ലോസ് ആഞ്ചലസ് (യുഎസ്): 'സ്ക്വിഡ് ഗെയിം' എന്ന നെറ്റ്‌ഫ്ലിക്‌സ് സീരീസിലൂടെ പ്രശസ്‌തനായ നടൻ ഒ യോങ്-സുവിനെതിരെ ലൈംഗികാതിക്രമ കേസിൽ നടപടി. നിഷേധിച്ചിട്ടും സ്‌ത്രീയെ ബലമായി കെട്ടിപ്പിടിക്കുകയും ചുംബിക്കുകയും ചെയ്‌തുവെന്ന കേസിലാണ് ദക്ഷിണ കൊറിയൻ നടൻ ശിക്ഷിക്കപ്പെട്ടത്. ഒയെ എട്ട് മാസം വരെ തടവിന് ശിക്ഷിക്കുകയും രണ്ട് വർഷത്തേക്ക് അഭിനയത്തിൽ നിന്ന് സസ്പെൻഡ് ചെയ്യുകയും ചെയ്‌തു.
ലൈംഗിക അതിക്രമത്തിനുള്ള ചികിത്സ പരിപാടിയില്‍ 40 മണിക്കൂര്‍ ഹാജരാകാനും നിർദേശമുണ്ട്. സുവോൺ ജില്ല കോടതിയുടെ സിയോങ്നാം ബ്രാഞ്ചിന്‍റേതാണ് നടപടി. 2017ലാണ് 79കാരനായ നടനെതിരെ ലൈംഗികാരോപണം ഉയർന്നത്. തുടർന്ന് 2022ൽ ഇയാൾക്കെതിരെ കേസെടുത്തു. എന്നാൽ അന്ന് തന്നെ ഒ യോങ്-സു കുറ്റം നിഷേധിച്ചിരുന്നു.
അതേസമയം, വിധിക്കെതിരെ അപ്പീൽ നൽകുമെന്ന് വെള്ളിയാഴ്‌ച കോടതിയിൽ നിന്ന് പുറത്ത് കടക്കുന്നതിനിടെ നടൻ മാധ്യമ പ്രവർത്തകരോട് പറഞ്ഞു. കഴിഞ്ഞ അഞ്ച് പതിറ്റാണ്ടിലേറെയായി വിനോദ മേഖലയിൽ (ഷോ ബിസ്) പ്രവർത്തിക്കുന്നയാളാണ് ഒ. നെറ്റ്‌ഫ്ലിക്‌സിൻ്റെ 'സ്ക്വിഡ് ഗെയിം' സീരീസിലൂടെയാണ് ഒ ആഗോളശ്രദ്ധ ആകർഷിക്കുന്നത്.
കുട്ടികളുടെ പരമ്പരാഗത ഗെയിമുകളുടെ പുതിയ, മാരകമായ പതിപ്പുകളിൽ മത്സരിക്കാൻ പാർശ്വവൽക്കരിക്കപ്പെട്ട വ്യക്തികൾ നിർബന്ധിതരാകുന്ന ഇരുണ്ട ലോകത്തെ ചിത്രീകരിക്കുന്ന പരമ്പരയായിരുന്നു 'സ്ക്വിഡ് ഗെയിം'. 2022ൽ ഈ സീരീസിലെ അഭിനയത്തിന് ഗോൾഡൻ ഗ്ലോബ്‌സിൽ ടെലിവിഷനിലെ മികച്ച സഹനടനായി ഒ തെരഞ്ഞെടുക്കപ്പെട്ടിരുന്നു. ഈ അവാർഡ് നേടിയ ആദ്യ സൗത്ത് കൊറിയൻ നടൻ കൂടിയാണ് ഒ യോങ്-സു.
