എറണാകുളം : മുഖ്യമന്ത്രിയും മന്ത്രിമാരും സി.പി.എം നേതാക്കളും ചേര്‍ന്ന് സിൽവർ ലൈനിനെതിരായ സമരം ചെയ്യുന്ന ജനങ്ങളെ അധിക്ഷേപിക്കുകയാണെന്ന് പ്രതിപക്ഷ നേതാവ് വി.ഡി സതീശൻ. അധികാരത്തിന്‍റെ ലഹരി തലയ്ക്ക് പിടിച്ചാണ് ഇവർ സംസാരിക്കുന്നത്. സമരത്തെ തകര്‍ക്കുമെന്ന് മുഖ്യമന്ത്രി ഭീഷണിപ്പെടുത്തുകയാണെന്നും പ്രതിപക്ഷ നേതാവ് പറഞ്ഞു.
'ജനങ്ങളുമായി സംസാരിക്കുമെന്നാണ് ഇപ്പോള്‍ മുഖ്യമന്ത്രി പറയുന്നത്. ഇത്രകാലവും ജനങ്ങളുമായി സംസാരിക്കാന്‍ തയാറായിരുന്നില്ല. ഇഷ്‌ടമുള്ള പൗര പ്രമുഖന്‍മാരെ വിളിച്ചുചേര്‍ത്ത് സര്‍ക്കാര്‍ അവരോട് സംസാരിക്കാന്‍ പോയപ്പോള്‍ യു.ഡി.എഫ് ആശയവിനിമയം നടത്തിയത് കേരളത്തിലെ ജനങ്ങളുമായാണ്. സില്‍വര്‍ ലൈനിന്‍റെ അപകടത്തെ കുറിച്ചാണ് പ്രതിപക്ഷം ജനത്തെ ബോധ്യപ്പെടുത്തിയത്'.
'സാധാരണക്കാരായ ജനങ്ങളുമായി സംസാരിക്കണമെന്ന് മുഖ്യമന്ത്രിക്ക് ഇപ്പോഴാണ് ബോധ്യമായത്. ആ തീരുമാനത്തെ യു.ഡി.എഫ് സ്വാഗതം ചെയ്യുന്നു. പക്ഷേ സമരത്തെ മുഴുവന്‍ ആക്ഷേപിക്കുകയാണ്. വര്‍ഗീയത, തീവ്രവാദം എന്നിങ്ങനെ സമരത്തെക്കുറിച്ച് എന്തെല്ലാമാണ് പറയുന്നത്. അടികൊള്ളേണ്ട സമരമാണ് യു.ഡി.എഫ് നടത്തിയതെന്നാണ് സി.പി.എം സെക്രട്ടറി പറഞ്ഞത്'.
ALSO READ 'കല്ലിന് ക്ഷാമമില്ല, പിഴുതുമാറ്റിയാലും ഇടും' ; വിമോചന സമരം നടക്കില്ലെന്ന് കോടിയേരി
പദ്ധതിയെ കുറിച്ച് പരസ്‌പര വിരുദ്ധമായാണ് മുഖ്യമന്ത്രിയും മന്ത്രിമാരും പാര്‍ട്ടി നേതാക്കളും കെ- റെയില്‍ ഉദ്യോഗസ്ഥരും സംസാരിക്കുന്നതെന്നും വി.ഡി.സതീശൻ പറഞ്ഞു. ഇ.പി ജയരാജനെയും സജി ചെറിയാനെയും ജനങ്ങളെ അധിക്ഷേപിക്കാന്‍ മുന്‍നിരയില്‍ നിര്‍ത്തുകയാണ്. പിണറായിയുടെ രാജസദസിലെ വിദൂഷകന്‍റെ ജോലി ഇരുവരും നന്നായി ചെയ്യുന്നുണ്ട്.
ജാമ്യമില്ല വകുപ്പ് പ്രകാരം കേസെടുക്കുമെന്നാണ് ഭീഷണി. ജാമ്യമില്ല കേസ് പ്രകാരം ജയിലില്‍ പോകാന്‍ തയാറാണെന്നതാണ് ഇതിനുള്ള മറുപടി. സംസ്ഥാനത്തെ യു.ഡി.എഫ് നേതാക്കളും പ്രവര്‍ത്തകരും ജയിലില്‍ പോയി സമരം ചെയ്യുന്ന പാവങ്ങളെ സംരക്ഷിക്കും. ഞങ്ങള്‍ അവരെ കുരുതി കൊടുക്കില്ല. യു.ഡി.എഫ് ഉയര്‍ത്തിയ വിഷയങ്ങള്‍ ചൂണ്ടിക്കാട്ടിയാണ് അവര്‍ സമരം ചെയ്യുന്നത്.
സമരത്തെ തകര്‍ക്കുമെന്ന് മുഖ്യമന്ത്രി ഭീഷണിപ്പെടുത്തുകയാണ്. മുഖ്യമന്ത്രി ആരെയാണ് ഭയപ്പെടുത്തുന്നത്. അദ്ദേഹത്തിന് ചുറ്റുമുള്ളവര്‍ക്ക് മുഖ്യമന്ത്രിയെ ഭയമുണ്ടാകും. യു.ഡി.എഫ് ഭയരഹിതരായി ജനങ്ങള്‍ക്കൊപ്പം നിന്ന് ഈ സമരം മുന്നോട്ടുകൊണ്ടു പോകും. സില്‍വര്‍ ലൈന്‍ പദ്ധതി കേരളത്തില്‍ നടപ്പാക്കാന്‍ അനുവദിക്കില്ലെന്നും വി.ഡി സതീശൻ വ്യക്തമാക്കി.
ALSO READ കലക്‌ടറേറ്റ് വളപ്പിൽ സർവേ കല്ല് സ്ഥാപിച്ച് യൂത്ത് കോണ്‍ഗ്രസ് ; കോട്ടയത്ത് സംഘർഷം
ബി.ജെ.പി, ജമാഅത്തെ ഇസ്ലാമി, കോണ്‍ഗ്രസ്, വര്‍ഗീയത എന്നീ വാക്കുകള്‍ മേമ്പൊടിക്ക് ചേര്‍ത്താണ് കോടിയേരി എല്ലാ ദിവസവും പ്രസ്‌താവന ഇറക്കുന്നത്. യു.ഡി.എഫിന് സമരം ചെയ്യാന്‍ ആരുടെയും സഹായം ആവശ്യമില്ല. ജനകീയ സമരസമിതി നടത്തുന്ന സമരത്തിനാണ് യു.ഡി.എഫ് പിന്തുണ നല്‍കുന്നത്. സമരസമിതിയുടെ ജാഥ കാസര്‍കോട് ഉദ്ഘാടനം ചെയ്‌തത് പ്രതിപക്ഷ നേതാവാണ്.
സി.പി.എം സോളാര്‍ സമരം നടത്തിയപ്പോള്‍ ബി.ജെ.പിയും സമരരംഗത്തുണ്ടായിരുന്നല്ലോ. ഇരുവരും ഒന്നിച്ചാണ് സമരം നടത്തുന്നതെന്ന് യു.ഡി.എഫ് ആക്ഷേപം ഉന്നയിച്ചിട്ടില്ല. മറ്റാരെങ്കിലും സമരം ചെയ്യുന്നുണ്ടോയെന്ന് നോക്കിയല്ല യു.ഡി.എഫ് പ്രക്ഷോഭം നടത്തുന്നതെന്നും പ്രതിപക്ഷ നേതാവ് പറഞ്ഞു.
