧିକ ଖାଇବା ମଧ୍ୟ ଠିକ ନୁହେଁ । ବିଶେଷଜ୍ଞଙ୍କ ଅନୁସାରେ, ପ୍ରତିଦିନ ଏକରୁ ଦୁଇ ଖଣ୍ଡ ଭଳି ଅଳ୍ପ ପରିମାଣରେ ଲବଙ୍ଗ ଖାଇବା ଆବଶ୍ୟକ । ଲବଙ୍ଗକୁ ଚା' ଆକାରରେ ମଧ୍ୟ ଖାଇପାରନ୍ତି କିମ୍ବା ସ୍ୱାଦ ଏବଂ ସ୍ୱାସ୍ଥ୍ୟ ଉପକାର ପାଇଁ ଭୋଜନରେ ସାମିଲ କରିପାରନ୍ତି ।
ଅତ୍ୟଧିକ ଲବଙ୍ଗ ଖାଇବାର ଅସୁବିଧା: ପ୍ରତିଦିନ ଲବଙ୍ଗ ଖାଇବାର ସ୍ୱାସ୍ଥ୍ୟ ଉପକାର ସତ୍ତ୍ୱେ ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ ଅତ୍ୟଧିକ ଖାଇବା ଦ୍ୱାରା ଯକୃତ ନଷ୍ଟ ହୋଇପାରେ । ଯକୃତ ସମସ୍ୟା ଥିବା ଲୋକମାନେ ସାବଧାନ ହେବା ଉଚିତ୍ । ଏଥିସହ ଗର୍ଭବତୀ ମହିଳାମାନେ ବି ସତର୍କତାର ସହ ଲବଙ୍ଗ ଖାଇବା ଉଚିତ୍ ।
ବ୍ୟୁରୋ ରିପୋର୍ଟ, ଇଟିଭି ଭାରତ
