തൃശൂര്‍: ആനപ്രേമികളെ കണ്ണീരിലാഴ്ത്തി മധ്യകേരളത്തിലെ ഉത്സവങ്ങളിലെ സജീവ സാന്നിധ്യമായിരുന്ന കൊമ്പൻ, ഒളരിക്കര കാളിദാസൻ ചരിഞ്ഞു. 35 വയസായിരുന്നു. കുന്നംകുളം കടവല്ലൂരില്‍ വച്ച് തളര്‍ച്ച അനുഭവപ്പെട്ടതിനെ തുടര്‍ന്നായിരുന്നു അന്ത്യം.
2004ലായിരുന്നു കാളിദാസനെ മലപ്പുറം അങ്ങാടിപ്പുറം തിരുമാന്ധാംകുന്ന് ക്ഷേത്രത്തില്‍ നിന്ന് തൃശൂര്‍ ഒളരിക്കര ദേവസ്വം സ്വന്തമാക്കുന്നത്. കഴിഞ്ഞ കുറച്ച് ദിവസങ്ങളായി നീരിലായതിനാല്‍ കുന്നംകുളം കടവല്ലൂരിലെ പറമ്പില്‍ കെട്ടിയിരിക്കുകയായിരുന്നു. നീരില്‍ നിന്ന് അഴിച്ചതിന് ശേഷം പൂര്‍ണ ആരോഗ്യവാനായിരുന്നു കാളിദാസന്.
എന്നാല്‍, രണ്ട് ദിവസം മുന്‍പ് പെട്ടന്ന് പനിയും തളര്‍ച്ചയും അനുഭവപ്പെടുകയായിരുന്നു. ഇതേതുടര്‍ന്ന്, ചികിത്സയിലിരിക്കെ ഇന്നലെ വൈകിട്ടോടുകൂടിയായിരുന്നു അന്ത്യം. കുറുമ്പ് ഏറെയുണ്ടെങ്കിലും കാളിദാസന് ആരാധകര്‍ ഏറെയാണ്. ജൂനിയർ ശിവസുന്ദർ എന്ന വിളിപ്പേരും കാളിദാസനുണ്ട്.
നിലത്തിഴയുന്ന തുമ്പിയും വിരിഞ്ഞ മസ്‌തകവും വിടർന്ന ചെവികളും എടുത്തുയർത്തിയ കൊമ്പുകളും കാളിദാസന്‍റെ സൗന്ദര്യ തികവുകളായിരുന്നു. കടവല്ലൂരില്‍ നിന്ന് ഒളരിക്കര ക്ഷേത്ര മെെതാനിലെത്തിച്ച് പൊതു ദര്‍ശനത്തിന് വച്ച മൃതദേഹത്തില്‍ ആന പ്രേമികളുള്‍പെടെ നൂറ് കണക്കിന് പേര്‍ അന്ത്യാഞ്ജലിയര്‍പ്പിച്ചു. പൊതുദര്‍ശനത്തിന് ശേഷം സംസ്‌കാരത്തിനായി മൃതദേഹം കോടനാട്ടേക്ക് കൊണ്ടുപോയി.
