मुंबई New Year २०२४ Celebratration : नवीन वर्षाचं स्वागत आणि त्यालाच लागून सुट्ट्या आल्यानं सध्या मुंबईकर कोकण, गोवा अशा विविध ठिकाणी पर्यटनाला गेले आहेत. (new year plan) असं असलं तरी मुंबईत देखील नव्या वर्षाच्या स्वागताचा माहोल हा जोरातच असतो. मुंबईत थर्टी फर्स्ट कुठे एन्जॉय करता येईल याची माहिती सविस्तर खाली दिलेली आहे.
गेट वे ऑफ इंडिया, वरळी सी लिंक आणि इतर : तुम्हाला नवीन वर्षाच्या निमित्ताने फक्त फोटोशूट करायचं असेल आणि त्यात आकर्षक रोषणाई हवी असेल तर आम्ही आता जी तुम्हाला ठिकाणं सांगतोय ती परफेक्ट स्पॉट आहेत. नवीन वर्षाच्या स्वागतासाठी गेटवे ऑफ इंडिया येथे आकर्षक रोषणाई करण्यात आली असून संध्याकाळच्या वेळेत तुम्ही इथे गेल्यास तुम्हाला फोटोशूटसाठी हा एक परफेक्ट स्पॉट मिळेल. दुसरं म्हणजे वरळी सी लिंक. याला देखील आकर्षक रोषणाई करण्यात आली असून, येथे फटाक्यांची आतषबाजी देखील केली जाते. त्यामुळे तुम्हाला फक्त फोटो काढून सेलिब्रेशन करायचं असेल तर इथे जाऊ शकता. सोबतच छत्रपती शिवाजी महाराज टर्मिनस, बृहन्मुंबई महानगरपालिका मुख्यालय, मंत्रालय अशा शासकीय इमारतींना देखील आकर्षक विद्युत रोषणाई करण्यात आली आहे.
गार्डन, बीच, चौपाट्या : नवीन वर्षाच्या स्वागतासाठी शांत निसर्गरम्य वातावरण, समोर खवळलेला समुद्र आणि भेळ किंवा शेवपुरी असं कॉम्बिनेशन तुमच्या नजरेत शोधत असाल तर मुंबईतले बीच चौपाटी आणि गार्डन तुमच्यासाठी एक उत्तम पर्याय आहेत. नवीन वर्षाच्या स्वागतासाठी मुंबईतील गार्डन तसेच चौपाट्यांवर देखील विशेष तयारी करण्यात आली आहे. इथे देखील विद्युत रोषणाई, फूड स्टॉल लावण्यात आले आहेत. त्यामुळे तुमच्या मित्र परिवारासोबत किंवा प्रियजनांसोबत अशा एखाद्या स्पॉटच्या शोधात असाल तर दादर, वांद्रे आणि मलबार हिल तुमच्यासाठी योग्य ठिकाण आहे.
हॉटेल, रेस्टॉरंट सज्ज : नवीन वर्षाच्या स्वागतासाठी विविध हॉटेल आणि रेस्टॉरंट व्यापाऱ्यांनी देखील विविध स्पेशल पदार्थ आपल्या मेनूमध्ये दाखल केले आहेत. विविध ऑफर्स हॉटेल आणि रेस्टॉरंट कडून देण्यात आले आहेत. त्यामुळे नव्या वर्षाच्या स्वागतासाठी तुम्ही बाहेर जेवायला जाण्याचा प्लॅन करत असाल तर तुमच्या जवळच्या भागातील हॉटेल आणि रेस्टॉरंट बद्दल जरूर माहिती घ्या आणि आपला थर्टी फर्स्ट एन्जॉय करा.
बार, पब : नवीन वर्षाचे स्वागत म्हटलं की तळीराम हे आलेच. त्यामुळे या तळीरामांना आकर्षित करण्यासाठी बार आणि पब मालकांनी विशेष ऑफर दिल्या आहेत. विशेष म्हणजे, हे बार आणि पब ख्रिसमसच्या आधीच हाउसफुल झाल्याचे चित्र सध्या मुंबईत पाहायला मिळत आहे. अनेकदा सेलिब्रेशनच्या नावाखाली तरुण वर्ग नशा करून रस्त्यांवर हुल्लडबाजी करत असतो आणि त्याचा त्रास सामान्य माणसाला सहन करावा लागतो. त्यामुळे अशा तळीरामांवर लक्ष ठेवण्यासाठी मुंबई पोलीस देखील डोळ्यात तेल घालून सज्ज आहेत. त्यामुळे तुमच्या आसपास असा एखादा तळीराम असेल तर त्याला हे माहिती नक्की सांगा.
हेही वाचा:
- फडणवीस यांच्या अयोध्या वक्तव्यावरील प्रश्नाला मुख्यमंत्र्यांनी दिली बगल, फोटोसेशनवरुन विरोधकांच्या टीकेलाही चोख प्रत्युत्तर
- आधुनिक भारताच्या ट्रेनची जालन्यातून सुरूवात, राम लोकांच्या मनातनं तुम्ही काढूच शकत नाही - देवेंद्र फडणवीस
- 'वंदे भारत'वरुन संभाजीनगर रेल्वे स्थानकावर 'महाभारत'; एकीकडं कार्यकर्ते भिडले, दुसरीकडं नेते चहापानात रमले
