ഇടുക്കി: രണ്ട് ലക്ഷം രൂപയുടെ നിരോധിത പുകയില ഉത്പന്നങ്ങളുമായി യുവാവ് അറസ്റ്റിൽ. വെള്ളത്തൂവല്‍ ശല്യാംപാറ സ്വദേശി നൗഫല്‍ ഇബ്രാഹിമിനെയാണ് അടിമാലി നര്‍ക്കോട്ടിക് എന്ഫോഴ്സ്മെന്റ് സംഘം അറസ്റ്റ് ചെയ്തത്.
രാവിലെ ഏഴ് മണിയോടെയായിരുന്നു അടിമാലി ടൗണിലെ കല്ലാർകുട്ടി റോഡിലുള്ള നൗഫലിന്റെ പെട്ടിക്കടയില്‍ നിന്നും ഹാന്‍സുള്‍പ്പെടെയുള്ള നിരോധിത ലഹരി വസ്തുക്കള് നര്‍ക്കോട്ടിക് എന്ഫോഴ്സ്മെന്റ് സംഘം പിടിച്ചെടുത്തത്. നൗഫല്‍ വ്യാപകമായി ലഹരി വസ്തുക്കള് വില്‍പ്പന നടത്തുന്നതായി ലഭിച്ച വിവരത്തിന്റെ അടിസ്ഥാനത്തിലായിരുന്നു പരിശോധന. ഇയാള്‍ അടിമാലി ടൗണിലെ നിരോധിത പുകയില ഉത്പന്നങ്ങളുടെ മൊത്തകച്ചവടക്കാരനാണെന്നും തമിഴ്‌നാട്ടില്‍ നിന്നുമാണ് ലഹരി വസ്‌തുക്കൾ വില്‍പ്പനക്കെത്തിക്കുന്നതെന്നും നര്‍ക്കോട്ടിക് സര്‍ക്കിള്‍ ഇന്സ്പെക്ടര് എം കെ പ്രസാദ് പറഞ്ഞു. കുറഞ്ഞ വിലക്ക് സാധനമെത്തിച്ച് ഇരട്ടിയിലധികം രൂപക്ക് വില്‍പ്പന നടത്തുകയാണ് പ്രതിയുടെ രീതി.
