ആലപ്പുഴ : മഴ പെയ്ത് പല പോളിങ് ബൂത്തുകളും വെള്ളക്കെട്ടിലായിട്ടും വോട്ടര്‍മാരുടെ തെരഞ്ഞെടുപ്പ് ആവേശത്തിന് തെല്ലും കുറവുണ്ടായിരുന്നില്ല. മഴയത്ത് കുട പിടിച്ചും വെള്ളത്തിലൂടെ നീന്തിയെത്തിയുമാണ് അരൂര്‍ നിയോജകമണ്ഡലത്തിലെ വോട്ടര്‍മാര്‍ തങ്ങളുടെ സമ്മതിദാനാവകാശം നിര്‍വഹിച്ചത്.
മഴയെ വകവയ്ക്കാതെ അരൂർ; വെള്ളക്കെട്ടിലായ ബൂത്തുകളിലും വോട്ട് ചെയ്യാൻ ജനത്തിരക്ക്
വൃദ്ധരും ശാരീരിക അവശതയുള്ളവരുമൊന്നും വോട്ടു ചെയ്യാന്‍ പിന്നിലായില്ല. മഴയെ വകവെക്കാതെ അവരും പോളിങ് ബൂത്തുകളിലെത്തി വോട്ട് രേഖപ്പെടുത്തി. പള്ളിത്തോട് സെന്റ് സെബാസ്റ്റ്യന്‍സ് സകൂളിലെ ബൂത്ത് നമ്പര്‍ 129, അരൂര്‍ സെന്റ് ആഗസ്റ്റിന്‍സ് സ്‌കൂളിലെ 7-8 നമ്പര്‍ ബൂത്തുകള്‍, അരൂര്‍ ഗവ: ഹൈസ്‌കൂളിലെ ബൂത്തുകള്‍ എന്നിവടങ്ങളിലെല്ലാം രൂക്ഷമായ വെള്ളക്കെട്ടാണ് കനത്ത മഴയോടെ രൂപപ്പെട്ടത്. ഉച്ചക്ക് ശേഷം മഴ മാറി നിന്നതോടെ പല ബൂത്തുകളിലും വോട്ടര്‍മാരുടെ നീണ്ട നിരയാണ് ഉണ്ടായിരുന്നത്.
