കൊല്ലം: കടയ്ക്കലില്‍ വെള്ളവും പഴവും വാങ്ങാൻ കടയിൽ പോകാനിറങ്ങിയ ഭിന്നശേഷിക്കാരനായ വൃദ്ധനെ പൊലീസ് മർദിച്ചതായി പരാതി. കടയ്ക്കൽ മണലുവട്ടത്ത് വാടക മുറിയിൽ ഒറ്റയ്ക്ക് താമസിക്കുന്ന ശിവദാസൻ പിള്ളയ്ക്കാണ് മർദനമേറ്റത്. കഴിഞ്ഞ ദിവസം രാവിലെയാണ് സംഭവം.
ബൈക്ക് അപകടത്തെ തുടര്‍ന്ന് വലതുകൈ പൂർണമായും തളർന്ന ശിവദാസൻ പിള്ള ആശുപത്രിയിൽ ഡോക്‌ടറെ കണ്ട ശേഷം മുറിയിലെത്തി. തുടര്‍ന്ന് കുപ്പി വെള്ളവും പഴവും വാങ്ങാന്‍ പുറത്തേക്കിറങ്ങവെ പൊലീസ് എത്തുകയായിരുന്നു. മരുന്ന് കഴിക്കാൻ വെള്ളം വാങ്ങാൻ പോകുകയാണെന്ന് പറഞ്ഞിട്ടും കടയ്ക്കല്‍ സിഐ അസഭ്യം പറയുകയും ചൂരൽ കൊണ്ട് മർദിച്ചുവെന്നും ഇദ്ദേഹം പറയുന്നു.
Also read: ലോക്ക്ഡൗണ്‍: അവശ്യമരുന്ന് വീട്ടിലെത്തിച്ച് ഹൈവേ പൊലീസ്
മർദനത്തിൽ പരിക്കേറ്റ ശിവദാസൻ പിള്ളയെ നാട്ടുകാരാണ് ആശുപത്രിയിൽ എത്തിച്ചത്. തന്നെ അകാരണമായി മർദിച്ച പൊലീസ് ഉദ്യോഗസ്ഥനെതിരെ മുഖ്യമന്ത്രിക്കും സംസ്ഥാന പൊലീസ് മേധാവിക്കും പരാതി നൽകുമെന്ന് ശിവദാസന്‍ പിള്ള പറഞ്ഞു.
