ലഖ്‌നൗ : ഇന്ത്യൻ പ്രീമിയര്‍ ലീഗില്‍ അഞ്ചാം ജയം ലക്ഷ്യമിട്ട് ചെന്നൈ സൂപ്പര്‍ കിങ്സ് ഇന്ന് ഇറങ്ങും. പോയിന്‍റ് പട്ടികയില്‍ അഞ്ചാം സ്ഥാനക്കാരായ ലഖ്‌നൗ സൂപ്പര്‍ ജയന്‍റ്‌സാണ് എതിരാളികള്‍. ലഖ്‌നൗവിന്‍റെ ഹോം ഗ്രൗണ്ടായ ഏകന സ്പോര്‍ട്‌സ് സിറ്റി സ്റ്റേഡിയത്തില്‍ രാത്രി ഏഴരയ്‌ക്കാണ് മത്സരം.
തുടര്‍ച്ചയായ മൂന്നാം ജയം തേടിയാണ് ചെന്നൈ സൂപ്പര്‍ കിങ്സ് എവേ മത്സരത്തിനിറങ്ങുന്നത്. മറുവശത്താകട്ടെ ആതിഥേയരായ ലഖ്‌നൗ ഹാട്രിക് തോല്‍വി ഒഴിവാക്കാനുള്ള ശ്രമത്തിലും. അവസാന മത്സരത്തില്‍ ചെന്നൈ മുംബൈ ഇന്ത്യൻസിനെ പരാജയപ്പെടുത്തിയപ്പോള്‍ കൊല്‍ക്കത്തയോട് ലഖ്‌നൗ പരാജയപ്പെടുകയായിരുന്നു.
പേസര്‍മാര്‍ തമ്മിലുള്ള പോരാട്ടത്തിനാണ് ഇന്ന് ലഖ്‌നൗവില്‍ കളമൊരുങ്ങുന്നത്. പേസ് ബൗളര്‍മാര്‍ക്ക് ആനുകൂല്യം ലഭിക്കുന്ന ഏകന സ്റ്റേഡിയത്തില്‍ മതീഷ പതിരണ, തുഷാര്‍ ദേശ്‌പാണ്ഡെ, ശര്‍ദുല്‍ താക്കൂര്‍ എന്നിവരെയിറക്കി കളിക്കാനാകും ചെന്നൈയുടെ നീക്കം. മറുവശത്ത്, യുവ പേസര്‍ മായങ്ക് യാദവ് ലഖ്‌നൗ നിരയിലേക്ക് തിരിച്ചെത്തിയേക്കുമെന്നാണ് പ്രതീക്ഷിക്കപ്പെടുന്നത്.
മായങ്കിനൊപ്പം നവീൻ ഉള്‍ ഹഖ്, യാഷ് താക്കൂര്‍ എന്നിവരും ചേരുമ്പോള്‍ ചെന്നൈയേക്കാള്‍ ഒരുപടി മുകളില്‍ നില്‍ക്കാൻ ലഖ്‌നൗവിന് സാധിച്ചേക്കാം. സ്‌പിന്നര്‍മാരായ രവീന്ദ്ര ജഡേജ, രവി ബിഷ്‌ണോയ് എന്നിവരുടെ പ്രകടനങ്ങളും നിര്‍ണായകമാണ്. ബാറ്റിങ്ങില്‍ ക്യാപ്‌റ്റൻ റിതുരാജ് ഗെയ്‌ക്‌വാദിലും ശിവം ദുബെയിലുമാണ് ചെന്നൈയുടെ റണ്‍ പ്രതീക്ഷ.
ലോവര്‍ ഓര്‍ഡറില്‍ എംഎസ് ധോണി ബാറ്റുകൊണ്ട് നടത്തുന്ന മിന്നലാട്ടങ്ങളും അവര്‍ക്ക് ആത്മവിശ്വാസം പകരുന്നതാണ്. മറുവശത്ത്, ക്വിന്‍റണ്‍ ഡി കോക്കും കെഎല്‍ രാഹുലും നല്‍കുന്ന തുടക്കവും നിക്കോളസ് പുരാന്‍റെ ഫിനിഷിങ്ങിലുമാണ് ആതിഥേയര്‍ പ്രതീക്ഷയര്‍പ്പിക്കുന്നത്. മോശം ഫോമിലുള്ള ദേവ്‌ദത്ത് പടിക്കലിന് പകരം മൂന്നാം നമ്പറില്‍ ദീപക് ഹൂഡയ്‌ക്ക് അവസരം നല്‍കാൻ ലഖ്‌നൗ മുതിര്‍ന്നേക്കുമോ എന്ന് കണ്ടറിയണം.
ലഖ്‌നൗ സൂപ്പര്‍ ജയന്‍റ്‌സ് സാധ്യത ടീം : ക്വിന്‍റണ്‍ ഡി കോക്ക്, കെഎല്‍ രാഹുല്‍ (ക്യാപ്‌റ്റൻ/വിക്കറ്റ് കീപ്പര്‍), ദീപക് ഹുഡ, മാര്‍ക്കസ് സ്റ്റോയിനിസ്, നിക്കോളസ് പുരാൻ, ആയുഷ് ബഡോണി, ക്രുണാല്‍ പാണ്ഡ്യ, യാഷ് താക്കൂര്‍, രവി ബിഷ്‌ണോയ്, മൊഹ്‌സിൻ ഖാൻ, ഷമാര്‍ ജോസഫ്, മായങ്ക് യാദവ്/അര്‍ഷാദ് ഖാൻ.
ചെന്നൈ സൂപ്പര്‍ കിങ്സ് സാധ്യത ടീം : റിതുരാജ് ഗെയ്‌ക്‌വാദ് (ക്യാപ്‌റ്റൻ), രചിൻ രവീന്ദ്ര, അജിങ്ക്യ രഹാനെ, ശിവം ദുബെ, മൊയീൻ അലി/ഡാരില്‍ മിച്ചല്‍, എംഎസ് ധോണി, രവീന്ദ്ര ജഡേജ, സമീര്‍ റിസ്‌വി, ശര്‍ദുല്‍ താക്കൂര്‍, തുഷാര്‍ ദേശ്‌പാണ്ഡെ, മതീഷ പതിരണ, മുസ്‌തഫിസുര്‍ റഹ്മാൻ.
