മുംബൈ : ബിസിസിഐയുടെ പുരുഷ താരങ്ങളുടെ പുതുക്കിയ വാര്‍ഷിക കരാര്‍ പട്ടിക കഴിഞ്ഞ ദിവസമാണ് പുറത്തുവിട്ടത് (BCCI Central Contract). വാര്‍ഷിക കരാറില്‍ നിന്നും മധ്യനിര ബാറ്റര്‍ ശ്രേയസ് അയ്യര്‍ (Shreyas Iyer), വിക്കറ്റ് കീപ്പര്‍ ബാറ്റര്‍ ഇഷാൻ കിഷൻ (Ishan Kishan) എന്നിവരെ തഴഞ്ഞത് ക്രിക്കറ്റ് ലോകത്ത് വലിയ ചര്‍ച്ചകള്‍ക്കും തുടക്കമിട്ടിട്ടുണ്ട്. ദേശീയ ടീമില്‍ കളിക്കാത്ത സാഹചര്യത്തില്‍ താരങ്ങള്‍ ആഭ്യന്തര ക്രിക്കറ്റില്‍ റെഡ് ബോള്‍ മത്സരങ്ങള്‍ കളിക്കണമെന്ന ബിസിസിഐ നിര്‍ദേശം ഇഷാൻ കിഷനും ശ്രേയസ് അയ്യരും പാലിച്ചിരുന്നില്ല.
ദക്ഷിണാഫ്രിക്കൻ പര്യടനത്തിന് മുന്‍പ് നാട്ടിലേക്ക് തിരിച്ച ഇഷാൻ പിന്നീട് ഇന്ത്യയ്‌ക്കായി കളിച്ചിട്ടില്ല. മറുവശത്ത്, ഇല്ലാത്ത പരിക്ക് ചൂണ്ടിക്കാട്ടി ശ്രേയസ് അയ്യര്‍ രഞ്ജി ട്രോഫിയില്‍ നിന്നും വിട്ടുനില്‍ക്കുകയായിരുന്നു. ഇതിന് പിന്നാലെയാണ് ഇരുവര്‍ക്കും ബിസിസിഐ കോണ്‍ട്രാക്‌ടും നഷ്‌ടമായത്.
അതേസമയം, ഇവരെ കൂടാതെ മറ്റ് ചില മുൻനിര താരങ്ങള്‍ക്കും ബിസിസിഐ വാര്‍ഷിക കരാര്‍ നഷ്‌ടമായി. വെറ്ററൻ താരങ്ങളായ ചേതേശ്വര്‍ പുജാര (Cheteshwar Pujara), ശിഖര്‍ ധവാൻ (Shikar Dhawan), യുസ്‌വേന്ദ്ര ചാഹല്‍ (Yuzvendra Chahal), പേസര്‍ ഉമേഷ് യാദവ് (Umesh Yadav) എന്നിവരാണ് കരാര്‍ പട്ടികയില്‍ നിന്നും പുറത്തുപോയ താരങ്ങള്‍. നിലവില്‍ ഇന്ത്യൻ സെലക്‌ടര്‍മാരുടെ പരിഗണനയില്‍ നിന്നും നാല് താരങ്ങളും പുറത്താണെന്നാണ് ഇത് സൂചിപ്പിക്കുന്നത്.
ഈ നാല് താരങ്ങളില്‍ നിലവില്‍ ഇന്ത്യൻ ടീമിലേക്ക് തിരിച്ചെത്താൻ സാധ്യത സ്‌പിന്നര്‍ യുസ്‌വേന്ദ്ര ചാഹലിന് മാത്രമാണ്. ടി20 ലോകകപ്പിനുള്ള (T20 World Cup 2024) ഇന്ത്യൻ ടീമിലേക്കാണ് താരത്തിന്‍റെ തിരിച്ചുവരവ് ആരാധകര്‍ പ്രതീക്ഷിക്കുന്നത്. ടി20യില്‍ ഇന്ത്യയ്‌ക്ക് വേണ്ടി കൂടുതല്‍ വിക്കറ്റ് നേടിയ ബൗളറാണ് ചാഹല്‍. ഐപിഎല്ലിലെ (IPL 2024) പ്രകടനത്തെ ആശ്രയിച്ചായിരിക്കും ഇന്ത്യൻ സീനിയര്‍ ടീമിലേക്കുള്ള താരത്തിന്‍റെ മടങ്ങി വരവ്.
Also Read : ഇഷാനെയും ശ്രേയസിനേയും വെട്ടി; പുതിയ കരാര്‍ പ്രഖ്യാപിച്ച് ബിസിസിഐ, സഞ്‌ജു തുടരും
ടെസ്റ്റ് ടീമിലേക്ക് ചേതേശ്വര്‍ പുജാരയുടെ തിരിച്ചുവരവ് ഇനി കഠിനമായിരിക്കും. കഴിഞ്ഞ ലോക ടെസ്റ്റ് ചാമ്പ്യൻഷിപ്പ് ഫൈനലില്‍ ഇന്ത്യ ഓസ്‌ട്രേലിയയോട് പരാജയപ്പെട്ടതിന് പിന്നാലെയായിരുന്നു 36 കാരനായ പുജാരയ്‌ക്ക് ടീമില്‍ സ്ഥാനം നഷ്‌ടമായത്. നിലവില്‍ ശുഭ്‌മാൻ ഗില്ലാണ്, ടെസ്റ്റ് ടീമില്‍ ഇന്ത്യയ്‌ക്കായി പുജാര ക്രീസിലേക്കെത്തിയിരുന്ന മൂന്നാം നമ്പറില്‍ ബാറ്റ് ചെയ്യുന്നത്.
