കോഴിക്കോട്: പൗരത്വ ഭേദഗതി നിയമം വരുന്നത് വളരെയധികം ഉത്കണ്‌ഠ ഉളവാക്കുന്ന കാര്യമാണെന്ന് മുസ്‌ലിം ലീഗ് അഖിലേന്ത്യ ഓർഗനൈസിങ് സെക്രട്ടറിയും എംപിയുമായ ഇ ടി മുഹമ്മദ് ബഷീർ. രാജ്യത്ത് ഇതിനെതിരെയുള്ള ശക്തമായ പോരാട്ടം നേരത്തെ ഉണ്ടായിരുന്നു. ഈ നിയമത്തിനെതിരെയുള്ള സമരത്തിൽ നിരവധി പേരുടെ ജീവൻ ബലിയർപ്പിക്കപ്പെട്ടിട്ടുണ്ടെന്നും ഇ ടി മുഹമ്മദ് ബഷീർ ചൂണ്ടിക്കാട്ടി (Muslim League Leaders On CAA).
മുസ്‌ലിം ലീഗിൻ്റെ നേതൃത്വത്തിൽ ശക്തമായ നിയമ പോരാട്ടവുമായി മുന്നോട്ട് പോയിക്കൊണ്ടിരിക്കുകയാണ്. ഇപ്പോൾ വീണ്ടും പൗരത്വ ഭേദഗതി നിയമം നടപ്പിലാക്കുക എന്ന ലക്ഷ്യത്തോടെ കേന്ദ്ര സർക്കാർ മുന്നോട്ടു പോകുമ്പോൾ ഈ നടപടി സ്‌റ്റേ ചെയ്യിക്കുന്നതിന് ആവശ്യമായ നിയമ നടപടികളുമായി മുന്നോട്ടുപോകാനാണ് മുസ്‌ലിം ലീഗിൻ്റെ തീരുമാനം. സമാന മനസ്‌കരുമായി ചേർന്ന് ഇതിനെതിരെ ശക്തമായ പ്രക്ഷോഭ സമരങ്ങൾ എങ്ങിനെ ആരംഭിക്കണമെന്ന കാര്യം ചർച്ച ചെയത് തീരുമാനിക്കുമെന്നും ഇ ടി മുഹമ്മദ് ബഷീർ കൂട്ടിച്ചേര്‍ത്തു.
ഭരണഘടനാ വിരുദ്ധമെന്ന് കുഞ്ഞാലിക്കുട്ടി: പൗരത്വ നിയമം നടപ്പിലാക്കുന്നത് ഭരണഘടനാ വിരുദ്ധമാണെന്ന് മുസ്‌ലിം ലീഗ് നേതാവ് പി കെ കുഞ്ഞാലിക്കുട്ടിയും പറഞ്ഞു. തെരഞ്ഞെടുപ്പ് അടുത്തപ്പോള്‍ ബിജെപിക്ക് പേടി തുടങ്ങിയതുകൊണ്ടാണ് ഇത്തരം അടവുകള്‍ ഇറക്കുന്നതെന്നും കുഞ്ഞാലിക്കുട്ടി പറഞ്ഞു.
ഇത് സംബന്ധിച്ച് മുസ്‌ലിം ലീഗ് കൊടുത്ത കേസ് ഇപ്പോഴും കോടതിയില്‍ നിലനില്‍ക്കുകയാണ്. നിലവില്‍ സിഎഎ നടപ്പാക്കില്ലെന്നാണ് കേന്ദ്രം കോടതിയെ അറിയിച്ചിരിക്കുന്നത്. തെരഞ്ഞെടുപ്പിന് മണിക്കൂറുകള്‍ക്ക് മുമ്പ് ഇത്തരം പ്രഖ്യാപനം കൊണ്ടുവരുന്നത് നിയമ വിരുദ്ധമാണെന്നും പി കെ കുഞ്ഞാലിക്കുട്ടി വ്യക്‌തമാക്കി.
Also Read: പൗരത്വ നിയമ ഭേദഗതി കേരളത്തില്‍ നടപ്പാക്കില്ല; നിലപാടാവര്‍ത്തിച്ച് മുഖ്യമന്ത്രി
പൗരത്വനിയമം ചോദ്യം ചെയ്‌ത് കോടതിയെ സമീപിക്കും. ജാതിമത അടിസ്ഥാനത്തില്‍ പൗരത്വം എന്നത് ലോകത്തില്‍ എവിടെയും അംഗീകരിക്കാത്തതാണെന്നും പി കെ കുഞ്ഞാലിക്കുട്ടി കൂട്ടിച്ചേര്‍ത്തു.
