ഗയാന: വെസ്റ്റ് ഇന്‍ഡീസിനെതിരായ മൂന്നാം ടി20യില്‍ ഇന്ത്യയുടെ വിജയത്തില്‍ ഏറെ നിര്‍ണായകമായ പങ്കാണ് സ്റ്റാര്‍ ബാറ്റര്‍ സൂര്യകുമാര്‍ യാദവിനുള്ളത്. വെടിക്കെട്ട് അർധ സെഞ്ചുറിയുമായി കളം നിറഞ്ഞ താരം 44 പന്തിൽ 83 റൺസായിരുന്നു അടിച്ച് കൂട്ടിയത്. പത്ത് ഫോറുകളും നാല് സിക്‌സുകളും അടങ്ങുന്നതായിരുന്നു താരത്തിന്‍റെ തകര്‍പ്പന്‍ ഇന്നിങ്‌സ്.
ഇതോടെ ടി20യില്‍ 100 സിക്‌സുകള്‍ എന്ന നാഴികകല്ല് പിന്നിടാനും താരത്തിന് കഴിഞ്ഞിരുന്നു. ഫോര്‍മാറ്റില്‍ ഏറ്റവും വേഗത്തില്‍ ഈ നേട്ടം സ്വന്തമാക്കുന്ന ഇന്ത്യന്‍ താരമാണ് സൂര്യകുമാര്‍ യാദവ്. 49 ഇന്നിങ്‌സുകളില്‍ നിന്നാണ് സൂര്യകുമാര്‍ ടി20യില്‍ 100 സിക്‌സുകള്‍ പിന്നിട്ടത്.
നിലവില്‍ 101 സിക്‌സുകളാണ് സൂര്യയുടെ അക്കൗണ്ടിലുള്ളത്. ഇതോടെ ടി20യില്‍ ഇന്ത്യയ്‌ക്കായി ഏറ്റവും കൂടുതല്‍ സിക്‌സറുകള്‍ നേടിയ താരങ്ങളില്‍ കെഎല്‍ രാഹുലിനെ പിന്നിലാക്കി മൂന്നാം സ്ഥാനത്തേക്ക് കയറാനും സൂര്യകുമാര്‍ യാദവിന് കഴിഞ്ഞു. 68 ഇന്നിങ്‌സുകളില്‍ നിന്നും നിലവില്‍ 99 സിക്‌സറുകളാണ് രാഹുലിന് നേടാന്‍ കഴിഞ്ഞിട്ടുള്ളത്. ഇന്ത്യന്‍ ക്യാപ്റ്റന്‍ രോഹിത് ശര്‍മയാണ് പട്ടികയില്‍ തലപ്പത്തുള്ളത്.
നിലവില്‍ 140 ഇന്നിങ്‌സുകളില്‍ നിന്നായി 182 സിക്‌സറുകളാണ് ഹിറ്റ്‌മാന്‍ പറത്തിയിട്ടുള്ളത്. അന്താരാഷ്‌ട്ര താരങ്ങളുടെ മൊത്തത്തിലുള്ള പട്ടിക എടുത്താലും രോഹിത് തന്നെയാണ് ഒന്നാമത്. ഇന്ത്യന്‍ താരങ്ങളുടെ പട്ടികയില്‍ വിരാട് കോലിക്കാണ് രണ്ടാം സ്ഥാനം. 107 ഇന്നിങ്‌സുകളില്‍ നിന്നായി 117 സിക്‌സുകളാണ് കോലി നേടിയിട്ടുള്ളത്. മൊത്തത്തിലുള്ള പട്ടികയില്‍ ഏഴാമതാണ് കോലി.
ധവാനും പിന്നില്‍: ഗയാനയിലെ റണ്‍വേട്ടയോടെ ടി20യില്‍ ഏറ്റവും കൂടുതല്‍ റണ്‍സ് നേടിയ ഇന്ത്യന്‍ താരങ്ങളുടെ പട്ടികയില്‍ ശിഖര്‍ ധവാനെ പിന്നിലാക്കി നാലാം സ്ഥാനത്തേക്ക് കയറാനും സൂര്യയ്‌ക്ക് കഴിഞ്ഞു. നിലവില്‍ 51 മത്സരങ്ങളിലെ 49 ഇന്നിങ്‌സുകളില്‍ നിന്നും 45.64 ശരാശരിയില്‍ 1780 റണ്‍സാണ് സൂര്യ അടിച്ച് കൂട്ടിയിട്ടുള്ളത്.
മൂന്ന് സെഞ്ചുറികളും 14 അര്‍ധ സെഞ്ചുറികളും ഉള്‍പ്പെടെയാണ് താരത്തിന്‍റെ പ്രകടനം. 68 മത്സരങ്ങളില്‍ നിന്നും 1759 റണ്‍സാണ് ധവാന്‍ നേടിയിട്ടുള്ളത്. കെഎല്‍ രാഹുല്‍ (72 മത്സരങ്ങളില്‍ നിന്നും 2265 റണ്‍സ്), രോഹിത് ശര്‍മ (148 മത്സരങ്ങളില്‍ നിന്നും 3853 റണ്‍സ്), വിരാട് കോലി (115 മത്സരങ്ങളില്‍ നിന്നും 4008 റണ്‍സ്) എന്നിവരാണ് യഥാക്രമം സൂര്യയ്‌ക്ക് മുന്നിലുള്ളത്. മൊത്തത്തിലുള്ള പട്ടികയെടുത്താലും കോലി തലപ്പത്തും രോഹിത് രണ്ടാം സ്ഥാനക്കാരനായുമുണ്ട്.
അതേസമയം മത്സരത്തില്‍ ഇന്ത്യ 13 പന്തുകള്‍ ബാക്കി നില്‍ക്കെ ഏഴ്‌ വിക്കറ്റിന്‍റെ വിജയമായിരുന്നു നേടിയിരുന്നത്. ആദ്യം ബാറ്റ് ചെയ്‌ത വിന്‍ഡീസിന് നിശ്ചിത 20 ഓവറില്‍ 159 റണ്‍സാണ് നേടാന്‍ കഴിഞ്ഞത്. മറുപടിക്കിറങ്ങിയ ഇന്ത്യ 17.5 ഓവറില്‍ മൂന്ന് വിക്കറ്റ് നഷ്‌ടത്തില്‍ 164 റണ്‍സെടുത്താണ് വിജയം ഉറപ്പിച്ചത്. സൂര്യയെ കൂടാതെ 37 പന്തുകളില്‍ 49 റണ്‍സുമായി പുറത്താവാതെ നിന്ന തിലക് വര്‍മയും തിളങ്ങി.
