ലണ്ടൻ : പ്രീമിയര്‍ ലീഗ് പോയിന്‍റ് പട്ടികയില്‍ ഒന്നാം സ്ഥാനം തിരിച്ചുപിടിച്ച് ലിവര്‍പൂള്‍. സീസണിലെ 30-ാം മത്സരത്തില്‍ ഷെഫീല്‍ഡ് യുണൈറ്റഡിനെ ഒന്നിനെതിരെ മൂന്ന് ഗോളുകള്‍ക്ക് തകര്‍ത്താണ് ചെമ്പടയുടെ മുന്നേറ്റം. സീസണില്‍ ലിവര്‍പൂളിന്‍റെ 21-ാം ജയമായിരുന്നു ഇത്.
ഡാര്‍വിൻ ന്യൂനസ്, അലെക്‌സിസ് മാക് അലിസ്റ്റെര്‍, കോഡി ഗാപ്‌കോ എന്നിവരാണ് ലിവര്‍പൂളിന്‍റെ ഗോള്‍ സ്കോറര്‍മാര്‍. കോണര്‍ ബ്രാഡ്‌ലിയുടെ സെല്‍ഫ് ഗോളാണ് മത്സരത്തില്‍ ഷെഫീല്‍ഡ് യുണൈറ്റഡിന് ആശ്വാസമായത്.
30 മത്സരം പൂര്‍ത്തിയായപ്പോള്‍ 70 പോയിന്‍റാണ് ലീഗ് ടേബിളില്‍ ഒന്നാം സ്ഥാനക്കാരായ ലിവര്‍പൂളിനുള്ളത്. ആഴ്‌സണല്‍, മാഞ്ചസ്റ്റര്‍ സിറ്റി ടീമുകളാണ് രണ്ടും മൂന്നും സ്ഥാനങ്ങളില്‍. രണ്ടാം സ്ഥാനത്തുള്ള ആഴ്‌സണലിന് 68 പോയിന്‍റും മൂന്നാം സ്ഥാനക്കാരായ സിറ്റിക്ക് 67 പോയിന്‍റുമാണ് നിലവില്‍. അതേസമയം, എട്ട് മത്സരങ്ങളാണ് സീസണില്‍ ശേഷിക്കുന്നത്. നിലവില്‍ മൂന്നാം സ്ഥാനക്കാരായ സിറ്റിയേക്കാള്‍ മൂന്ന് പോയിന്‍റ് മാത്രം മുന്നിലാണ് ലിവര്‍പൂള്‍
പോയിന്‍റ് പട്ടികയിലെ അവസാന സ്ഥാനക്കാരായ ഷെഫീല്‍ഡ് യുണൈറ്റഡിനെ നിഷ്‌ഭ്രമമാക്കുന്ന പ്രകടനമായിരുന്നു ലിവര്‍പൂള്‍ ആൻഫീല്‍ഡില്‍ നടത്തിയത്. സ്വന്തം തട്ടകത്തില്‍ സന്ദര്‍ശകരായെത്തിയ ഷെഫീല്‍ഡ് യുണൈറ്റഡിനെതിരെ മികച്ച രീതിയില്‍ തന്നെ തുടങ്ങാൻ ലിവര്‍പൂളിനായി. അഞ്ചാം മിനിറ്റില്‍ ആതിഥേയരുടെ രണ്ട് ഗോള്‍ ശ്രമങ്ങള്‍ ആയിരുന്നു ഷെഫീല്‍ഡ് ഗോള്‍ കീപ്പര്‍ രക്ഷപ്പെടുത്തിയത്.
തുടര്‍ന്നും ആക്രമണങ്ങള്‍ തുടര്‍ന്ന അവര്‍ 17-ാം മിനിറ്റിലാണ് ലീഡ് എടുക്കുന്നത്. ഷെഫീല്‍ഡ് ഗോള്‍ കീപ്പര്‍ ഇവോ ഗര്‍ബിച്ചിന്‍റെ പിഴവിലൂടെയാണ് ന്യൂനസിന്‍റെ പേര് ഗോള്‍ പട്ടികയില്‍ ചേര്‍ക്കപ്പെട്ടത്. മത്സരത്തിന്‍റെ ആദ്യ പകുതിയില്‍ പിന്നീട് ഗോളുകള്‍ ഒന്നും നേടാൻ ലിവര്‍പൂളിന് സാധിച്ചില്ല.
58-ാം മിനിറ്റില്‍ കോണര്‍ ബ്രാഡ്‌ലിയുടെ സെല്‍ഫ് ഗോളിലൂടെ ഷെഫീല്‍ഡ് ലിവര്‍പൂളിന് ഒപ്പമെത്തി. 77-ാം മിനിറ്റില്‍ ലിവര്‍പൂള്‍ ലീഡ് തിരികെ പിടിച്ചു. മാക് അലിസ്റ്റെര്‍ ആയിരുന്നു ഇത്തവണ അവരുടെ ഗോള്‍ സ്കോറര്‍.
ബോക്‌സിന് പുറത്ത് നിന്നുള്ള ഒരു ബുള്ളറ്റ് ലോങ് റേഞ്ചിലൂടെയാണ് മാക് അലിസ്റ്റര്‍ ഷെഫീല്‍ഡ് വലയില്‍ പന്തെത്തിച്ചത്. നേരത്തെ പല പ്രാവശ്യം ലിവര്‍പൂള്‍ താരങ്ങളുടെ ഷോട്ടുകള്‍ രക്ഷപ്പെടുത്തിയ ഗര്‍ബിച്ചിന് യാതൊരു അവസരവും നല്‍കാതെയാണ് മാക് അലിസ്റ്ററുടെ കിക്ക് വലയ്‌ക്കുള്ളില്‍ കയറിയത്.
90-ാം മിനിറ്റിലായിരുന്നു ലിവര്‍പൂളിന്‍റെ മൂന്നാം ഗോളിന്‍റെ പിറവി. കോഡി ഗാപ്‌കോയാണ് ആതിഥേയരുടെ ലീഡ് ഉയര്‍ത്തിയത്. ആൻഡ്ര്യൂ റോബേര്‍ട്‌സണിന്‍റെ പാസ് സ്വീകരിച്ചായിരുന്നു ഗാപ്‌കോ ഗോള്‍ നേടിയത്.
