തിരുവനന്തപുരം: ജൂണിൽ സ്‌കൂളുകൾ തുറക്കുന്ന സാഹചര്യത്തിൽ മുന്നൊരുക്ക നടപടികളുമായി സംസ്ഥാന സർക്കാർ. സ്‌കൂളുകൾ തുറക്കുന്നതിന് മുന്നോടിയായി റോഡിൽ അപകടകരമാം വിധം സ്ഥാപിച്ചിട്ടുള്ള കൊടിതോരണങ്ങൾ, പ്രചാരണ സാമഗ്രികൾ തുടങ്ങിയവ നീക്കം ചെയ്യണമെന്ന് മുഖ്യമന്ത്രി പിണറായി വിജയൻ നിർദേശം നൽകി. സ്‌കൂളുകൾക്ക് സമീപം മുന്നറിയിപ്പ് ബോർഡുകളും ട്രാഫിക് സൈൻ ബോർഡുകളും സ്ഥാപിക്കണമെന്നും അദ്ദേഹം പറഞ്ഞു.
മുഖ്യമന്ത്രിയുടെ മറ്റ് നിർദേശങ്ങൾ: നടപ്പാതകളിൽ യാത്രാതടസം സൃഷ്‌ടിക്കരുത്. മോട്ടോർ വാഹന വകുപ്പിൻ്റെ മാനദണ്ഡങ്ങൾ പാലിച്ച് സ്‌കൂൾ ബസുകൾ സർവീസ് നടത്തണം. സ്‌കൂളുകൾക്ക് സമീപത്തെ കടകളിൽ ലഹരി പദാർഥങ്ങൾ വിൽക്കുന്നില്ലെന്ന് ഉറപ്പുവരുത്തണം. കുട്ടികൾ സ്‌കൂളിൽ എത്തിയില്ലെങ്കിൽ അധ്യാപകർ രക്ഷിതാക്കളെ വിളിച്ച് വിവരം തിരക്കണം.
'കെ.എസ്.ഇ.ബി സുരക്ഷ ഉറപ്പുവരുത്തണം': മഴക്കാലമായതിനാൽ സ്‌കൂൾ പരിസരത്ത് അപകടകരമായ നിലയിൽ നിൽക്കുന്ന മരങ്ങൾ മുറിച്ചു മാറ്റണം. ഇലക്ട്രിക് കമ്പികൾ താഴ്ന്ന് കിടക്കാത്ത തരത്തിൽ പരിശോധിച്ച് സുരക്ഷ ഉറപ്പാക്കണം. ഇവയിൽ നിന്ന് ഷോക്കേൽക്കാൻ സാധ്യതയില്ലെന്ന് കെ.എസ്.ഇ.ബി ഉറപ്പുവരുത്തണമെന്നും മുഖ്യമന്ത്രി നിർദേശം നൽകി.
രക്ഷിതാക്കൾ വരുന്ന വാഹനങ്ങൾ പാർക്ക് ചെയ്യാൻ സ്‌കൂളുകൾ തന്നെ സൗകര്യം കണ്ടെത്തണം. സ്വകാര്യ - ടാക്‌സി വാഹനങ്ങൾ കുട്ടികൾ വരുന്നതുവരെ നിർത്തിയിടുന്നെങ്കിൽ അതിനുള്ള സൗകര്യവും സ്‌കൂളുകള്‍ അധികൃതർ ഏർപ്പെടുത്തണമെന്നും യോഗത്തിൽ മുഖ്യമന്ത്രി നിർദേശം നൽകി. യോഗത്തിൽ മന്ത്രിമാരായ എം.വി ഗോവിന്ദൻ, റോഷി അഗസ്റ്റിൻ, വി.ശിവൻകുട്ടി, വീണ ജോർജ്, ചീഫ് സെക്രട്ടറി തുടങ്ങിയവർ പങ്കെടുത്തു.
