ന്യൂഡല്‍ഹി : ഈ വര്‍ഷത്തെ പത്മ പുരസ്‌കാര ജേതാക്കള്‍ക്ക് പുരസ്‌കാരം രാഷ്‌ട്രപതി വിതരണം ചെയ്‌തു. ഡല്‍ഹിയിലെ രാഷ്‌ട്രപതി ഭവനിലാണ് ചടങ്ങ് നടന്നത്. എട്ട് മലയാളികളാണ് ഇക്കൊല്ലത്തെ പത്മ പുരസ്‌കാരങ്ങള്‍ക്ക് അര്‍ഹരായത്. ജസ്‌റ്റിസ് ഫാത്തിമ ബീവിക്കും ഒ രാജഗോപാലിനും പദ്‌മഭൂഷണ്‍ ലഭിച്ചു. സുപ്രീംകോടതിയിലെ ആദ്യ വനിത ജഡ്‌ജി ജസ്‌റ്റിസ് ഫാത്തിമ ബീവിക്ക് മരണാനന്തര ബഹുമതിയായാണ് പദ്‌മഭൂഷണ്‍ പ്രഖ്യാപിച്ചത്. പൊതുരംഗത്തെ സംഭാവനകള്‍ പരിഗണിച്ചാണ് മുന്‍ കേന്ദ്രമന്ത്രിയും ബിജെപി നേതാവുമായ ഒ രാജഗോപാലിന് പദ്‌മഭൂഷണ്‍ നല്‍കിയത്.
കഥകളി ആചാര്യന്‍ സദനം ബാലകൃഷ്‌ണന്‍, തെയ്യം കലാകാരന്‍ ഇ പി നാരായണന്‍, കാസര്‍കോട്ടെ നെല്‍കര്‍ഷകന്‍ സത്യനാരായണ ബലേരി, എഴുത്തുകാരനും വിദ്യാഭ്യാസ പ്രവര്‍ത്തകനുമായ പകരാവൂര്‍ ചിത്രന്‍ നമ്പൂതിരിപ്പാട് (മരണാനന്തരം) ആധ്യാത്മിക ആചാര്യന്‍ മുനി നാരായണ പ്രസാദ്, തിരുവിതാംകൂര്‍ രാജകുടുംബാംഗം അശ്വതി തിരുനാള്‍ ഗൗരി ലക്ഷ്‌മി ഭായ് എന്നീ മലയാളികളാണ് പദ്‌മശ്രീ പുരസ്‌കാരത്തിന് അര്‍ഹരായത്.
മുൻ ഉപരാഷ്‌ട്രപതി എം വെങ്കയ്യ നായിഡു, ഗായിക ഉഷാ ഉതുപ്പ്, നടൻ മിഥുൻ ചക്രവർത്തി, വ്യവസായി സീതാറാം ജിൻഡാൽ, മുൻ ഉത്തർപ്രദേശ് ഗവർണർ രാം നായിക്, സുലഭ് ഇന്‍റര്‍നാഷണല്‍ സ്ഥാപകൻ ബിന്ദേശ്വർ പഥക് (മരണാനന്തരം) എന്നിവര്‍ പത്മ അവാര്‍ഡ് ലഭിച്ചവരില്‍ ശ്രദ്ധേയരാണ്.
വൈസ് പ്രസിഡന്‍റ് ജഗ്‌ദീപ് ധൻഖർ, പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ എന്നിവരും മറ്റ് പ്രമുഖരും ചടങ്ങിൽ പങ്കെടുത്തു. എല്ലാ വര്‍ഷവും റിപ്പബ്ലിക് ദിനത്തിന്‍റെ തലേന്ന് പ്രഖ്യാപിക്കുന്ന രാജ്യത്തെ പരമോന്നത സിവിലിയൻ ബഹുമതികളിലൊന്നാണ് പത്മ അവാർഡുകൾ.
Also Read : 'പദ്‌മ പുരസ്‌കാരം കാരണവന്മാരുടെ കൃപ' ; പ്രതികരിച്ച് ഗൗരി ലക്ഷ്‌മിഭായ്
