കണ്ണൂർ: ഈ വർഷത്തോടെ ഒന്ന് മുതൽ 10 വരെയുള്ള മുഴുവൻ ക്ലാസ് റൂമുകളും ഹൈടെക്ക് ആക്കുമെന്ന് മന്ത്രി സി രവീന്ദ്രനാഥ്. ഹൈസ്കൂളുകൾ ഇതിനകം തന്നെ ഹൈടെക്ക് ക്ലാസ്റൂമുകൾ ആയിക്കഴിഞ്ഞു. ഒന്ന് മുതൽ ഏഴ് വരെയുള്ള ക്ലാസ് റൂമുകൾ കൂടി ഈ വർഷത്തോടെ ഹൈടെക്ക് ആക്കാനുള്ള പരിശ്രമത്തിലാണ് സർക്കാരെന്ന് മന്ത്രി പറഞ്ഞു.
അന്താരാഷ്ട്ര നിലവാരത്തിലുള്ള വിദ്യാഭ്യാസമാണ് സർക്കാർ ലക്ഷ്യമിടുന്നത്. ഇന്ത്യയിൽ ആദ്യമായി ടെക്സ്റ്റ് ബുക്കുകളിൽ ക്യുആർ കോഡ് വന്നത് കേരളത്തിലാണ്. ഒമ്പത്, 10 ക്ലാസുകളിലെ പാഠ പുസ്തകങ്ങളിലാണ് ക്യുആർ കോഡ് വന്നിട്ടുള്ളത്. ഇത് സ്കാന് ചെയ്താൽ ഇന്റർനെറ്റിലൂടെ പാഠഭാഗങ്ങൾ നേരിൽ കണ്ട് മനസിലാക്കാൻ വിദ്യാർഥിക്ക് കഴിയുമെന്നും അദ്ദേഹം പറഞ്ഞു. തൊട്ടിൽപ്പാലം കാവിലുംപാറ ഗവൺമെന്റ് ഹൈസ്കൂളിന്റെ പുതിയ കെട്ടിട സമുച്ചയം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
നാദാപുരം എംഎൽഎയുടെ ആസ്തി വികസന ഫണ്ട്, ജില്ലാ പഞ്ചായത്ത് ഫണ്ട് എന്നിവ ഉപയോഗിച്ചാണ് 22 ക്ലാസ് മുറികൾ ഉള്ള പുതിയ കെട്ടിടം നിർമ്മിച്ചത്. ചടങ്ങിൽ നാദാപുരം എംഎൽഎ ഇ കെ വിജയൻ അധ്യക്ഷത വഹിച്ചു.