കണ്ണൂർ: വിമാനത്തിൽ ഒളിപ്പിച്ചു കടത്താന്‍ ശ്രമിച്ച 90 ലക്ഷത്തിൻ്റെ സ്വർണ ബിസ്ക്കറ്റുകളുകളും രണ്ടര ലക്ഷത്തോളം രൂപയുടെ കുങ്കുമ പൂവും കസ്റ്റംസ് പിടികൂടി. അബുദാബിയിൽ നിന്നെത്തിയ ഗോ എയർ വിമാനത്തിൽ നിന്നാണ് രണ്ടു കിലോ 336 ഗ്രാം തൂക്കം വരുന്ന സ്വർണ ബിസ്ക്കറ്റുകൾ പിടികൂടിയത്. യാത്രക്കാർ ഇറങ്ങിയതിന് ശേഷം സെക്യൂരിറ്റി സ്റ്റാഫ് പരിശോധിക്കുന്നതിനിടെയാണ് സീറ്റിൻ്റെ അടി ഭാഗത്ത് ഒളിപ്പിച്ച നിലയിൽ പാക്കറ്റുകൾ കണ്ടെത്തിയത്. സ്റ്റാഫ് കസ്റ്റംസ് ഉദ്യോഗസ്ഥരെ വിവരമറിയിച്ചതിനെ തുടർന്ന് കസ്റ്റംസ് അസി.കമ്മീഷണർ ഇ.വികാസിൻ്റെ നേതൃത്വത്തിലെത്തിയ സംഘം സ്വർണം കസ്റ്റഡിയിലെടുക്കുകയായിരുന്നു. യാത്രക്കാരില്ലാത്ത സീറ്റിലാണ് സ്വർണം ഒളിപ്പിച്ചു വെച്ചിരുന്നത്.
പത്ത് ബിസ്ക്കറ്റുകൾ വീതം രണ്ട് കെട്ടുകളായി കറുത്ത സെല്ലോ ടേപ്പ് ഉപയോഗിച്ച് പൊതിഞ്ഞുവച്ച നിലയിലായിരുന്നു. വിമാന യാത്രക്കാരനായ കാസർഗോഡ് സ്വദേശി നൗഫലിൽ നിന്ന് 3 കിലോ കുങ്കുമ പൂവും പിടികൂടി. അബുദാബിയിൽ നിന്നെത്തിയ യുവാവിനെ സംശയം തോന്നിയതിനെ തുടർന്ന് കസ്റ്റഡിയിലെടുത്ത് പരിശോധിച്ചപ്പോഴാണ് മൂന്ന് കിലോ തൂക്കം വരുന്ന കുങ്കുമപൂവ് കണ്ടെത്തിയത്. പരിശോധനയിൽ കസ്റ്റംസ് അസി. കമ്മീഷണർ ഇ.വികാസിനൊപ്പം സൂപ്രണ്ടുമാരായ കെ.സുകുമാരൻ, സി.വി.മാധവൻ, ഇൻസ്പെക്ടർമാരായ യഥു കൃഷ്ണൻ, എൻ. അശോക് കുമാർ, കെ.വി.രാജു, മനീഷ് കുമാർ, എൻ.പി.പ്രശാന്ത്, ഹബീൽദാർമാരായ ശ്രീരാജ്, സുമാവതി എന്നിവർ പങ്കെടുത്തു
