പെൻസിൽവാനിയ (യുഎസ്): 80 ശതമാനം സ്‌ത്രീകളും പ്രസവശേഷം കുഞ്ഞുങ്ങൾക്ക് മുലയൂട്ടുന്നവരാണ്. എന്നാൽ, പ്രസവശേഷം ആറ് മാസത്തോളം കുഞ്ഞുങ്ങൾക്ക് മുലയൂട്ടുന്ന സ്‌ത്രീകൾ വെറും 25 ശതമാനം മാത്രമാണെന്നാണ് പഠനങ്ങൾ. ഒറ്റപ്പെടലും തൊഴിൽപരമായ സമ്മർദങ്ങളും മറ്റും മുലയൂട്ടൽ കുറയുന്നതിന് കാരണമാകുന്ന ചില ഘടകങ്ങളാണ്.
അമിതവണ്ണം പ്രശ്‌നമാണ്: എന്നിരുന്നാലും, ആവശ്യത്തിന് പാൽ ഉൽപ്പാദിപ്പിക്കുന്നതിലെ ശാരീരിക പ്രശ്‌നങ്ങളാണ് സ്‌ത്രീകൾ മുലയൂട്ടൽ നിർത്തുന്നതിനുള്ള പ്രധാന കാരണങ്ങളിലൊന്ന്. അമിതവണ്ണം മുലയൂട്ടുന്ന സ്‌ത്രീകളിലെ പാലുൽപ്പാദനം കുറയ്‌ക്കുമെന്ന് പഠനത്തിൽ കണ്ടെത്തി. പെൻ സ്റ്റേറ്റ്, യൂണിവേഴ്‌സിറ്റി ഓഫ് സിൻസിനാറ്റി എന്നിവിടങ്ങളിൽ നിന്നുള്ള സമീപകാല പഠനത്തിന്‍റെ റിപ്പോർട്ടുകൾ ദി ജേണൽ ഓഫ് ന്യൂട്രീഷനിൽ പ്രസിദ്ധീകരിച്ചു.
മുലയൂട്ടുന്ന സ്ത്രീകളിൽ വേണ്ടത്ര പാൽ ഉൽപ്പാദിപ്പിക്കാത്തതിന് അമിതവണ്ണം പ്രധാന കാരണമാണ്. അമിതവണ്ണം ദീർഘകാല വീക്കത്തിന് കാരണമാകുന്നു. ഇത് ശരീരത്തിലെ കൊഴുപ്പിൽ തുടങ്ങി രക്തചംക്രമണം വഴി ശരീരത്തിലുടനീളം വ്യാപിക്കുന്നു. രക്തത്തിൽ നിന്ന് ശരീരകലകളിലേക്ക് ഫാറ്റി ആസിസുകൾ ആഗിരണം ചെയ്യുന്നതിനെ വീക്കം തടസ്സപ്പെടുത്തുമെന്ന് ഗവേഷണത്തിൽ തെളിയിച്ചു.
ഫാറ്റി ആസിഡുകൾ അത്യന്താപേക്ഷിതം: ശരീരത്തിനാവശ്യമായ ഊർജം നിലനിർത്തുന്നതിന് ഫാറ്റി ആസിഡുകൾ അത്യന്താപേക്ഷിതമാണ്. മുലയൂട്ടുന്ന സ്‌ത്രീകളിലെ ഫാറ്റി ആസിഡുകൾ കുഞ്ഞിന്‍റെ വളർച്ചയെ സഹായിക്കുന്നു. പാൽ ഉൽപ്പാദിപ്പിക്കുന്ന സസ്‌തന ഗ്രന്ഥികൾ (mammary glands) ഫാറ്റി ആസിഡുകൾ ആഗിരണം ചെയ്യുന്നത് വീക്കം മൂലം തടസ്സപ്പെടുന്നു. ഇത് പാൽ ഉൽപ്പാദനത്തെ പ്രതികൂലമായി ബാധിക്കുമെന്ന് ഗവേഷകർ അനുമാനിക്കുന്നു.
ഫാറ്റി ആസിഡുകളുടെ ആഗിരണത്തെ വീക്കം തടയുന്നുണ്ടോ എന്ന് പരിശോധിക്കുന്നതിനായി പെൻ സ്റ്റേറ്റിലെ നുട്രീഷണൽ സയൻസിലെ പോസ്റ്റ് ഡോക്‌ടറൽ ഫെലോ റേച്ചൽ വാക്കറിന്‍റെ നേതൃത്വത്തിൽ ഗവേഷകർ വിശകലനം നടത്തി. സിൻസിനാറ്റി ചിൽഡ്രൻസ് ഹോസ്‌പിറ്റലിലും യൂണിവേഴ്‌സിറ്റി ഓഫ് സിൻസിനാറ്റിയിലും നടത്തിയ പഠനത്തിൽ നിന്നാണ് ഗവേഷകർ രക്തവും പാലും വിശകലനം ചെയ്‌തത്.
