തിരുവനന്തപുരം : കരുവന്നൂര്‍ സഹകരണ ബാങ്കിലുണ്ടായ (Karuvannur Bank Scam) തിരിമറിയിലടക്കം സിപിഎം (CPIM) നേതാക്കള്‍ പ്രതിക്കൂട്ടിലാകുന്ന സാഹചര്യത്തില്‍ സഹകാരികളെ നേരിട്ട് കണ്ട് വിശദീകരണം നല്‍കാന്‍ പാര്‍ട്ടി നേതൃത്വത്തിന്‍റെ നിര്‍ദേശം. സിപിഎമ്മിന്‍റെ ഭരണ സമിതിയുള്ള സഹകരണ സംഘങ്ങളുടെ പ്രസിഡന്‍റുമാരും ബോര്‍ഡ് അംഗങ്ങളും അതാത് സഹകരണ സംഘങ്ങളുടെ അംഗങ്ങളെ നേരിട്ട് കണ്ട് വിശദീകരണം നല്‍കാനാണ് സംസ്ഥാന നേതൃത്വത്തിന്‍റെ നിര്‍ദേശം. സംസ്ഥാന വ്യാപകമായി സിപിഎം ഭരണ സമിതിയുള്ള എല്ലാ ബാങ്കുകളുടെയും സഹകരണ സംഘങ്ങളുടെയും ഭരണ സമിതി അംഗങ്ങളും സഹകാരികളെ നേരിട്ട് കണ്ട് അതാത് സഹകരണ സംഘങ്ങളുടെ പ്രവര്‍ത്തനം വിശദീകരിക്കാനാണ് നിര്‍ദേശം.
ചൊവ്വാഴ്‌ച(03.10.2023) മുതല്‍ വീടുകള്‍ കയറി ബോധവത്കരണ ക്യാമ്പയിന് പ്രവര്‍ത്തനങ്ങള്‍ ആരംഭിച്ചിട്ടുണ്ട്. തിരുവനന്തപുരത്ത് സിപിഎം ഭരണ സമിതി നേതൃത്വം നല്‍കുന്ന കടകംപള്ളി സര്‍വീസ് സഹകരണ ബാങ്ക്, കുമാരപുരം സര്‍വീസ് സഹകരണ ബാങ്ക്, ഉള്ളൂര്‍ സര്‍വീസ് സഹകരണ ബാങ്ക് എന്നിവയുടെ ഭരണ സമിതി അംഗങ്ങള്‍ പ്രസിഡന്‍റുമാരുടെ നേതൃത്വത്തില്‍ സഹകാരികളുടെ വീടുകളില്‍ സന്ദര്‍ശനം നടത്തി ബോധവത്കരണ ക്യാമ്പയിന് തുടക്കം കുറിച്ചു. സംസ്ഥാനത്തെ എല്ലാ സഹകരണ സംഘങ്ങളിലും ചൊവ്വാഴ്‌ച ബോധവത്കരണ ക്യാമ്പയിന് നടത്താന്‍ സിപിഎം നേതൃത്വം നിര്‍ദേശം നല്‍കിയിരുന്നു.
എന്നാല്‍, രാവിലെ മുതല്‍ സംസ്ഥാനത്തിന്‍റെ വിവിധ ഭാഗങ്ങളില്‍ കനത്ത മഴയായതിനാല്‍ ഇന്ന് പലയിടങ്ങളിലും ക്യാമ്പയിന് പ്രവര്‍ത്തനം ആരംഭിച്ചിട്ടില്ല. അതാത് സഹകരണ സംഘങ്ങളുടെ പ്രവര്‍ത്തനങ്ങള്‍ വിശദീകരിക്കുന്നതിനോടൊപ്പം സഹകരണ മേഖലയാകെ കുത്തഴിഞ്ഞ അവസ്ഥയിലാണെന്ന തരത്തിലുള്ള പ്രചരണത്തെ നേരിടാനുള്ള വാദങ്ങളും ജനങ്ങളിലേക്ക് എത്തിക്കാന്‍ ഉദ്ദേശിച്ചാണ് പാര്‍ട്ടി നീക്കം.
നിലവില്‍ സിപിഐയുടെയും സിപിഎമ്മിന്‍റെയും സംസ്ഥാന, ജില്ലാതല നേതാക്കളെ വരെ കരിനിഴലിലാക്കി സഹകരണ സംഘങ്ങളിലെ തട്ടിപ്പുകള്‍ അനുദിനം പുറത്ത് വരുന്ന സാഹചര്യത്തില്‍ എല്ലാ വിഭാഗം ജനങ്ങളിലേക്കും പാര്‍ട്ടിയുടെ വിശദീകരണം എത്തിക്കാന്‍ ഉദ്ദേശിച്ചാണ് പുതിയ ക്യാമ്പയിന് സംസ്ഥാന നേതൃത്വം തന്നെ മുന്‍കൈയെടുത്തിരിക്കുന്നത്.
ഇഡിയുടെ അന്വേഷണം തെരഞ്ഞെടുപ്പ് മുന്നില്‍ കണ്ടെന്ന് മുഖ്യമന്ത്രി : അതേസമയം, ഇക്കഴിഞ്ഞ മാസത്തില്‍ കരുവന്നൂര്‍ സഹകരണ ബാങ്ക് തട്ടിപ്പ് (Karuvannur Cooperative Bank Scam) കേസിലടക്കമുള്ള ഇഡിയുടെ അന്വേഷണം (ED Investigation) ലോക്‌സഭ തെരഞ്ഞെടുപ്പ് (Loksabha Election) മുന്നില്‍ കണ്ടുള്ള നീക്കമാണെന്ന് മുഖ്യമന്ത്രി (Chief Minister) പിണറായി വിജയന്‍ (തിരുവനന്തപുരത്ത് വാര്‍ത്താസമ്മേളനത്തില്‍ വച്ച് പറഞ്ഞിരുന്നു.
കരുവന്നൂരിന്‍റെ കാര്യത്തില്‍ കേരളത്തിലെ സഹകരണ മേഖലയെയാണ് ആദ്യം കാണേണ്ടത്. കേരളത്തിലെ സഹകരണ രംഗം (Cooperative Sector) വലിയ സംഭാവന നാടിന് ചെയ്യുന്ന പ്രസ്ഥാനമാണ്. വഴിവിട്ട രീതിയില്‍ സഞ്ചരിച്ചവര്‍ക്കെതിരെ നടപടി ഉണ്ടാകണമെന്നതില്‍ അഭിപ്രായ വ്യത്യാസമില്ലെന്നും മുഖ്യമന്ത്രി പറഞ്ഞിരുന്നു. 16,255 സഹകരണ സംഘങ്ങളില്‍ 98 ശതമാനവും കുറ്റമറ്റ രീതിയില്‍ നടക്കുന്നു. 1.4 ശതമാനത്തില്‍ താഴെയാണ് ക്രമക്കേടുകള്‍ കണ്ടെത്തിയിട്ടുള്ളതെന്നും അദ്ദേഹം വ്യക്തമാക്കിയിരുന്നു (CM On Karuvannur Bank Scam).
