ETV Bharat / state

എസ്എഫ്ഐയ്ക്കും സർക്കാരിനും തിരിച്ചടി; ഡോ രമയ്‌ക്കെതിരായ അച്ചടക്ക നടപടികൾ റദ്ദാക്കി ഹൈക്കോടതി - Kerala HC against SFI

author img

By ETV Bharat Kerala Team

Published : Apr 9, 2024, 7:44 PM IST

KERALA HC  SFI  എസ്എഫ്ഐ  കേരള ഹൈക്കോടതി
Kerala HC Quashed Disciplinary Action Against Kasaragod Govt College Former Principal Dr Rama

കാസർകോട് കോളജിലെ മുൻ പ്രിൻസിപ്പാൾ ഡോ രമയ്‌ക്കെതിരായ അച്ചടക്ക നടപടികൾ ഹൈക്കോടതി റദ്ദാക്കി. എസ്എഫ്ഐയ്ക്കും സർക്കാറിനും തിരിച്ചടി.

എറണാകുളം: കാസർകോട് കോളജിലെ മുൻ പ്രിൻസിപ്പാൾ ഡോ രമയ്‌ക്കെതിരായ എല്ലാ അച്ചടക്ക നടപടിയും ഹൈക്കോടതി ഡിവിഷൻ ബെഞ്ച് റദ്ദാക്കി. ക്യാമ്പസിലെ എസ്എഫ്ഐ വിദ്യാർഥികളുടെ ലഹരി ഉപയോഗം തുറന്നു പറഞ്ഞതിന്‍റെ പേരിലാണ് രമയ്‌ക്കെതിരെ സർക്കാർ അച്ചടക്ക നടപടികൾ സ്വീകരിച്ചത്. സംഭവത്തിൽ ബാഹ്യ ഇടപെടലുകൾ നടത്തിയ എസ്എഫ്ഐയെ കോടതി വിമർശിച്ചു.

രമയ്‌ക്കെതിരെ അച്ചടക്ക നടപടികളിൽ ബാഹ്യ ഇടപെടലും, നിക്ഷിപ്‌ത താത്‌പര്യവുമുണ്ടായിരുന്നുവെന്ന് വിലയിരുത്തിയ കോടതി എസ്എഫ്ഐയ്‌ക്കെതിരെ രൂക്ഷ വിമർശനവും നടത്തി. പ്രിൻസിപ്പാളിനെ ആക്രമിച്ച എസ്എഫ്ഐ പ്രവർത്തകർക്കെതിരെ എന്ത് നടപടി എടുത്തുവെന്ന് ആരാഞ്ഞ കോടതി പ്രിൻസിപ്പാളിനെതിരായ സൈബർ ആക്രമണത്തിൽ ഒരു നടപടിയും ഉണ്ടായില്ലെന്നും കുറ്റപ്പെടുത്തി.
ഒരാളുടെ അഭിപ്രായ സ്വാതന്ത്ര്യം ഭരണഘടനാ അവകാശമാണ്. അച്ചടക്ക നടപടിയെടുത്ത് അതിനെ ഹനിക്കാനാകില്ലെന്നും കോടതി വ്യക്തമാക്കി.

പ്രിൻസിപ്പാളിനെ ഘരാവോ ചെയ്യാനും ആക്രമിക്കാനും എസ്എഫ്ഐയ്ക്ക് എന്ത് അവകാശമാണുള്ളതെന്നും കോടതി വിമർശിച്ചു. മാർച്ച് 31 ന് വിരമിക്കാനിരിക്കെയാണ് ഡോ രമയ്‌ക്കെതിരെ രണ്ടാമതും കുറ്റപത്രം നൽകിയത്. ഈ നടപടിയും അധികാര ദുർവിനിയോഗത്തിന്‍റെ ഭാഗമെന്നും ജസ്‌റ്റിസ് മുഹമ്മദ് മുഷ്ത്താഖ് വിമർശിച്ചു.

2022 ൽ അഡ്‌മിഷൻ സമയത്ത് ഡോ രമ വിദ്യാർഥിയോട് മോശമായി പെരുമാറിയെന്നായിരുന്നു രണ്ടാം അച്ചടക്ക ലംഘനമായി കണ്ടെത്തിയത്. ഈ ആക്ഷേപങ്ങൾ നിലനിൽക്കില്ലെന്ന് ഹൈക്കോടതി ഉത്തരവിൽ വ്യക്തമാക്കി.

Also Read: കേരള യൂണിവേഴ്‌സിറ്റി കോഴ ആരോപണം; സമഗ്ര അന്വേഷണം ആവശ്യപ്പെട്ട് കെഎസ്‌യു, ഗവർണർക്ക് കത്ത് നൽകി

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.