वर्ध्यात बैल पोळा उत्साहात साजरा, ढोल ताशाच्या गजरात काढण्यात आली सर्जाराजाची मिरवणूक

वर्धा- शेतकऱ्यांचा अतिशय जिव्हाळ्याचा सण. वर्षभर शेतात धन्यासाठी राबणाऱ्या बैलांप्रती एकप्रकारे कृतज्ञता व्यक्त करणारा हा सण आहे. वर्ध्यात भगतसिंग मैदानावर मागील 20 वर्षापासून साजरा होणारा बैल पोळा यंदाही मोठ्या उत्साहात पार पडला.

बैल ऊन असो की पाऊस, मालकासोबत शेतात राबतो. या जिवाभावाच्या सहकाऱ्याप्रती कृतज्ञता व्यक्त करण्याचा दिवस म्हणचे पोळा होय. पोळ्याच्या पूर्वसंध्येला कुणी शेतात नेऊन तर कुणी नदीमध्ये तर कुणी घरीच बैलांना आंघोळ घालतात. त्यांना वेगवेगळे रंग लावून रंगवले जाते. पोळ्याला आकर्षक साज चढवत ढोल-ताशांच्या गजरात मिरवणूक काढत मैदानावर आणले जाते. यावेळी सर्जा राजाला पाहण्यासाठी मोठी गर्दी होती. यावेळी मान्यवरांच्या हस्ते बैल जोडीची पूजा करण्यात आली.

आमदार पंकज भोयर, जिल्हाधिकारी विवेक भिमनवार या कार्यक्रमाला उपस्थित होते. भगतसिंग व्यायाम मंडळाचे पदाधिकारीही मंचावर उपस्थित होते. सुरुवातीचा काळ वगळता मध्यंतरी झालेल्या समाधानकारक पावसाने शेतकऱ्यांना थोडे हायसे वाटत होते. यंदाच्या वर्षात चांगले उत्पादन येवो, बळीराजा सुखी होवो, अशा शुभेच्छा जिल्हाधिकारी विवेक भिमनवार आणि आमदार पंकज भोयर यांनी दिल्या आहेत.