മുംബൈ: ഇന്ത്യന്‍ പ്രീമിയര്‍ ലീഗില്‍ ഗുജറാത്ത് ടൈറ്റന്‍സിനെതിരായ രാജസ്ഥാന്‍ റോയല്‍സിന്‍റെ തോല്‍വിക്ക് പിന്നാലെ സഞ്‌ജു സാംസണിന്‍റെ ക്യാപ്റ്റന്‍സിക്ക് വിമര്‍ശനം. മത്സരത്തില്‍ സഞ്‌ജുവിന്‍റെ തീരുമാനങ്ങള്‍ പിഴച്ചുവെന്ന് ആരോപിച്ച് ആരാധകരുള്‍പ്പെടെ നിരവധി പേരാണ് രംഗത്ത് എത്തിയത്. ഇക്കൂട്ടത്തിലേക്ക് ചേര്‍ന്നിരിക്കുകയാണ് ഓസീസ് മുന്‍ താരവും സണ്‍റൈസേഴ്‌സ് ഹൈദരാബാദിന്‍റെ പരിശീലകനുമായിരുന്ന ടോം മൂഡി.
ട്രെന്റ് ബോള്‍ട്ടിനെ വേണ്ട രീതിയില്‍ ഉപയോഗിക്കാതിരുന്ന സഞ്‌ജുവിന്‍റെ തീരുമാനം തനിക്ക് മനസിലാവുന്നില്ലെന്നാണ് മൂഡി പറയുന്നത്. "ഡെത്ത് ഓവറുകളില്‍ തീര്‍ച്ചയായും നിങ്ങള്‍ ട്രെന്റ് ബോള്‍ട്ടിനെ ഉപയോഗിക്കണമായിരുന്നു. നേരത്തെ പലതവണ ഡെത്ത് ഓവറുകളില്‍ ബോള്‍ട്ടിനെ ഉപയോഗപ്പെടുത്തിയിട്ടുണ്ട്. കൂടാതെ വലിയ അനുഭവ സമ്പത്തുള്ള താരമാണ് ബോള്‍ട്ട്.
അതിനാൽ തന്നെ സമ്മർദം വരുമ്പോൾ, ആ സമ്മർദം ഉൾക്കൊള്ളാനും ആ വെല്ലുവിളികൾ ഏറ്റെടുക്കാനും അദ്ദേഹത്തിന് കഴിയും. ഗുജറാത്തിനെതിരെ ബോള്‍ട്ടിനെ പന്തേല്‍പ്പിക്കാതിരുന്ന സഞ്‌ജുവിന്‍റെ തീരുമാനം എന്നെ ശരിക്കും അത്ഭുതപ്പെടുത്തി. നാല് ഓവര്‍ ക്വാട്ടയില്‍ രണ്ട് ഓവറുകള്‍ ബാക്കി വച്ചാണ് ബോള്‍ട്ട് തിരിച്ച് കയറിയത്. 17-ാം ഓവര്‍ അശ്വിന് നല്‍കിയത് വലിയൊരു വീഴ്‌ചയല്ല.
അദ്ദേഹം വളരെ മികച്ച ബോളറാണ്. എന്നാല്‍ തങ്ങളുടെ എട്ട് ഓവറില്‍ അശ്വിനും ചാഹലും വഴങ്ങിയത് 83 റണ്‍സായിരുന്നു എന്നകാര്യം ഓര്‍ക്കേണ്ടതുണ്ട്. എന്നെ സംബന്ധിച്ചിടത്തോളം ബോള്‍ട്ടിനെ സഞ്‌ജു ശരിയായി ഉപയോഗിക്കണമായിരുന്നു. നമുക്ക് അറിയാത്ത പരിക്കോ മറ്റ് അസുഖങ്ങളോ ഇല്ലാതിരുന്നെങ്കില്‍ സഞ്‌ജു അതായിരുന്നു ചെയ്യേണ്ടിയിരുന്നത്"- ടോം മൂഡി പറഞ്ഞു.
ഒരു പ്രമുഖ സ്‌പോര്‍ട്‌ മാധ്യമത്തിലെ ചര്‍ച്ചയ്‌ക്കിടെയായിരുന്നു ഓസീസ് മുന്‍ താരത്തിന്‍റെ വാക്കുകള്‍. ഇന്ത്യയുടെ മുന്‍ താരം ദീപ് ദാസ്‌ഗുപ്‌തയും പ്രസ്‌തുത ചര്‍ച്ചയുടെ ഭാഗമായിരുന്നു. അശ്വിനെ 17-ാം ഓവര്‍ ഏല്‍പ്പിച്ച സഞ്‌ജുവിന്‍റെ തീരുമാനത്തെ ചോദ്യം ചെയ്യുന്നതായിരുന്നു അദ്ദേഹത്തിന്‍റെ വാക്കുകള്‍.
"15-ാം ഓവർ അശ്വിൻ എറിയുന്നത് എനിക്ക് മനസിലാകും, പക്ഷേ 17-ാം ഓവർ?. രാജസ്ഥാന്‍റെ ബോളിങ് യൂണിറ്റിലേക്ക് നോക്കുമ്പോള്‍, അവരുടെ ഏറ്റവും പരിചയസമ്പന്നനായ ഫാസ്റ്റ് ബോളറാണ് ബോൾട്ട്. ഡെത്ത് ഓവര്‍ അദ്ദേഹത്തിന്‍റെ ശക്തിയാണോ അല്ലയോ എന്നകാര്യം പരിഗണിക്കേണ്ടതേയില്ല. ഓവര്‍ ബാക്കിയുണ്ടായിരുന്നുവെങ്കില്‍ തീര്‍ച്ചായും ബോള്‍ട്ടിന് പന്ത് നല്‍കണമായിരുന്നു" -ദീപ് ദാസ്‌ഗുപ്ത പറഞ്ഞു.
അതേസമയം ഗുജറാത്തിനെതിരെ മൂന്ന് വിക്കറ്റുകള്‍ക്കായിരുന്നു രാജസ്ഥാന്‍ തോറ്റത്. ആദ്യം ബാറ്റ് ചെയ്‌ത രാജസ്ഥാന്‍ നേടിയ 196 റണ്‍സ് പിന്തുടര്‍ന്ന ഗുജറാത്ത് അവസാന പന്തിലാണ് വിജയം ഉറപ്പിച്ചത്. സീസണില്‍ രാജസ്ഥാന്‍റെ ആദ്യ തോല്‍വിയാണിത്.
