തിരുവനന്തപുരം: എറണാകുളത്തുണ്ടായ കനത്ത മഴയെ തുടർന്ന് താഴ്ന്ന പ്രദേശങ്ങളിൽ വെള്ളം കയറിയ സാഹചര്യത്തില്‍ എറണാകുളം ടൗൺ, എറണാകുളം ജംഗ്ഷൻ എന്നീ സ്റ്റേഷനുകളിലെ സിഗ്നലുകളുടെ പ്രവർത്തനത്തെ ബാധിച്ചു. സിഗ്നൽ തകരാറിനെ തുടർന്ന് മിക്ക ട്രെയിനുകളും വൈകിയോടുകയാണ്. ദീർഘ ദൂര ട്രെയിനുകൾ ഉൾപ്പടെ മണിക്കൂറുകൾ വൈകിയാണ് സർവിസ് നടത്തുന്നത്.
ട്രെയിൻ 12618 നിസാമുദ്ദിൻ - എറണാകുളം മംഗള എക്സ്പ്രസ് ഇന്ന്(30.08.2022) എറണാകുളം ജംഗ്ഷൻ സ്റ്റേഷന് പകരം എറണാകുളം ടൗൺ സ്റ്റേഷനിൽ സർവിസ് അവസാനിപ്പിച്ചു. ട്രെയിൻ 16650 നാഗർകോവിൽ - മംഗളുരു പരശുറാം എക്സ്പ്രസ് തൃപ്പുണിത്തുറ - എറണാകുളം ജംഗ്ഷൻ - എറണാകുളം ടൗൺ റൂട്ടിൽ വഴി തിരിച്ച് വിടും.
12081 കണ്ണൂർ - തിരുവനന്തപുരം ജനശതാബ്‌ദി, 17230 സെക്കന്തരാബാദ് - തിരുവനന്തപുരം ശബരി എക്സ്പ്രസ് ആലപ്പുഴ വഴി സർവിസ് നടത്തും. കോട്ടയം വഴിയുളള ട്രെയിൻ 06768 കൊല്ലം - എറണാകുളം മെമു എക്സ്പ്രസ് തൃപ്പുണിത്തുറയിൽ സർവിസ് അവസാനിപ്പിച്ചു. അതേസമയം മഴ ശമിച്ച് വെള്ളമിറങ്ങി തുടങ്ങിയതിനെ തുടർന്ന് റെയിൽവേ എഞ്ചിനിയറിങ് വിഭാഗം സിഗ്നൽ തകരാർ ഉടൻ പരിഹരിച്ച് സാധാരണ പോലെ ട്രെയിൻ സർവിസുകൾ ക്രമീകരിക്കുമെന്ന് റെയിൽവേ അധികൃതർ അറിയിച്ചു.
