ഫിഫ അണ്ടര്‍ -17 ലോകകപ്പിന്‍റെ (FIFA U17 World Cup 2023) ക്വാർട്ടർ ഫൈനലിൽ ബ്രസീലിനെതിരായ (Brazil vs Argentina) ഹാട്രിക്കോടെ വീണ്ടും വാര്‍ത്തകളില്‍ നിറയുകയാണ് അര്‍ജന്‍റൈന്‍ വണ്ടര്‍ കിഡ് ക്ലോഡിയോ എച്ചെവേരി (Claudio Echeverri). ഇതിഹാസ താരം ലയണല്‍ മെസിയുടെ (Lionel Messi) പിന്‍ഗാമിയെന്ന വിശേഷണം ഇതിനകം തന്നെ നേടിയെടുത്ത 17-കാരനായി ഇതിനകം തന്നെ യൂറോപ്പിലെ വമ്പന്മാര്‍ തമ്മില്‍ മത്സരം ആരംഭിച്ചു കഴിഞ്ഞു. സ്‌പാനിഷ് വമ്പന്മാരായ റയല്‍ മാഡ്രിഡും ഇംഗ്ലീഷ് കരുത്തരായ മാഞ്ചസ്റ്റര്‍ സിറ്റിയും ഫ്രഞ്ച് ലീഗില്‍ നിന്നും പിഎസ്‌ജിയും ക്ലോഡിയോ എച്ചെവേരിയ്‌ക്കായി രംഗത്തുണ്ടെന്നാണ് റിപ്പോര്‍ട്ട്.
എന്നാല്‍ തന്‍റെ ആരാധനാപാത്രമായ ലയണല്‍ മെസിയെപ്പോലെ സ്‌പാനിഷ് ക്ലബ് ബാഴ്‌സലോണയ്‌ക്കായി പന്ത് തട്ടാനുള്ള തന്‍റെ ആഗ്രഹം വെളിപ്പെടുത്തിയിരിക്കുകയാണ് ക്ലോഡിയോ എച്ചെവേരി. നിലവില്‍ അര്‍ജന്‍റൈന്‍ ക്ലബ് റിവർ പ്ലേറ്റിന്‍റെ (River Plate) താരമായ ക്ലോഡിയോ എച്ചെവേരിയുടെ ഇതു സംബന്ധിച്ച വാക്കുകള്‍ ഇങ്ങിനെ..
"റിവർ പ്ലേറ്റില്‍ കാര്യങ്ങളെല്ലാം മികച്ച രീതിയിലാണ് പോവുന്നത്. എന്നാല്‍ ബാഴ്‌സയ്‌ക്കായി കളിക്കാൻ ഞാൻ ആഗ്രഹിക്കുന്നു. ഞാൻ മെസിയുടെ വലിയ ആരാധകനാണ്, ബാഴ്‌സലോണയ്‌ക്കായി അദ്ദേഹം കളിക്കുന്നത് ഞാൻ കാണാറുണ്ടായിരുന്നു, അതിനാൽ എന്റെ ചെറുപ്പം മുതൽ ഈ ടീം എന്റെ ഉള്ളിലുണ്ട്" 17-കാരന്‍ പറഞ്ഞു.
ചാക്കോ പ്രവിശ്യയിലെ റെസിസ്റ്റെൻസിയയിൽ ജനിച്ച എച്ചെവേരി, ഡിപോർട്ടീവോ ലുജാനുലൂടെയാണ് പന്തുതട്ടി തുടങ്ങുന്നത് (Who is Claudio Echeverri). തുടര്‍ന്ന് 2017-ലാണ് താരം റിവർ പ്ലേറ്റിന്‍റെ ഭാഗമാവുന്നത്. ഇറ്റലിയില്‍ നടന്ന ഒരു യൂത്ത് ടൂർണമെന്‍റില്‍ ടീമിനായി മിന്നിയതോടെ വാര്‍ത്തകളിലും താരം ഇടം നേടി.
ആറ് മത്സരങ്ങളില്‍ നിന്നും ഒമ്പത് ഗോളുകളായിരുന്നു താരം അടിച്ചെടുത്തത്. 2022 ഒക്‌ടോബറിൽ, പാട്രോനാറ്റോയ്‌ക്കെതിരായ റിവർ പ്ലേറ്റ് റിസർവ് ടീമിനായുള്ള അരങ്ങേറ്റത്തിൽ സ്‌കോര്‍ ചെയ്യാന്‍ താരത്തിനായിരുന്നു. ഡിസംബറിലാണ് ക്ലബ്ബുമായി തന്‍റെ ആദ്യത്തെ പ്രൊഫഷണൽ കരാർ ക്ലോഡിയോ എച്ചെവേരി ഒപ്പുവയ്‌ക്കുന്നത്. സീനിയർ തലത്തിൽ റിവർ പ്ലേറ്റിനായി നാല് മത്സരങ്ങൾ കളിച്ചിട്ടുണ്ടെങ്കിലും ഗോള്‍ നേടാന്‍ ക്ലോഡിയോ എച്ചെവേരിയ്‌ക്ക് കഴിഞ്ഞിട്ടില്ല.
ALSO READ: മാറക്കാനയിലെ തല്ലും നായാട്ടും; ബ്രസീല്‍ മാത്രമല്ല, അര്‍ജന്‍റീനയ്‌ക്ക് എതിരെയും ഫിഫ നടപടി
അർജന്‍റീനയുടെ അണ്ടർ 17 ടീമിനായി ക്യാപ്റ്റന്‍ കൂടിയായ ക്ലോഡിയോ എച്ചെവേരി 18 മത്സരങ്ങളിൽ നിന്നും ഒമ്പത് ഗോളുകളാണ് താരം കണ്ടെത്തിയിട്ടുള്ളത്. നേരത്തെ നടന്ന സൗത്ത് അമേരിക്കൻ ചാമ്പ്യൻഷിപ്പിൽ അർജന്‍റീനയെ മൂന്നാം സ്ഥാനത്ത് എത്തിക്കുന്നതില്‍ താരം നിര്‍ണായക പങ്കുവഹിച്ചിരുന്നു. അറ്റാക്കിങ്‌ മിഡ്‌ഫീല്‍ഡറായി തിളങ്ങിയ താരം അഞ്ച് ഗോളുകള്‍ നേടി ടൂർണമെന്‍റിലെ സംയുക്ത ടോപ്-ഗോൾ സ്‌കോററായിരുന്നു.
നിലവില്‍ അണ്ടര്‍ 17- ലോകകപ്പിലെ ഗോള്‍ വേട്ടക്കാരുടെ പട്ടികയിലും ക്ലോഡിയോ എച്ചെവേരി തലപ്പത്തുണ്ട്. ബ്രസീലിനെതിരായ ഹാട്രിക്കോടെ ആകെ അഞ്ച് ഗോളുകളുമായി സഹതാരം അഗസ്റ്റിൻ റോബർട്ടോയ്‌ക്കൊപ്പമാണ് താരം തലപ്പത്ത് തുടരുന്നത് (Claudio Echeverri in FIFA U17 World Cup 2023).