പഠനങ്ങൾ തെളിയിച്ചു: പഠനത്തിൽ ഗവേഷകർ പാൽ ഉൽപ്പാദനം വളരെ കുറവുള്ള 23 സ്ത്രീകളെയും മിതമായ പാൽ ഉൽപ്പാദനം ഉള്ള 20 സ്ത്രീകളെയും അവശ്യ അളവിൽ പാലുൽപ്പാദനമുള്ള 18 സ്ത്രീകളെയും റിക്രൂട്ട് ചെയ്‌തു. ഗവേഷകർ രക്തത്തിലെയും മുലപ്പാലിലെയും ഫാറ്റി ആസിഡുകളെ വിശകലനം ചെയ്‌തു. പാലുൽപ്പാദനം താരതമ്യം ചെയ്‌ത് നടത്തിയ പരിശേധനയിൽ പാലുൽപ്പാദനം കുറവുള്ള സ്ത്രീകളിൽ ഫാറ്റി ആസിഡിന്‍റെ അനുപാതം താരതമ്യേന കുറവാണെന്ന് കണ്ടെത്തി.
കഴിക്കുന്ന ഫാറ്റി ആസിഡുകളും രക്തത്തിലെ ഫാറ്റി ആസിഡുകളും തമ്മിൽ ബന്ധമുണ്ടെന്ന് വാക്കർ പറഞ്ഞു. സാൽമൺ ധാരാളം കഴിക്കുകയാണെങ്കിൽ, അവരുടെ രക്തത്തിൽ ഒമേഗ-3 കൂടുതൽ കാണപ്പെടും. ധാരാളം ബർഗറുകൾ കഴിക്കുകയാണെങ്കിൽ അവരുടെ രക്തത്തിൽ കൂടുതൽ കാണപ്പെടുന്നത് അനാരോഗ്യകരമായ കൊഴുപ്പായിരിക്കും. രക്തത്തിലെ ഫാറ്റി ആസിഡുകൾ മുലപ്പാലിലും കാണപ്പെടുന്നുണ്ടോ എന്നും പഠനത്തിൽ പരിശോധിച്ചു. രക്തവും മുലപ്പാലും തമ്മിലുള്ള പരസ്‌പര ബന്ധം അറിയുന്നതിനായിരുന്നു ഇത്. തുടർന്ന് രക്തത്തിൽ കാണപ്പെടുന്ന മിക്ക ഫാറ്റി ആസിഡുകളും മുലപ്പാലിലും ഉണ്ടെന്ന് കണ്ടെത്തി.
എന്നാൽ, ദീർഘകാല വീക്കം ഉള്ളവരിൽ അത്തരത്തിലുള്ള പരസ്‌പര ബന്ധം ഏതാണ്ട് പൂർണമായും ഇല്ലാതായി എന്ന് കണ്ടെത്തി. വിട്ടുമാറാത്ത വീക്കമുള്ള സ്ത്രീകളിൽ ഫാറ്റി ആസിഡുകൾക്ക് സസ്‌തന ഗ്രന്ഥിയിൽ പ്രവേശിക്കാൻ കഴിയില്ല എന്നതിന്‍റെ തെളിവാണിത്. അമിതവണ്ണമുള്ള സ്‌ത്രീകൾക്ക് മുലയൂട്ടുന്ന കാലയളവ് ഇതുമൂലം കുറയാനുള്ള സാധ്യത കൂടുതലാണെന്ന് ഗവേഷണങ്ങൾ തെളിയിച്ചു.
മുലയൂട്ടൽ കുറയുമ്പോൾ അത് പല ആരോഗ്യപ്രശ്‌നങ്ങളിലേക്കും നയിക്കുന്നു. സ്ത്രീകളിൽ ഇത് വിട്ടുമാറാത്ത രോഗത്തിനുള്ള സാധ്യതക്കും കുഞ്ഞിന് അണുബാധയ്‌ക്കുള്ള സാധ്യതക്കും കാരണമായേക്കാം.
Also read: കുട്ടികളിൽ ശ്വാസോച്ഛ്വാസത്തിലൂടെ രോഗം പടരാനുള്ള സാധ്യത കുറവാണെന്ന് പഠനങ്ങൾ
