തിരുവനന്തപുരം: ചലച്ചിത്ര പിന്നണി ഗായിക മഞ്ജരി വിവാഹിതയായി. ആക്കുളത്ത് വച്ചായിരുന്നു വിവാഹം. മഞ്ജരിയുടെ ബാല്യകാല സുഹൃത്തായ ജെറിൻ ആണ് വരൻ. ഒന്നാം ക്ലാസ് മുതൽ ഒരുമിച്ചു പഠിച്ചവരാണ് മ‍ഞ്ജരിയും ജെറിനും.
മസ്‌കത്തില്‍ ആയിരുന്നു ഇരുവരുടെയും പ്രാഥമിക വിദ്യാഭ്യാസം. ബെംഗളൂരുവില്‍ സ്വകാര്യ സ്ഥാപനത്തിലെ എച്ച്ആർ മാനേജർ ആയി ജോലി ചെയ്യുകയാണ് ജെറിൻ. പത്തനംതിട്ട സ്വദേശിയാണ്. വിവാഹ ചടങ്ങിന് ശേഷം ഗോപിനാഥ് മുതുകാടിന്‍റെ മാജിക് അക്കാഡമിയിലെ ഭിന്നശേഷി വിദ്യാർത്ഥികൾക്കൊപ്പമാവും വിരുന്ന് സൽകാരം. വ്യാഴാഴ്‌ച രാവിലെയാണ് വിവാഹ വിവരം മഞ്ജരി തന്‍റെ സമൂഹമാധ്യമങ്ങളിലൂടെ ആരാധകരെ അറിയിച്ചത്.
വിവാഹവാര്‍ത്തയ്‌ക്കൊപ്പം ഇന്‍സ്റ്റഗ്രാമിലൂടെ മെഹന്ദി ചടങ്ങിന്‍റെ ഒരു റീല്‍ വീഡിയോയും മഞ്ജരി പങ്കുവച്ചിരുന്നു. സത്യൻ അന്തിക്കാട് സംവിധാനം ചെയ്ത 'അച്ചുവിന്‍റെ അമ്മ'എന്ന ചിത്രത്തിലെ 'താമരക്കുരുവിക്കു തട്ടമിട്' എന്ന ജനപ്രിയ ഗാനം പാടി മലയാള സിനിമ പിന്നണി ഗാനരംഗത്തേക്ക് എത്തിയ ഗായികയാണ് മഞ്ജരി.
also read: ഗായിക മഞ്ജരിക്ക് വെള്ളിയാഴ്‌ച വിവാഹം ; വിരുന്ന് ഭിന്നശേഷി കുട്ടികള്‍ക്ക്‌ ഒപ്പം
