ന്യൂഡല്‍ഹി: പ്രായപൂര്‍ത്തിയായ കൊവിഡ് രോഗികളുടെ ചികിത്സയ്ക്കായി മൂക്കിലടിക്കുന്ന സ്പ്രേ പുറത്തിറക്കി മുബൈ ആസ്ഥാനമാക്കി പ്രവര്‍ത്തിക്കുന്ന മരുന്ന് കമ്പനി ഗ്ലെന്‍മാര്‍ക്ക്. നൈട്രിക് ഓക്സൈഡ് നാസല്‍ സ്പ്രേയാണ് സനോടൈസ് (SaNOtize) എന്ന പ്രമുഖ ബയോടെക് കമ്പനിയുമായി ചേര്‍ന്ന് ഗ്ലെന്‍മാര്‍ക്ക് പുറത്തിറക്കിയത്. നാസല്‍ സ്പ്രെയുടെ ഉത്പാദനത്തിനും വിതരണത്തിനുമുള്ള അനുമതി ഡ്രഗ് കണ്‍ട്രോളര്‍ ജനറല്‍ ഓഫ് ഇന്ത്യ നല്‍കി.
നാസല്‍ സ്പ്രെയുടെ ഫേസ് 3 ട്രയലിലെ വിവരങ്ങളില്‍ നിന്ന് മനസിലായത് സ്പ്രെ അടിച്ചതിന് ശേഷം 24 മണിക്കൂറിനുള്ളില്‍ വൈറല്‍ ലോഡ് 94 ശതമാനവും 48 മണിക്കൂറിനുള്ളില്‍ 99 ശതമാനവും കുറഞ്ഞു എന്നാണ്. സ്പ്രെയ്ക്ക് പാര്‍ശ്വഫലങ്ങളില്ലെന്നും കമ്പനിയുടെ വാര്‍ത്തകുറിപ്പില്‍ വ്യക്തമാക്കി. 'ഫാബിസ്പ്രെ' എന്ന പേരിലാണ് സ്പ്രെ കമ്പനി പുറത്തിറക്കുക.
മൂക്കിലടിക്കുമ്പോള്‍ കൊവിഡ് വൈറസുകളുടെ ഒരു തടയായി ഫാബിസ്പ്രെ പ്രവര്‍ത്തിക്കുമെന്നും ഫാബിസ്പ്രെ ശ്വാസ നാളങ്ങളിലെ കൊവിഡ് വൈറസിനെ നശിപ്പിക്കുമെന്നും കമ്പനി അവകാശപ്പെടുന്നു. കൊവിഡ് ചികിത്സയില്‍ നിര്‍ണായക പങ്കുവഹിക്കാന്‍ ഈ നാസല്‍ സ്പ്രെയ്ക്ക് സാധിക്കുമെന്നും ഗ്ലെന്‍മാര്‍ക്ക് അധികൃതര്‍ പറഞ്ഞു.
യുഎസ്എയിലെ യൂട്ടാ സ്റ്റേറ്റ് യൂണിവേഴ്സിറ്റി നടത്തിയ പഠനപ്രകാരം നൈട്രിക് ഓക്സൈഡ് നാസല്‍ സ്പ്രെ 99.9 ശതമാനം കൊവിഡ് വൈറസുകളെ രണ്ട് മിനിട്ടിനുള്ളില്‍ നശിപ്പിക്കുമെന്നാണ്. കൊവിഡ് പിടിപെട്ട് ആദ്യഘട്ടത്തില്‍ തന്നെ ഈ നാസല്‍ സ്പ്രെ നല്‍കി വൈറസ് ലോഡ് കുറയ്ക്കുകയാണെങ്കില്‍ കൊവിഡിന്‍റെ വ്യാപാനം കുറയ്ക്കാന്‍ സാധിക്കുമെന്നും ഗ്ലെന്‍മാര്‍ക്ക് അധികൃതര്‍ വ്യക്തമാക്കി.
ALSO READ: വ്യായാമവും ലൈംഗികതയും തമ്മിലെന്ത് ; അറിയാം പഠനം പറയുന്നത്
