ହାଇଦ୍ରାବାଦ: ସାରା ଦେଶକୁ କଲବଲ କରୁଛି ଭୀଷଣ ଖରା । ପ୍ରବଳ ତାତିରେ ଘରୁ ବାହାରିବା ଅସମ୍ଭାଳ ହୋଇପଡୁଛି । ଏହାରି ମଧ୍ୟରେ ମୌସୁମୀ ବର୍ଷାକୁ ଅପେକ୍ଷା କରିଛନ୍ତି ଦେଶବାସୀ । ଚଳିତ ବର୍ଷ ଆଗୁଆ ମୌସୁମୀ ଆସିବା ନେଇ ପାଣିପାଗ ବିଶେଷଜ୍ଞ ଆକଳନ କରିଛନ୍ତି । ନିକଟରେ ଏନେଇ ଏକ ଖୁସି ଖବର ଆସିଥିଲା । ଦକ୍ଷିଣ-ପଶ୍ଚିମ ମୌସୁମୀ ଆଣ୍ଡାମାନ ନିକୋବର ଦ୍ବୀପପୁଞ୍ଜ ପର୍ଯ୍ୟନ୍ତ ପହଞ୍ଚିସାରିଛି । ମେ 19ରୁ 21 ତାରିଖ ମଧ୍ୟରେ ନିକୋବର ଦ୍ବୀପପୁଞ୍ଜରେ ପହଞ୍ଚିଛି ମୌସୁମୀ । ତେବେ ଭାରତର ବିଭିନ୍ନ ରାଜ୍ୟକୁ କେବେ ଛୁଇଁବ ମୌସୁମୀ ଆସନ୍ତା ଜାଣିବା ।
ଭାରତୀୟ ପାଣିପାଗ ବିଭାଗର ସୂଚନା ଅନୁସାରେ, ଚଳିତ ବର୍ଷ ଜୁନ 1 ତାରିଖରେ ମୌସୁମୀ କେରଳ, ପୁଡୁଚେରୀ ଓ ତାମିଲନାଡୁ ରାଜ୍ୟରେ ଏଣ୍ଟ୍ରି ମାରିବାକୁ ଯାଉଛି । ଏହାବାଦ କର୍ଣ୍ଣାଟକ, ଗୋଆ, ଆସାମ, ତ୍ରିପୁରା ଓ ଆନ୍ଧ୍ର ପ୍ରଦେଶର ଅନେକ ସ୍ଥାନରେ ଜୁନ 5 ତାରିଖ ବେଳକୁ ମୌସୁମୀ ବାୟୁ ପ୍ରବେଶ କରିବା ନେଇ କୁହାଯାଉଛି । ସେହିପରି ତେଲେଙ୍ଗାନା, ସିକିମ, ମହାରାଷ୍ଟ୍ର ଆକାଶରେ ଜୁନ 10 ତାରିଖରେ ମୌସୁମୀ ବାୟୁ ପ୍ରବେଶ କରିବ । ଜୁନ 15 ବେଳକୁ ମୌସୁମୀ ଝାଡ଼ଖଣ୍ଡ, ଛତିଶଗଡ଼, ବିହାର, ଓଡ଼ିଶା, ଗୁଜୁରାଟ ଓ ମଧ୍ୟ ପ୍ରଦେଶ ଛୁଇଁବ ବୋଲି ଭାରତୀୟ ପାଣିପାଗ ବିଭାଗ ଆକଳନ କରିଛି ।
| ରାଜ୍ୟର ନାମ | ଆନୁମାନିକ ତାରିଖ |
| କେରଳ, ପୁଡୁଚେରୀ, ତାମିଲନାଡୁ | 1 ଜୁନ 2024 |
| କର୍ଣ୍ଣାଟକ, ଗୋଆ, ଆସାମ, ତ୍ରିପୁରା, ଆନ୍ଧ୍ର ପ୍ରଦେଶ | 5 ଜୁନ 2024 |
| ତେଲେଙ୍ଗାନା, ସିକିମ, ମହାରାଷ୍ଟ୍ର | 10 ଜୁନ 2024 |
| ଝାଡ଼ଖଣ୍ଡ, ଛତିଶଗଡ଼, ବିହାର, ଓଡ଼ିଶା, ଗୁଜୁରାଟ, ମଧ୍ୟ ପ୍ରଦେଶ | 15 ଜୁନ 2024 |
| ଉତ୍ତର ପ୍ରଦେଶ, ହିମାଚଳ ପ୍ରଦେଶ, ଲଦାଖ, ଉତ୍ତରାଖଣ୍ଡ | 20 ଜୁନ 2024 |
| ଦିଲ୍ଲୀ, ହରିୟାଣା, ପଞ୍ଜାବ, ରାଜସ୍ଥାନ | 30 ଜୁନ 2024 |
ଏହା ବି ପଢନ୍ତୁ- ଏବର୍ଷ ଶୀଘ୍ର ଆସୁଛି ମୌସୁମୀ, ୧୯ରେ ଛୁଇଁବ ଆଣ୍ଡାମାନ
ଏହାପରେ ମୌସୁମୀ ଧିରେ ଧିରେ ଆଗକୁ ବଢି ଜୁନ 20 ତାରିଖ ସୁଦ୍ଧା ଉତ୍ତର ପ୍ରଦେଶ, ହିମାଚଳ ପ୍ରଦେଶ, ଲଦାଖ, ଉତ୍ତରାଖଣ୍ଡ, ମଧ୍ୟ ପ୍ରଦେଶର ବାକି ଥିବା ଅଞ୍ଚଳ ଓ ଗୁଜୁରାଟରେ ବାକି ଥିବା ଅଞ୍ଚଳରେ ପ୍ରବେଶ କରିବ । ଏହାପରେ ଜୁନ 25 ତାରିଖରେ ମୌସୁମୀ ଲଦାଖ ଓ ହିମାଚଳ ପ୍ରଦେଶ ଛୁଇଁବ । ଏହି ସମୟ ମଧ୍ୟରେ ମୌସୁମୀ ଉତ୍ତର ପ୍ରଦେଶ, ଗୁଜୁରାଟ ଓ ମଧ୍ୟ ପ୍ରଦେଶର ବାକି ଥିବା ଅଞ୍ଚଳରେ ମଧ୍ୟ ମୌସୁମୀ ବାୟୁ ପ୍ରବେଶ କରିବ । ଦିଲ୍ଲୀ, ହରିୟାଣା, ପଞ୍ଜାବ ଓ ରାଜସ୍ଥାନ କଥା କହିଲେ ପାଣିପାଗ ବିଭାଗର ଆକଳନ ଅନୁସାରେ ଏହି ରାଜ୍ୟରେ ଜୁନ 30 ସୁଦ୍ଧା ମୌସୁମୀ ବାୟୁ ପ୍ରବେଶ କରିବ । ଏହାପରେ ରାଜସ୍ଥାନର ବାକି ଥିବା ଅଞ୍ଚଳରେ ଜୁଲାଇ 5 ତାରିଖରେ ମୌସୁମୀ ବର୍ଷା ହେବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
