ഇടുക്കി: അതിഥി തൊഴിലാളിയായ യുവതിയെ വീട്ടിൽ കയറി പീഡിപ്പിക്കാൻ ശ്രമിച്ച സംഭവത്തിൽ ഓട്ടോ ഡ്രൈവർ അറസ്‌റ്റിൽ. കുളപ്പാറചാൽ സ്വദേശി കാഞ്ഞിരംമൂട്ടിൽ സിജു ക്ലീറ്റസാണ് അറസ്‌റ്റിലായത്. ഇന്നലെ (29.12.2022) പകൽ 11 മണിയോടെയാണ് കേസിനാസ്‌പദമായ സംഭവം.
ഓട്ടോ ഡ്രൈവറായ സിജു ഒട്ടോറിക്ഷയിൽ രാജകുമാരി ബി ഡിവിഷന് സമീപം യുവതി താമസിക്കുന്ന വീട്ടിലെത്തി കുടിക്കാൻ വെള്ളം ആവശ്യപ്പെട്ടു. വെള്ളം എടുക്കുന്നതിനായി യുവതി അകത്തേയ്ക്ക് പോയ സമയം ഇയാൾ വീടിനുള്ളിൽ കയറി മുൻവശത്തെ വാതിൽ കുറ്റിയിട്ടു. പിന്നീട് യുവതിയെ കടന്ന് പിടിച്ചു. കുതറി മാറി അടുക്കള വാതിൽ വഴി പുറത്തിറങ്ങാൻ ശ്രമിച്ച യുവതിയെ വലിച്ച് നിലത്തിട്ടു.
യുവതിയെ വലിച്ചിഴച്ച് കിടപ്പുമുറിയിലേക്ക് കൊണ്ടുപോകുന്നതിനിടെ പ്രതി പിൻവശത്തെ വാതിൽ അടക്കാൻ ശ്രമിക്കുന്നതിനിടെ യുവതി മുൻ വശത്തെ വാതിൽ തുറന്ന് ഓടി രക്ഷപ്പെടുകയും സമീപവാസികളെ അറിയിക്കുകയുമായിരുന്നു. നാട്ടുകാർ എത്തിയതോടെ പ്രതി ഓട്ടോയുമായി രക്ഷപ്പെട്ടു.
രാജാക്കാട് എസ്ഐ അനൂപിന്‍റെ നേതൃത്വത്തിൽ നടത്തിയ തെരച്ചിലിലാണ് പ്രതിയെ പിടികൂടിയത്. എഎസ്ഐ ബിനോജ്, മധു, ബിജു, ദിലീപ്, റസിയ, ഭാവന എന്നിവരടങ്ങുന്ന സംഘമാണ് പ്രതിയെ മണിക്കൂറുകൾക്കുള്ളിൽ പിടികൂടിയത്.
