ന്യൂഡല്‍ഹി: ഐപിഎല്ലില്‍ ബാറ്റിങ്ങ് വെടിക്കെട്ടിന്‍റെ കരുത്തില്‍ വീണ്ടും ജയം സ്വന്തമാക്കി സണ്‍റൈസേഴ്‌സ് ഹൈദരാബാദ്. ഡല്‍ഹി കാപിറ്റല്‍സിനെ അവരുടെ തട്ടകത്തില്‍ പോയി 67 റണ്‍സിനാണ് ഹൈദരാബാദ് തകര്‍ത്തത്. ഡല്‍ഹി അരുണ്‍ ജയ്‌റ്റ്‌ലി സ്റ്റേഡിയത്തില്‍ ടോസ് നഷ്‌ടപ്പെട്ട് ആദ്യം ബാറ്റ് ചെയ്‌ത സൺറൈസേഴ്‌സ് ഹൈദരാബാദ് അടിച്ചുകൂട്ടിയത് ഏഴ് വിക്കറ്റ് നഷ്‌ടത്തില്‍ 266 റണ്‍സ്.
മറുപടി ബാറ്റിങ്ങില്‍ ഡല്‍ഹി കാപിറ്റല്‍സിനെ 19.1 ഓവറില്‍ 199 റണ്‍സില്‍ എറിഞ്ഞൊതുക്കാൻ അവര്‍ക്ക് സാധിച്ചു. നാല് ഓവറില്‍ 19 റണ്‍സ് വഴങ്ങി നാല് വിക്കറ്റ് വീഴ്‌ത്തിയ ടി നടരാജന്‍റെ പ്രകടനം ഹൈദരാബാദ് ജയത്തില്‍ നിര്‍ണായകമായി. ജയത്തോടെ പോയിന്‍റ് പട്ടികയില്‍ രണ്ടാം സ്ഥാനത്തേക്കും സണ്‍റൈസേഴ്‌സ് ഹൈദരാബാദ് എത്തി.
267 എന്ന വമ്പൻ സ്കോര്‍ പിന്തുടര്‍ന്നിറങ്ങിയ ഡല്‍ഹിക്ക് ആദ്യ ഓവറില്‍ തന്നെ 16 റണ്‍സ് നേടിയ പൃഥ്വി ഷായുടെ വിക്കറ്റ് നഷ്‌ടപ്പെട്ടിരുന്നു. വാഷിങ്ടണ്‍ സുന്ദറാണ് ഷായെ മടക്കിയത്. അടുത്ത ഓവറില്‍ ഡേവിഡ് വാര്‍ണറിന്‍റെ (1) വിക്കറ്റ് ഭുവനേശ്വര്‍ കുമാര്‍ സ്വന്തമാക്കി.
മൂന്നാം വിക്കറ്റില്‍ ക്രീസില്‍ ഒന്നിച്ച ജേക്ക് ഫ്രേസര്‍ മക്‌ഗുര്‍ക് - അഭിഷേക് പോറെല്‍ സഖ്യം അതിവേഗം റണ്‍സ് അടിച്ചുകൂട്ടി. അങ്ങനെ ഡല്‍ഹി സ്കോര്‍ കുതിച്ചു. 84 റണ്‍സായിരുന്നു ഇവരുടെ കൂട്ടുകെട്ടില്‍ പിറന്നത്.
18 പന്തില്‍ 65 റണ്‍സ് നേടിയ മക്‌ഗുര്‍കിനെ മടക്കി മായങ്ക് മാര്‍ക്കണ്ഡെയാണ് കൂട്ടുകെട്ട് പൊളിച്ചത്. മക്‌ഗുര്‍ക് പുറത്താകുമ്പോള്‍ ഏഴ് ഓവറില്‍ 109 എന്ന നിലയിലായിരുന്നു ഡല്‍ഹി. ഒന്‍പതാം ഓവറില്‍ അഭിഷേക് പോറെലിനെയും (22 പന്തില്‍ 42) മാര്‍ക്കണ്ഡെ തന്നെ പറഞ്ഞയച്ചു.
പിന്നീട് എത്തിയവരില്‍ റിഷഭ് പന്ത് ഒഴികെ മറ്റാര്‍ക്കും ബാറ്റുകൊണ്ട് കാര്യമായ സംഭാവന നല്‍കാനായില്ല. താളം കണ്ടെത്താൻ പാടുപെട്ട പന്ത് 35 പന്തില്‍ 44 റണ്‍സ് നേടിയാണ് പുറത്തായത്. ട്രിസ്റ്റണ്‍ സ്റ്റബ്‌സ് (10), ലളിത് യാദവ് (7), അക്‌സര്‍ പട്ടേല്‍ (6), ആൻറിച്ച് നോര്‍ക്യ (0), കുല്‍ദീപ് യാദവ് (0) എന്നിവരാണ് പുറത്തായ മറ്റ് ഡല്‍ഹി താരങ്ങള്‍. മുകേഷ് കുമാര്‍ (0) പുറത്താകാതെ നിന്നു.
Also Read : 'ക്യാപ്റ്റനായും ബാറ്ററായും രോഹിത് പരാജയം, ഹാര്‍ദിക് മുംബൈയുടെ കണ്ടെത്തൽ' - Robin Uthappa On MI Captaincy
മത്സരത്തില്‍ ആദ്യം ബാറ്റ് ചെയ്‌ത സണ്‍റൈസേഴസ്‌ ഹൈദരാബാദിനായി ട്രാവിസ് ഹെഡ് (32 പന്തില്‍ 89), അഭിഷേക് ശര്‍മ (12 പന്തില്‍ 46), ഷഹബാസ് അഹമ്മദ് (29 പന്തില്‍ 59) എന്നിവര്‍ കത്തിക്കയറി. വെടിക്കെട്ട് ബാറ്റര്‍ ഹെൻറിച്ച് ക്ലാസന് 8 പന്തില്‍ 15 റണ്‍സാണ് നേടാനായത്. ഡല്‍ഹിക്കായി കുല്‍ദീപ് യാദവ് നാല് വിക്കറ്റും മത്സരത്തില്‍ സ്വന്തമാക്കി.
