ചാവക്കാട് കടപ്പുറത്ത് ഇക്കൊല്ലം കടലാമകളെത്തിയില്ല; ആശങ്കയോടെ കടലാമ സംരക്ഷകര്‍

തൃശൂര്‍: കേരളത്തിൽ ഏറ്റവുമധികം കടലാമകൾ മുട്ടയിടുന്ന കടല്‍ത്തീരം എന്ന ഖ്യാതിയുള്ള ചാവക്കാട് കടപ്പുറത്ത് ഇക്കൊല്ലം കടലാമകള്‍ മുട്ടയിടാൻ എത്തിയില്ല. മുൻവർഷങ്ങളിൽ ഇതേസമയത്ത് നൂറുകണക്കിന് കടലാമകളാണ് ഇവിടെ എത്തിയിരുന്നത്. ഇക്കൊല്ലം ഒന്നും പോലും എത്താത്തതിനെ ആശങ്കയോടെ നോക്കി കാണുകയാണ് കടലാമ സംരക്ഷകർ. സാധാരണ ഒക്ടോബർ മാസത്തിന്‍റെ അവസാനമാണ് കടലാമകൾ മുട്ടായിടാനായി കൂട്ടത്തോടെ തൃശൂർ ജില്ലയിലെ ചാവക്കാട് എടക്കഴിയൂർ തീരത്ത് എത്താറുള്ളത്. ആഗോളകാലാവസ്ഥ വ്യതിയാനത്തെത്തുടര്‍ന്ന് കേരളത്തിന്‍റെ തീരപ്രദേശങ്ങളില്‍ മുട്ടയിടാനെത്തുന്ന ആമകളുടെ എണ്ണത്തില്‍ ഗണ്യമായി കുറവ് വന്നിട്ടുണ്ടെന്നാണ് പരിസ്ഥിതി പ്രവര്‍ത്തകര്‍ പറയുന്നത്.

ഒലിവ് റിഡ്​ലി വിഭാഗത്തില്‍പെടുന്ന കടലാമകളാണ് ഈ സമയങ്ങളില്‍ പൊതുവേ കേരള തീരങ്ങളില്‍ കാണപ്പെടുന്നത്. ശ്രീലങ്കൻ തീരത്തുനിന്നാണ് ഇവ കേരളത്തിലെ തീരപ്രദേശങ്ങളിലേക്ക് എത്തുന്നത്. എന്നാല്‍ സമുദ്രമലിനീകരണം പോലെയുള്ള പ്രശ്നങ്ങള്‍ കടലാമകളുടെ ആവാസവ്യവസ്ഥയ്ക്ക് ഭീഷണിയാകുന്നുവെന്ന് സംരക്ഷകര്‍ വിലയിരുത്തുന്നു. കടലിൽ ഉപേക്ഷിക്കപ്പെടുന്ന പ്ലാസ്റ്റിക് മാലിന്യം മുതൽ അനധികൃത മത്സ്യബന്ധന മാർഗങ്ങൾ വരെ ഈ ചെറു ജീവികളുടെ ഉന്മൂലനത്തിനു വഴിവെക്കുന്നുണ്ടെന്നും സംരക്ഷകര്‍ പറയുന്നു.