ഇന്ത്യൻ ചരിത്രത്തിലെ ഏറ്റവും വലിയ ആനക്കൊമ്പ് വേട്ടയുടെ കഥ പറയുന്ന ക്രൈം സീരീസാണ് ആമസോൺ ഒറിജിനൽ സീരീസായ 'പോച്ചർ'(Amazon Original Series Poacher). കഴിഞ്ഞ ദിവസമാണ് എമ്മി അവാര്‍ഡ് ജേതാവായ ചലച്ചിത്ര നിര്‍മാതാവ് റിച്ചി മേത്ത തിരക്കഥ എഴുതി സംവിധാനം ചെയ്‌ത ഈ പരമ്പരയുടെ ട്രെയിലർ പുറത്തുവന്നത്. ചുരുങ്ങിയ സമയംകൊണ്ടുതന്നെ 2 കോടിയിലേറെ കാഴ്‌ചക്കാരെയാണ് ട്രെയിലർ യൂട്യൂബിൽ സ്വന്തമാക്കിയത് (Poacher Trailer).
മലയാള സിനിമയുടെ അഭിമാന താരങ്ങളായ നിമിഷ സജയന്‍, റോഷന്‍ മാത്യു, എന്നിവർക്കൊപ്പം ദിബ്യേന്ദു ഭട്ടാചാര്യയുമാണ് ഈ സീരീസിൽ പ്രധാന വേഷങ്ങളില്‍ അഭിനയിക്കുന്നത്. ജോർദാൻ പീലെസിന്‍റെ 'ഗെറ്റ് ഔട്ട്', സ്‌പൈക്ക് ലീയുടെ 'ബ്ലാക്ക് ക്ലാൻസ്‌മാൻ' തുടങ്ങിയ ഫീച്ചർ ഫിലിം ഹിറ്റുകൾ ഒരുക്കിയ, ഓസ്‌കാർ പുരസ്‌കാരം നേടിയ പ്രൊഡക്ഷൻ ഫിനാൻസ് കമ്പനിയായ ക്യുസി എന്‍റർടെയിൻമെന്‍റാണ് (QC Entertainment) 'പോച്ചർ' നിർമിച്ചിരിക്കുന്നത്. ക്യുസി എന്‍റർടെയിൻമെന്‍റ് നിർമിച്ച ആദ്യത്തെ ടെലിവിഷൻ പരമ്പര എന്ന സവിശേഷതയുമായാണ് 'പോച്ചർ' പ്രേക്ഷകർക്കരികിൽ എത്തുന്നത്.
- " class="align-text-top noRightClick twitterSection" data="">
ബോളിവുഡ് നടിയും നിർമാതാവുമായ ആലിയ ഭട്ടാണ് ഈ ചിത്രത്തിന്‍റെ എക്‌സിക്യുട്ടീവ് പ്രൊഡ്യൂസർ. അതേസമയം യഥാര്‍ഥ സംഭവങ്ങളെ അടിസ്ഥാനമാക്കിയാണ് 'പോച്ചർ' അണിയിച്ചൊരുക്കിയിരിക്കുന്നത്. എട്ട് ഭാഗങ്ങളാണ് ഈ ക്രൈം സീരീസിൽ ഉള്ളത്.
ഇന്ത്യന്‍ ചരിത്രത്തിലെ ഏറ്റവും വലിയ ആനക്കൊമ്പ് വേട്ടയിലേക്കാണ് ഈ സീരീസ് വെളിച്ചം വീശുന്നത്. ആനക്കൊമ്പ് വേട്ടയും അതിന് പിന്നിലെ അന്വേഷണത്തിന്‍റെയും കഥയാകും 'പോച്ചർ' പറയുക. കോടതി രേഖകളുടെയും സാക്ഷ്യപത്രങ്ങളുടെയും അടിസ്ഥാനത്തിൽ, കേരളത്തിലെ നിബിഡ വനങ്ങളിലും ഡൽഹിയിലെ കോൺക്രീറ്റ് കാടുകളിലും നടന്ന സംഭവങ്ങളുടെ സാങ്കൽപ്പിക ദൃശ്യാവിഷ്‌കാരമാണിത്.
