ഹൈദരാബാദ്: വിവാഹഭ്യര്‍ഥന നിരസിച്ച യുവതിയെ കുത്തി കൊലപ്പെടുത്താന്‍ ശ്രമിച്ച യുവാവ് തലയ്‌ക്കടിയേറ്റ് മരിച്ച സംഭവത്തില്‍ നാല് പേര്‍ക്കെതിരെ കേസ്. തക്കല്ലപ്പള്ളി സ്വദേശിയായ യുവതിയുടെ അമ്മ സത്തവ്വ, അമ്മയുടെ അമ്മ, അച്ഛന്‍, മൂത്ത മകന്‍ എന്നിവര്‍ക്കെതിരെയാണ് കേസ്. ജഗിത്യാല സ്വദേശി മഹേഷാണ് (26) മരിച്ചത്.
ഇന്നലെയാണ് (മാര്‍ച്ച് 4) കേസിന് ആസ്‌പദമായ സംഭവം. ഏതാനും വര്‍ഷമായി സത്തവ്വയുടെ മകളോട് മഹേഷ്‌ വിവാഹാഭ്യര്‍ഥന നടത്തിയിരുന്നു. മകള്‍ അഭ്യര്‍ഥന നിരസിച്ചതോടെ മഹേഷ്‌ നിരന്തരം ശല്യം തുടര്‍ന്നു. ശല്യം അധികരിച്ചതോടെ യുവതി പൊലീസില്‍ ഇയാള്‍ക്കെതിരെ പരാതി നല്‍കി.
എന്നാല്‍ ഇതിന് ശേഷവും ഇയാള്‍ വിവാഹാഭ്യര്‍ഥന തുടര്‍ന്നു. യുവതി അഭ്യര്‍ഥന സ്വീകരിക്കില്ലെന്ന് മനസിലാക്കിയ മഹേഷ്‌ തിങ്കളാഴ്‌ച യുവതിയുടെ വീട്ടിലെത്തി. കത്തി കൈയില്‍ കരുതി വീട്ടിലെത്തിയ മഹേഷ്‌ യുവതി ആക്രമിക്കാന്‍ ശ്രമിച്ചു.
ഇതോടെ തടയാനെത്തിയ അമ്മയെയും മുത്തച്ഛനെയും സഹോദരനെയും മഹേഷ്‌ ആക്രമിച്ചു. ഇത് എതിര്‍ക്കുന്നതിനിടെ കല്ലുകൊണ്ട് തലയ്‌ക്ക് അടിയേറ്റ യുവാവ് മരിക്കുകയായിരുന്നു. സംഭവത്തിന് പിന്നാലെ മഹേഷിന്‍റെ കുടുംബം പൊലീസില്‍ പരാതി നല്‍കി.
Also Read : ആന്ധ്രാപ്രദേശിൽ പത്ത് ലക്ഷം രൂപയുടെ ക്യാമറയ്ക്ക് വേണ്ടി യുവ ഫോട്ടോഗ്രാഫറെ കൊന്നു; രണ്ട് പേർ കസ്റ്റഡിയിൽ
പരാതിയുടെ അടിസ്ഥാനത്തിലാണ് കുടുംബത്തിനെതിരെ പൊലീസ് കേസെടുത്തത്. അതേസമയം, മഹേഷിന്‍റെ ആക്രമണത്തില്‍ പരിക്കേറ്റ കുടുംബത്തെ ആശുപത്രിയില്‍ പ്രവേശിപ്പിച്ചു. ഗുരുതര പരിക്കേറ്റ മുത്തച്ഛനെ വിദഗ്‌ധ ചികിത്സ നല്‍കാനായി ഡോക്‌ടറുടെ നിർദേശപ്രകാരം കരിംനഗർ ആശുപത്രിയിലേക്ക് മാറ്റി.
