കൊല്ലം : മകന്‍റെ പീഡനത്തിൽ വീട് വിട്ടിറങ്ങിയ വ്യദ്ധദമ്പതികളെ ഏറ്റെടുത്ത് കരുനാഗപ്പള്ളിയിലെ ശാന്തിതീരം. കൊല്ലം മയ്യനാട് കാരിക്കുഴി രാജുഭവനിൽ രാജൻ-പ്രഭാവതി ദമ്പതികൾക്കാണ് എക മകൻ രാജുവിൽ നിന്ന് കൊടിയ പീഡനങ്ങളേറ്റത്. തുടർന്ന് ബന്ധുവീടുകളിലും അയൽവീടുകളുടെ ചായ്പ്പിലുമൊക്കെയാണ് ഇവര്‍ അഭയം പ്രാപിച്ചിരുന്നത്.
മൂന്നോളം പീഡനക്കേസില്‍ പ്രതിയായ രാജുവിനെ ഇവർ ജാമ്യത്തിൽ ഇറക്കിയത് മുതലാണ് പ്രശ്നം തുടങ്ങിയത്. തന്നെ എന്തിനാണ് ജാമ്യത്തിൽ എടുത്തത്, തനിക്ക് ജയിലിൽ കിടക്കുന്നതാണ് ഇഷ്ടം എന്ന് പറഞ്ഞായിരുന്നു ഇയാൾ മാതാപിതാക്കളെ മർദിച്ചത്. രണ്ട് ദിവസം മുമ്പ് മകൻ അതിക്രൂരമായി മർദിച്ചതിനെ തുടർന്ന് ഇവർ സഹോദരീപുത്രിയുടെ വീട്ടിൽ അഭയം പ്രാപിക്കുകയായിരുന്നു.
ALSO READ:പരീക്ഷ നടന്നില്ല ; കളൻതോട് കെ.എം.സി.ടി പോളി ടെക്‌നിക്കില്‍ സംഘര്‍ഷം, കല്ലേറും ലാത്തിച്ചാര്‍ജും
തുടർന്ന് സാമൂഹ്യമാധ്യമങ്ങളിലൂടെ തങ്ങളുടെ അവസ്ഥ ദമ്പതികൾ തന്നെ വെളിപ്പെടുത്തി. ഇതിന് പിന്നാലെയാണ് സാമൂഹ്യ ക്ഷേമവകുപ്പും സാമൂഹികപ്രവർത്തകരായ ഗണേശ്, സജി ചാത്തന്നൂർ എന്നിവരും ഇടപെട്ട് ഇവരെ കരുനാഗപ്പള്ളിയിലെ ശാന്തിതീരത്തിലേക്ക് മാറ്റിയത്.
