ഇടുക്കി: ശാന്തൻപാറ ബി എൽ റാവിൽ സുഹൃത്തുക്കൾ തമ്മിലുണ്ടായ വാക്കു തർക്കത്തെ തുടർന്ന് പരിക്കേറ്റ് ചികിത്സയിലായിരുന്ന യുവാവ് മരിച്ചു. മറയൂർ കോവിൽക്കടവ് സ്വദേശി ചന്ദ്രബോസ് (42) ആണ് മരിച്ചത്. ഇയാളുടെ സുഹൃത്തായ കൊല്ലം അഞ്ചൽ സ്വദേശി എ ആർ മൻസിലിൽ റിയാസ് ഇബ്രാഹിം കുട്ടിയെ ശാന്തൻപാറ പൊലീസ് കസ്റ്റഡിയിൽ എടുത്ത് ചോദ്യം ചെയ്‌ത് വരുന്നു.
തടിപ്പണിക്കായി ബി എൽ റാവിൽ എത്തിയതാണ് ഇരുവരും. 15-ാം തീയതി വൈകിട്ടാണ് മദ്യപിച്ച ശേഷം ഇരുവരും തമ്മിൽ വാക്ക് തർക്കം ഉണ്ടാകുന്നത്. തർക്കത്തിനിടയിൽ റിയാസ് ചന്ദ്രബോസിനെ പിടിച്ചു തള്ളിയിരുന്നു. ഇതിനെ തുടർന്ന് മരകുറ്റിക്ക് മുകളിലേക്ക് വീണ ചന്ദ്രബോസിന്‍റെ വയറിന് പരിക്ക് ഏൽക്കുകയും ചെയ്‌തിരുന്നു.
പിന്നാലെ രാത്രിയോടെ വയറിന് വേദന വർധിക്കുകയും തുടന്ന് രാജകുമാരിയിലെ സ്വകാര്യ ആശുപത്രിയിൽ എത്തി പ്രാഥമിക ചികിത്സ നേടുകയും ചെയ്‌തു. എന്നാൽ ആരോഗ്യസ്ഥിതി മോശമായതിനെത്തുടർന്ന് ചന്ദ്രബോസിനെ കോട്ടയം മെഡിക്കൽ കോളജിൽ പ്രവേശിപ്പിക്കുകയായിരുന്നു.
കോട്ടയം മെഡിക്കൽ കോളജിൽ ചികത്സയിലിരിക്കെ ഇന്നലെ വൈകിട്ട് 3 മണിയോടെയാണ് മരണം സംഭവിച്ചത്. പോസ്റ്റ് മോർട്ടം നടപടികൾ പൂർത്തികരിച്ചു. മൃദദേഹം ബന്ധുക്കൾക്ക് വിട്ടു നൽകി. സംഭവത്തിൽ ശാന്തൻപാറ പൊലീസ് അന്വേഷണം ആരംഭിച്ചു. കസ്റ്റഡിയിലെടുത്ത റിയാസ് ഇബ്രാഹിം കുട്ടിയുടെ അറസ്റ്റ് രേഖപ്പെടുത്തിട്ടില്ല.
ALSO READ: ഇടുക്കിയില്‍ യുവാവ് കുത്തേറ്റ് മരിച്ചു; രണ്ട് പേര്‍ കസ്റ്റഡിയില്‍
