തൃശൂർ ചാവക്കാട് വീണ്ടും തെരുവ് നായകളുടെ ആക്രമണം, ഏഴ് ആടുകളെ കടിച്ച് കൊന്ന് നായക്കൂട്ടം

തൃശൂര്‍: ചാവക്കാട് വീണ്ടും തെരുവ് നായകളുടെ ആക്രമണം. ബ്ലാങ്ങാട് ബീച്ചിലെ ഏഴ് ആടുകളെ നായക്കൂട്ടം കടിച്ചുകൊന്നു. ഇന്ന്(12.08.2022) പുലർച്ചെയാണ് സംഭവം. ബ്ലാങ്ങാട് ബീച്ച് പരീത് സാഹിബ്‌ റോഡ് സ്വദേശി ജമീലയുടെ ആടുകളെയാണ് കൂട്ടമായെത്തിയ തെരുവ് നായകൾ ആക്രമിച്ച് കൊലപ്പെടുത്തിയത്.

പുലർച്ചെ ആടുകളുടെ കൂട്ട കരച്ചിൽ കേട്ട് കുടുംബം പുറത്തിറങ്ങി നോക്കുകയായിരുന്നു. കൂട്ടിൽ വളർത്തിയിരുന്ന ആടുകളെ കൂട് പൊളിച്ച് അകത്തു കടന്നാണ് തെരുവ് നായക്കൂട്ടം കൊന്നൊടുക്കിയത്. ഒരു ആടിന്‍റെ ചെവി കടിച്ച് മുറിച്ച് പരിക്കേൽപ്പിച്ചിട്ടുമുണ്ട്.

ഇന്നലെ(11.08.2022) അഞ്ചങ്ങാടിയിൽ വീട്ടിൽ വളർത്തിയിരുന്ന ഏഴ് കോഴികളെയും തെരുവ് നായകൾ ആക്രമിച്ച് കൊന്നിരുന്നു. മൂന്ന് ദിവസം മുൻപ് ഗുരുവായൂരിൽ ദർശനത്തിനെത്തിയ എട്ട് പേരെ തെരുവ് നായ ആക്രമിച്ചിരുന്നു. ഗുരുവായൂർ, ചാവക്കാട് മേഖലകളിലെ തെരുവ് നായകളുടെ ആക്രമണത്തിൽ ഭീതിയിലാണ് ജനങ്ങൾ.