ഇന്ത്യൻ ഫോറസ്റ്റ് സർവീസ് ഓഫിസർമാർ, വൈൽഡ് ലൈഫ് ട്രസ്റ്റ് ഓഫ് ഇന്ത്യയിലെ എൻജിഒ പ്രവർത്തകർ, പൊലീസ് കോൺസ്റ്റബിൾമാർ, ആനക്കൊമ്പ് വേട്ട സംഘത്തെക്കുറിച്ച് അന്വേഷിക്കാൻ ജീവൻ പണയപ്പെടുത്തിയ സമരനേതാക്കൾ എന്നിവരുടെ മഹത്തായ സംഭാവനകളും ഈ പരമ്പര ഹൈലൈറ്റ് ചെയ്യുന്നുണ്ട് എന്നാണ് റിപ്പോർട്ടുകൾ. കഥയുടെ ആധികാരികത ഉയർത്തിപ്പിടിക്കുന്നതിന്‍റെ ഭാഗമായി കേരളത്തിലെയും ന്യൂഡൽഹിയിലെയും യഥാർഥ ജീവിത പശ്ചാത്തലത്തിലാണ് 'പോച്ചർ' ചിത്രീകരിച്ചത്.
പ്രേക്ഷകരുടെ ആവേശം ഇരട്ടിയാക്കുന്ന ട്രെയിലർ സീരീസിന്‍റെ മേക്കിങ്ങിലെ മികവും അഭിനേതാക്കളുടെ ത്രസിപ്പിക്കുന്ന പ്രകടനവും വാഗ്‌ദാനം ചെയ്യുന്നുണ്ട്. ആനകളെ നിരന്തരമായി നിഷ്‌കരുണം കൊല്ലുന്ന ഹൃദയഭേദകമായ യാഥാര്‍ഥ്യത്തിലേക്കും ട്രെയിലര്‍ ക്യാമറ തിരിക്കുന്നു. ഇത്തരം ക്രിമിനല്‍ പ്രവൃത്തികളുടെ നിശബ്‌ദ ഇരകളായ ആനകള്‍ക്ക് യഥാര്‍ഥത്തില്‍ അര്‍ഹമായ നീതി ലഭിക്കുമോ എന്ന ചോദ്യം പ്രേക്ഷകരിൽ ബാക്കിയാക്കിയാണ് ട്രെയിലർ അവസാനിക്കുന്നത്.
ALSO READ: എമ്മി ജേതാവിന്‍റെ സീരീസിൽ നിമിഷ സജയനും റോഷൻ മാത്യുവും; റിലീസിനൊരുങ്ങി ആമസോൺ ഒറിജിനൽ 'പോച്ചർ'
ഫെബ്രുവരി 23 മുതൽ 'പോച്ചർ' സ്‌ട്രീമിംഗ് ആരംഭിക്കും. ഇന്ത്യയിലും ലോകമെമ്പാടുമുള്ള 240 പ്രദേശങ്ങളിലും പ്രൈം വീഡിയോയിലൂടെ ആ സീരീസ് ആസ്വദിക്കാനാകും. ഇംഗ്ലീഷ്, തമിഴ്, തെലുഗു, കന്നഡ, ഹിന്ദി ഭാഷകളിലും 'പോച്ചർ' ലഭ്യമാകും. ഒപ്പം 35ലേറെ ഭാഷകളില്‍ സബ്ടൈറ്റിലുകളും ഉണ്ടായിരിക്കുമെന്ന് അണിയറ പ്രവർത്തകർ നേരത്തെ അറിയിച്ചിരുന്നു.
